ދެކުނު ކޮރެޔާގެ ރައީސްކަމުގެ މަޤާމުން އަޒުލުކޮށްފައިވާ ޔޫން ސުކް ޔެއޯލްގެ މައްޗަށް ފިތުނަ އުފެއްދުމާއި މަޤާމުގެ ނުފޫޒު ނަހަމަ ގޮތުގައި ބޭނުންކުރި ކަމުގެ ދަޢުވާކޮށްދޭން، ތަހުޤީޤީ އިދާރާއިން އެދިއްޖެއެވެ.

ދެކުނު ކޮރެއާގައި ކުއްލި ޙާލަތު ޔޫން އިޢުލާނު ކުރެއްވި މައްސަލާގައި، ޤާނޫނު ހަދާ މަޖިލީހުގެ އަޣުލަބިއްޔަތުން އެ މަނިކުފާނުގެ މައްޗަށް އިތުބާރު ނެތް ކަމަށް ފާސްކުރީ މިދިޔަ މަހުގެ 13 ވަނަ ދުވަހުއެވެ.

އެ މައްސަލައިގެ ތަހުޤީޤު ފަށައި، އެތައް ދުވަހެއްގެ މަސައްކަތަށްފަހު، ޔޫން މިހާރު ހުންނެވީ ހައްޔަރުކޮށްފައެވެ.

ގާތްގަނޑަކަށް ދެ މަސް ދުވަހުގެ ތަހުޤީޤަށްފަހު، ދެކުނު ކޮރެޔާގެ ކޮރަޕްޝަން އިންވެސްޓިގޭޝަން އޮފީސް (ސީއައިއޯ) އިން ބުނީ، ކުއްލި ޙާލަތު އިޢުލާނުކުރުމުގައި، މަޤާމުގެ ނުފޫޒު ނަހަމަގޮތުގައި ބޭނުންކުރުމާއި ފިތުނަ އުފެއްދުމުގެ ދަޢުވާ ޔޫންގެ މައްޗަށް ކުރެވޭނެ ކަމަށެވެ.

އެހެންކަމުން، އެ ދަޢުވާތައް ޔޫންގެ މައްޗަށް އުފުލުމަށް، ސޯލް ސެންޓްރަލް ޑިސްޓްރިކްޓް ޕްރޮސެކިޔުޓަރސް އޮފީހުގައި ސީއައިއޯއިން މިހާރު ވަނީ ރަސްމީކޮށް އެދިފައެވެ.

އެ ދަޢުވާތައް ކުރުމާމެދު ޕްރޮސެކިޔުޓަރސް އޮފީހުން ކުރިއަށް އޮތް 11 ދުވަހުގެ ތެރޭގައި ގޮތެއް ނިންމަންޖެހޭނެއެވެ.

ދެކުނު ކޮރެޔާގައި ފިތުނަ އުފެއްދުމަކީ މަރުގެ އަދަދު ކަނޑައެޅޭނެ ޖިނާޢީ ކުށެކެވެ.

ދެކުނު ކޮރެޔާގެ ޤާނޫނުއަސާސީގެ ދަށުން ރައީސްކަމުން އަޒުލުކުރިޔަސް، އެކަމާ މެދު ފަހު ބަސް ބުނާނީ ދެކުނު ކޮރެޔާގެ ދުސްތޫރީ ކޯޓުންނެވެ.

އެ ކޯޓުން ވަނީ، ޖެނުއަރީ 14 އިން ފެށިގެން ފެބްރުއަރީ 4 އާ ދެމެދު ފަސް އަޑުއެހުމެއް ތާވަލުކޮށްފައެވެ.

މި މައްސަލައިގައި ގޮތެއް ނިންމަން ކޯޓަށް 180ގެ މުއްދަތެއް ލިބޭނެއެވެ.