ދުނިޔޭގައި ކަނޑުމަގުން މުދާ އުފުލުމުގައި އެންމެ މުހިންމު އެއް މަގު ކަމަށްވާ، ޕެނަމާ ކެނަލް އަތުލާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރާ ގުޅިގެން، ޕެނަމާއިން އދ.ގައި ޝަކުވާ އުފުލައިފިއެވެ.

އެމެރިކާގެ މުދާ އުފުލާ ބޯޓުތަކުން ބޮޑެތި ފީތައް ނަގައި، ތަފާތުކުރާ ކަމަށް ވިދާޅުވެ، ޕެނަމާ ކެނާލް އެމެރިކާގެ ބާރުގެ ދަށަށް ގެންނަންޖެހިދާނެ ކަމަށް، ޓްރަމްޕް އެންމެ ފުރަތަމަ ވިދާޅުވީ، ރައީސްކަމުގެ ހުވައި ކުރެއްވުމުގެ ކުރިންނެވެ.

އޭގެފަހުން، މިދިޔަ ހޯމަ ދުވަހުގެ ރޭ މަޤާމުގެ ހުވައި ކުރެއްވުމަށްފަހު، ޓްރަމްޕް ވަނީ އެ އިންޒާރު ތަކުރާރު ކުރައްވައިފައެވެ.

ޓްރަމްޕް ވިދާޅުވި ގޮތުގައި ޕެނަމާ ކެނަލްގައި މިހާރު އޮތީ ޗައިނާގެ ބާރެވެ. އެހެންވެ، ޕެނަމާ ނޫން ބަޔަކު އެތަނަށް ގަދަވާ ނަމަ ތަން އަތުލުން ނޫން ގޮތެއް ނޯންނާނެ ކަމަށް ޓްރަމްޕް ވިދާޅުވެފައިވެއެވެ.

"އެމެރިކާއިން އެތަން ދިނީ ޗައިނާއަކަށް ނޫން، ޕެނަމާއަށް. އެހެންވެ، އެތަން އަނބުރާ އަތުލާނަން،" ޓްރަމްޕް ވިދާޅުވިއެވެ.

އެ އިންޒާރާ ގުޅިގެން ޕެނަމާ ސަރުކާރުން އދ.ގެ ސެކްރެޓަރީ ޖެނެރަލް، އެންޓޯނިއޯ ގުޓެރޭސްއަށް ފޮނުވި ސިޓީއެއްގައި ބުނީ، އެއްވެސް ޤައުމެއްގެ ސިޔާދަތާއި މިނިވަންކަން ނަގައިލަން، ބާރުގެ ބޭނުންކުރުމުގެ އިންޒާރަކީ، އދ.ގެ ޗާޓަރާ ޚިލާފުކަމެއް ކަމަށެވެ.

އެއާ އެކު، އދ.ގެ އެންމެ ބާރުގަދަ ގުނަން ކަމަށްވާ، ސަލާމަތީ މަޖިލީހަށް އެ މައްސަލަ ގެންގޮސްދެއްވުމަށް ގުޓެރޭސްގެ އަރިހުން ޕެނަމާއިން ވަނީ އެދިފައެވެ.

އެމެރިކާއިން 1914 ވަނަ އަހަރު ތަރައްޤީކޮށް ނިންމައިލި ޕެނަމާ ކެނަލް، ޕެނަމާ އާ ޙަވާލުކުރީ 1977 ވަނަ އަހަރު އެމެރިކާގެ އޭރުގެ ރައީސް ޖިމީ ކާޓަރ ސޮއިކުރެއްވި އެއްބަސްވުމެއްގެ ދަށުންނެވެ.

އެ ކެނަލްގެ ފުރިހަމަ ކޮންޓްރޯލް ޕެނަމާ އަށް ލިބިފައިވަނީ 1999 ވަނަ އަހަރުގެ ތެރޭގައެވެ.

ޕެނަމާ ކެނަލް އަށް ބޭރުގެ އެއްވެސް ޤައުމަކުން ނުފޫޒު ފޯރުވާ ކަމުގެ ތުހުމަތުތައް، ޕެނަމާގެ ރައީސް ހޯސޭ ރައުލް މުލީނޯ ވަނީ ދޮގުކުރައްވައިފައެވެ.