ބޭރު ޤައުމުތަކާއެކު އޮންނަ ވިޔަފާރީގެ ގުޅުންތަކުން އެމެރިކާއަށް ގެއްލުންވަމުންދާ ކަމަށް ވިދާޅުވެ، އެމެރިކާއަށް އެތެރެކުރާ މުދަލުން ޑިޔުޓީ ބޮޑުކުރަން ރައީސް ޑޮނަލްޑް ޓްރަމްޕް ދެއްވާފައިވާ އިންޒާރުން ޔޫރަޕިއަން ޔޫނިއަން (އީޔޫ) ވެސް ސަލާމަތް ނުވާނެ ކަމުގެ އިޝާރާތެއް އެ މަނިކުފާނު ދެއްވައިފިއެވެ.

މިދިޔަ ހޯމަ ދުވަހުގެ ރޭ ރައީސްކަމުގެ ހުވައި ކުރައްވައި، އެމެރިކާގެ ރައީސްކަމަށް އެނބުރި ވަޑައިގެންނެވި ޓްރަމްޕް ނޫސްވެރިންނާ ވާހަކަ ދައްކަވަމުން ވިދާޅުވި ގޮތުގައި، އީޔޫގެ ޤައުމުތަކާ އެކު ވިޔަފާރީގެ ގުޅުން އޮތީ، އެމެރިކާއަށް ގެއްލުންވާ ގޮތަށް ކަމަށެވެ.

"އެ މީހުން [އީޔޫ] އަޅުގަނޑުމެންނާ ދޭތެރޭ ކަންތައް ކުރަނީ ވަރަށް ވަރަށް ގޯސްކޮށް. އެހެންވީމާ އެ މީހުންނަށް ވެސް ޓެރިފްއާ ކުރިމަތިލާންޖެހޭނެ. ދެ ފަރާތަށް ވެސް ހަމަހަމަކަން ގެނުވޭނީ އެގޮތަށް ހަދައިގެން،" ޓްރަމްޕް ވިދާޅުވިއެވެ.

އޭގެ އެއް ދުވަސް ކުރިން ޓްރަމްޕް ވަނީ، އީޔޫއިން އެކަށީގެންވާ މިންވަރަށް އެމެރިކާއިން މުދާ ގަންނަމުންނުދާ ކަމުގެ ޝަކުވާ ކުރައްވައިފައެވެ.

އީޔޫގެ އިތުރުން، ފެބްރުއަރީ އެއްވަނަ ދުވަހުން ފެށިގެން، ޗައިނާއިން އެތެރެކުރާ މުދަލުން 10 ޕަސެންޓުގެ ޑިޔުޓީއެއް ނަގާނެކަމަށް ވެސް ޓްރަމްޕް ވަނީ އިޢުލާނުކުރައްވައިފައެވެ.

މީގެ އިތުރުން ކެނެޑާ އަދި މެކްސިކޯ އިން އެމެރިކާ އަށް އެތެރެކުރާ މުދަލުން ނަގާ ޑިޔުޓީ 25 އިންސައްތަ ބޮޑުކުރައްވާނެ ކަމުގެ އިޝާރާތެއް ޓްރަމްޕް ވަނީ ދެއްވައިފައެވެ.

އެމެރިކާގެ ވިޔަފާރީގެ ސިޔާސަތަށް ގެންނަވާ ބަދަލުތަކުގެ ތެރެއިން، އެހެން ޤައުމުތަކާ ދެކޮޅަށް ވެސް މިފަދަ ބައެއް ފިޔަވަޅުތައް އަޅުއްވާނެ ކަމުގެ އިންޒާރު ޓްރަމްޕް ވަނީ ދެއްވައިފައެވެ.

"އަޅުގަނޑުމެންގެ ރައްޔިތުން އަތުން ޓެކްސް ނަގައިގެން އެހެން ޤައުމުތައް މުއްސަނދިކުރުމުގެ ބަދަލުގައި، ބޭރު ޤައުމުތަކުން ނަގާ ޑިޔުޓީ ބޮޑުކޮށްގެން، އަޅުގަނޑުމެންގެ އަމިއްލަ ރައްޔިތުން މުއްސަނދިކުރާނީ،" މަޤާމުގެ ހުވައި ކުރެއްވުމަށްފަހު، ފުރަތަމަ ފަހަރަށް ޤައުމާ މުޚާތަބު ކުރައްވައި ޓްރަމްޕް ވިދާޅުވިއެވެ.