ENGLISH

04 އޭޕްރީލު 2025

Advertisement

ހަނގުރާމަ ވަގުތުން ހުއްޓައިނުލައިފިނަމަ ދަތިކުރުމުގެ ފިޔަވަޅުތައް ހަރުކަށި ކުރާނެ ކަމުގެ އިންޒާރު ޓްރަމްޕް ރަޝިޔާއަށް ދެއްވައިފި

23 ޖެނުއަރީ 2025

|

ހަސަން އާމިރު

ރަޝިޔާއާ ދެކޮޅަށް އަޅާފައިވާ ދަތިރިކުރުމުގެ ފިޔަވަޅުތައް ހަރުކަށި ކުރާނެ ކަމުގެ އިންޒާރާ އެކު ޔޫކްރޭނާއެކު ސުލްޙައިގެ އެއްބަސްވުމެއް ހަދައި، ހަނގުރާމަ ވަގުތުން ހުއްޓައިލަން، އެމެރިކާގެ ރައީސް ޑޮނަލްޑް ޓްރަމްޕް ރަޝިޔާގެ ރައީސް ވްލެޑިމިއަރ ޕޫޓިންއަށް ގޮވާލައްވައިފިއެވެ.

ރިޔާސީ އިންތިޚާބުގެ ތެރޭގައި ޓްރަމްޕް ވަނީ ޔޫކްރޭނާ ދެކޮޅަށް ރަޝިޔާއިން ކުރާ ހަނގުރާމަ، ވެރިކަމަށް ވަޑައިގެންނެވުމާ އެކު ނިމުމަކަށް ގެންނަވާނެ ކަމަށް ވިދާޅުވެފައެވެ.

މިދިޔަ ހޯމަ ދުވަހު، އެމެރިކާގެ 47 ވަނަ ރައީސްގެ ގޮތުގައި މަޤާމުގެ ހުވައި ކުރައްވައި، ވެރިކަމަށް އެނބުރި ވަޑައިގެންނެވި ޓްރަމްޕް ވަނީ ރަޝިޔާ ކުރާ ޕްރެޝަރު ބޮޑުކުރައްވާނެކަމުގެ އިންޒާރު ދެއްވައިފައެވެ.

"ދާދި އަވަހަށް އެއްބަސްވުމަކަށް ނާދެވިއްޖެނަމަ، ރަޝިޔާއިން އެމެރިކާއަށް އެތެރެކުރާ މުދަލުން ޓެކްސްތަކާއި ޑިޔުޓީ އަދި އެހެނިހެން ފިޔަވަޅުތައް ހަރުކަށި ކުރުން ނޫން ގޮތެއް ނޯންނާނެ،" ޓްރަމްޕް ވިދާޅުވިއެވެ.

ނަމަވެސް، ޕޫޓިން އާ އެކު އަބަދުވެސް ވަރަށް ރަނގަޅު ގުޅުމެއް އޮންނަ ކަން ފާހަގަކުރައްވައި، ޓްރަމްޕް ވަނީ ރަޝިޔާއަށް ގެއްލުމެއް ދޭން ބޭނުންފުޅުނުވާ ކަމަށް ވެސް ވިދާޅުވެފައެވެ.

ޓްރަމްޕް ވިދާޅުވީ އެ މަނިކުފާނު ވެރިކަމުގައި ހުންނެވި ނަމަ، މި "ތާކުންތާކުނުޖެހޭ" ހަނގުރާމަ ނުވެސް ފެށުނީސް ކަމަށެވެ.

އެހެންކަމުން، ހަނގުރާމަ ނިމުމަކަށް ގެނައުމަށް އޮތް "ފަސޭހަ މަގު" ޚިޔާރުކޮށް، ސުލްޙަ ޤައިމުކުރަން ޓްރަމްޕް ވަނީ ޕޫޓިންއަށް ގޮވާލައްވައިފައެވެ.

ކިޔުންތެރިންގެ ހިޔާލު