ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދޮންމަންމާފުޅާ ގުޅުވައިގެން ދައްކާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށާއި، އެއީ ސިޔާސީ ވިސްނުމެއްގައި އެމަނިކުފާނުގެ އަގުވައްޓަލުމަށް ދައްކާ ވާހަކަތަކެއް ކަމަށް ރައީސް މުޢިއްޒު މިއަދު ވިދާޅުވެއްޖެ އެވެ.

މިދިޔަ އަހަރުގެ ރިޔާސީ އިންތިހާބުގެ ދެވަނަ ބުރާ ދިމާކޮށް، ރައީސް ޑރ. މުހައްމަދު މުއިއްޒުގެ ދޮންމަންމާފުޅު ސްކީލާންއާ ގުޅޭ ގޮތުން ތައްޔާރުކުރި ވީޑިއޯ ޑޮކިއުމެންޓްރީއަކުން އެ މަނިކުފާނަށް އަމާޒު ކުރެއްވި ބޮޑެތި ތުހުމަތުތަކަށް ފުރަތަމަ ފަހަރަށް ޖަވާބު ދެއްވަމުން ވިދާޅުވީ އެއީ އެއްވެސް ހަގީގަތެއް ނެތް ވާހަކަތަކެއް ކަމަށާއި އޭގެ ބޭނުމަކީ ސިޔާސީ ވިސްނުމެއްގައި އެމަނިކުފާނުގެ އަގު ވައްޓާލުން ކަމަށެވެ.

"ދޮންމަންމަ ވިދާޅުވި ހުވަފަތް އަންތްބެއްވީމަ ދީނީގޮތުން އޮންނަ ބައިކުޅަބައި އެއްކޮށް އަޅުގަނޑަށް ދޫކޮށްލާނަމޭ. އެހެންވީމަ އެއީ ނިންމި ނިންމުމަކީ. އެގޮތަށް ނިންމައިގެން ތަރިކަ ބަހާ ނިންމާފައި އެ އޮތީ. އެއީ އެކަން އޮތްގޮތަކީ. ދެން އަޅުގަނޑު މިވަރަށް ވެސް ބުނަން ބޭނުންވީ އެއީ އަޅުގަނޑުގެ މިޒާޖުގައި ހުންނަ ކަމެއް ނޫން ޒާތީ ވާހަކަ ދެއްކުމަކީ،" ރާއްޖޭގެ ތަރައްގީއާ ގުޅޭ މާސްޓަ ޕްލޭން އިފްތިތާހް ކުރެއްވުމަށް ފަހު، ސޯޝަލް ސެންޓަރުން ނުކުމެވަޑައިގެން ނޫސްވެރިންނާ ބައްދަލުކުރެއްވައި އެ ޑޮކިއުމެންޓްރީގެ ތުހުމަތާ ގުޅޭ ގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް ވިދާޅުވި އެވެ.

ރައީސް މުޢިއްޒު ވިދާޅުވީ އެމަނިކުފާނަކީ އެއްވެސް އިރެއްގައި މީހެއްގެ ޒާތީ ވާހަކަތައް ދައްކާ ބޭފުޅެއް ނޫންކަމަށާއި، ދައްކާނަމަ އަބަދުވެސް ދައްކަވާނީ އެމީހެއްގެ ރަނގަޅު ވާހަކަތައް ކަމަށެވެ. ރައީސް އިތުރަށް ވިދާޅުވީ ބައްޕާފުޅު އަވަހާރަވުމުން ތަރިކަ ބެހުމުގެ ކަންކަން ކުރިއަށް ގެންދިޔައީ އެކަން އޮންނަ އުސޫލުން ކޯޓު މަރުހަލާއިން ކަމަށެވެ.

ރައީސް ވިދާޅުވީ ބައްޕާފުޅުގެ ސްރީލަންކާގައި ހުރި ތިން ބިމާއި، އެ ބިންތަކުގައި ޢިމާރާތްކޮށްފައިވާ ޢިމާރާތްތަކާއި ވިޔަފާރިތަކާއި، ލަންކާގައި ބައްޕާފުޅުގެ އެކައުންޓުގައި ހުރި ހުރިހާ ފައިސާއެއް ހިމެނޭ ގޮތަށް ހުރިހާ އެއްޗެއް ދޮންމަންމާފުޅަށް ހިލޭ، އެއްވެސް ބަދަލަކާ ނުލައި ދީފައިވާނެ ކަމަށެވެ. އަދި މާލެއިން ލިބިވަޑައިގަންނަވާ ބައްޕާފުޅުގެ ތަރިކަ މުދަލުގެ ބައިކުޅަބައި އެއްކޮށް އެމަނިކުފާނަށް ދޫކޮށްލި ކަމަށް ދޮންމާފުޅު ވިދާޅުވެފައިވާކަން ވެސް ރައީސް ފާހަގަކުރެއްވިއެވެ.

ރައީސް ވިދާޅުވީ މިކަން އޮޅުވާލައި ދައްކާ ވާހަކަތަކަކީ ސިޔާސީ ބޭނުމެއްގައި އެމަނިކުފާނުގެ އިސްތަށިފުޅުގައި އަޅުވާ ދޮގު ވާހަކަތަކެއް  ކަމަށާއި، މިއާ ޚިލާފަށް އެމަނިކުފާނު ކޮށްފައިވާ އެއްވެސް ކަމެއް ނޯންނާނެ ކަމަށެވެ.

ރައީސް މުއިއްޒުގެ ދޮންމަންމާފުޅު ސްކީލާން ހުސެއިން އަކީ ސްރީ ލަންކާގެ ބޭކަނބަލެކެވެ. ރައީސް މުއިއްޒުގެ ބައްޕާފުޅާ ކައިވެނި ބައްލަވައިގެން ސްކީލާން ވެސް ދިރިއުޅުއްވީ މާލޭގައި ރައީސް މުއިއްޒުގެ އާއިލީ ގެކޮޅު، މ. ދިމްޔާތުގަ އެވެ. މުއިއްޒުގެ ބައްޕާފުޅު 2015 ވަނަ އަހަރު ހައްޖުގެ އަޅުކަމަށް ވަޑައިގެން އުޅުއްވަނިކޮށް މައްކާގައި އަވަހާރަވުމުން ސްކީލާން އެނބުރި ލަންކާ އަށް ވަޑައިގަތީ ތަރިކަ މުދާ ބެހުމުގެ މައްސަލަ ފެމިލީ ކޯޓުން ނިންމި ފަހުންނެވެ.

އިންތިހާބުގެ ދުވަސްވަރު، ރައީސް މުއިއްޒަށް އަމާޒުކޮށް އެމަނިކުފާނުގެ ދޮންމަންމާފުޅާ ގުޅޭ ގޮތުން ނެރުނު ޑޮކިއުމެންޓްރީއާ ގުޅޭ ގޮތުން އެ މަނިކުފާނު މިހާތަނަށް އެއްވެސް ވާހަކަފުޅެއް ވިދާޅެއް ނުވެ އެވެ. ނަމަވެސް ރައީސް މިއަދު ވިދާޅުވީ، ބޮޑެތި އިލްޒާމު އަޅުވައި އާއްމުކުރި ޑޮކިއުމެންޓްރީއާ ގުޅޭ ގޮތުން މިހާތަނަށް އެއްޗެއް ވިދާޅުވާން ބޭނުންފުޅު ނުވީ އެ މަނިކުފާނަކީ މީހުންގެ ވާހަކަ ދައްކަވާ ބޭފުޅަކަށް ނުވާތީ ކަމަށެވެ. އެކަމަކު މިއަދު އެއަށް ރައްދު ދެއްވަން ޖެހިވަޑައިގެންނެވީ "އެކަން ބޮޑުވެފައި އޮތުމުން" ކަމަށެވެ.

ރައީސް ވިދާޅުވީ ދޮންމަންމާފުޅާ ދޭތެރޭގައި ގޯހުން ކަމެއް ކުރައްވާފައެއް ނޯންނާނެ ކަމަށާއި މުދާ ބެހުމުގައި ވެސް އަމަލުކުރެއްވީ، އެކަމަނާ އެދިވަޑައިގަތް ގޮތަށް ކަމަށެވެ.