މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑޮކްޓަރ މަރްޔަމް މާރިޔާގެ ލޮބުވެތި ބައްޕާފުޅު މުޙައްމަދު ޔޫސުފް (ކުވާ މޮހޮދޭ) މިއަދު އަވަހާރަވެއްޖެ އެވެ.

ކުވާ މޮހޮދޭގެ ނަމުން ދިވެހިންގެ ތެރޭގައި މަޝްހޫރު، ވިޔަފާރި ވެރިޔާ ވަނީ އިގްތިސާދީ ދާއިރާއިން ބޮޑެތި ޚިދުމަތްތަކެއް ޤައުމަށް ކޮށްދެއްވައި، ދަރުމަވެރި އެތައް އެހީތަކެއް ވަކިވަކި ފަރުދުންނަށާއި ޖަމާޢަތްތަކަށް ފޯރުކޮށްދެއްވައިފަ އެވެ. ކުވާ މޮހޮދޭ އަކީ ގިނަ ބަޔަކު ދަންނަ ރަޙްމަތްތެރި ސާދާ މިޒާޖެއްގެ ވެރިއެކެވެ. ޚިދުމަތްތެރި ދަރީންތަކެއްގެ ބައްޕައެކެވެ.

ހަޔާ އެޑިއުކޭޝަން މިނިސްޓަރުގެ އިތުރުން ކުވާ މޮހޮދޭގެ ބޭފުޅުންގެ ތެރޭގައި ކަސްޓަމްސްގެ ކޮމިޝަނާ ޖެނެރަލްގެ މަގާމުގައި ދާދިފަހަކާ ޖެހެންދެން ހުންނެވި މާނިއު ޔޫސުފް އަދި ކުރީގެ އިމިގްރޭޝަން ކޮންޓްރޯލް އިބްރާހިމް ޝާފިއު ހިމެނެ އެވެ.

ކުވާ މޮހޮދޭ އަކީ 70 ގެ ފަހުގެ އަހަރުތަކުގައި ރާއްޖޭގައި ހުރި އެންމެ މުއްސަނދި ބޭފުޅާ އެވެ. ރާއްޖޭގައި ކޮލެރާ ފެތުރުނު ދުވަސްވަރު އޭނާގެ އަމިއްލަ ޚަރަދުގައި ވަނީ ވަރަށް ގިނަ ކަންކަން ކޮށްދެއްވައިފަ އެވެ. އޭގެ ފަހުން ސިޔާސީ މައްސަލައެއްގައި ވަރަށް ގިނަ ދުވަހު ޖަލުގައި ހޭދަކުރެއްވި އެވެ.

މުޙައްމަދު ޔޫސުފް އަވަހާރަވުމާ ގުޅިގެން އޭނާގެ އާއިލާ އަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ވަނީ ތަޢުޒިޔާ ދަންނަވައިފަ އެވެ.