ENGLISH
04 އޭޕްރީލު 2025
ބޯޑަރުގައި ކުއްލި ޙާލަތު، އިމްޕޯޓު ޑިޔުޓީ ބޮޑުކުރުން، ޑަބްލިޔުއެޗްއޯއިން ވަކިވުން: ވެރިކަމުގެ ފުރަތަމަ ދުވަހު ޓްރަމްޕްގެ ވަރުގަދަ ނިންމުންތަކެއް!
21 ޖެނުއަރީ 2025
|
އެންމެ މަޤްބޫލު
ރިޔާސީ ކެމްޕޭނު ތެރޭގައި ވަޢުދުވެވަޑައިގެންނެވި ގޮތަށް، އެމެރިކާގެ ރައީސްކަމާ ޙަވާލުވެވަޑައިގެންނެވިތާ ކުޑަވަގުތުކޮޅެއްގެ ތެރޭގައި، ރިޔާސީ ޤަރާރުތަކެއް ނެރުއްވައި، ޑޮނަލްޑް ޓްރަމްޕް ވަރުގަދަ ނިންމުންތަކެއް ނިންމަވައިފިއެވެ.
އެމެރިކާގެ 47 ވަނަ ރައީސްކަމުގެ ހުވައި، ޓްރަމްޕް ރޭ ވަނީ ކުރައްވައި، ދުނިޔޭގެ އެންމެ ވަރުގަދަ ބާރު ހިންގެވުމާ ދެވަނަ ދައުރަކަށް ޙަވާލުވެވަޑައިގެންފައެވެ.
ވެރިކަމަށް ވަޑައިގެންނެވުމާ އެކު، ރެއިން ރެއަށް ޓްރަމްޕް ވަނީ ރިޔާސީ ވަޢުދުތައް ފުއްދެވުމުގެ މަސައްކަތް ފައްޓަވައި، ވަރުގަދަ ނިންމުންތަކެއް ނިންމަވައިފައެވެ.
އޭގެތެރެއިން އެންމެ ބޮޑު ނިންމެވުމަކީ، ބޯޑަރު ހުރަސްކޮށް، އެމެރިކާއަށް ޤަވާޢިދާ ޚިލާފަށް އެތެރެވެފައިވާ ބޭރު ޤައުމުތަކުގެ މީހުންނާ ދެކޮޅަށް ނިންމެވި ނިންމެވުމެވެ.
މިގޮތުން، އެމެރިކާ އާއި މެކްސިކޯ ގުޅޭ ދެކުނު ބޯޑަރު ސަރަޙައްދުގައި ކުއްލި ނުރައްކަލުގެ ޙާލަތު އިޢުލާނުކުރައްވައި، އެމެރިކާގައި އުފަންވާ ކުދިންނަށް އޮޓޮމެޓިކުން ރަށްވެހިކަން ދިނުން ހުއްޓުވުމުގެ ޤަރާރު ފާހަގަކޮށްލެވެއެވެ.
އެމެރިކާގެ ޤާނޫނުއަސާސީގެ ދަށުން، އެމެރިކާގައި އުފަންވާ ކުދިންނަށް ރަށްވެހިކަން ދިނުމަކީ މިހާރު އަސާސީ ހައްޤެކެވެ. އެ ހައްޤަށް ހުރަސްއެޅޭ ގޮތަށް ނިންމެވި ނިންމުމުގައި ޤާނޫނީ ހުރަސްތަކެއް ކުރިމަތިވާނެ ކަމަށް މާހިރުން ދަނީ ބުނަމުންނެވެ.
ކެމްޕޭނު ތެރޭގައި، އެންމެ އިސްކަމެއް ދެއްވާނީ އެމެރިކާއަށް ހިފެހެއްޓުމެއް ނެތި އެތެރެވަމުންދާ ބާރު ޤައުމުތަކުގެ މީހުން ހުއްޓުވުން ކަމަށް ވިދާޅުވެފައިވާ ޓްރަމްޕް ވެރިކަމާ ޙަވާލުވެވަޑައިގެންނެވުމާ އެކު، އެމެރިކާއިން ހިމާޔަތް ހޯދުމަށް އެދޭ މީހުންނަށް ކުރީގެ ސަރުކާރުން ހަދާފައިވާ އެޕް ވެސް ވަނީ ޑައުންކޮށްލައިފައެވެ.
އޭގެފަހުން، ވައިޓް ހައުސްގެ ޑެޕިޔުޓީ ޕްރެސް ސެކްރެޓަރީ އެނާ ކެލީ ވަނީ، އެމެރިކާއިން ބޭރު ޤައުމުތަކުގެ މީހުންނަށް ހިމާޔަތް ދިނުން މި ސަރުކާރުން ހުއްޓައިލާނެ ކަން އިޢުލާނުކުރައްވައިފައެވެ.
"ޤަވާޢިދުތަކާ އެއްގޮތަށް ބޭރު ޤައުމުތަކުގެ މީހުން އައުމުގައި އަޅުގަނޑުގެ އެއްވެސް މައްސަލައެއް ނެތް. އެފަދަ މީހުން މި ޤައުމަށް ބޭނުންތެރި. އެކަމަށް މަގުފަހިވެސް ކޮށްދޭނަން. އެކަމަކު، އެއީ ޤަވާޢިދާ އެއްގޮތަށް ވަންނަ މީހުންނަށް ހަދަން ޖެހޭ،" ޓްރަމްޕް ނޫސްވެރިންނަށް ވިދާޅުވިއެވެ.
މީގެއިތުރުން، ޤަވާޢިދާ ޚިލާފަށް އެމެރިކާއަށް އެތެރެވާން މަސައްކަތް ކުރާ މީހުން ވަގުތުން ހުއްޓުވައި، ޤަވާޢިދާ ޚިލާފަށް މިހާރު އެމެރިކާއަށް އެތެރެވެފައިވާ "އެތައް މިލިއަން" ބޭރު ޤައުމުތަކުގެ "ކުށްވެރިން" އަނބުރާ ފޮނުވައިލުމުގެ މަސައްކަތް ފަށާފައިވާ ކަމަށް ޓްރަމްޕް ރޭ ވަނީ ވިދާޅުވެފައެވެ.
ޑިޔުޓީ ބޮޑުކުރުން
ޓްރަމްޕް ރޭ ވަނީ، ކެނެޑާ އަދި މެކްސިކޯ އިން އެމެރިކާއިން އެތެރެކުރާ މުދަލުން ނަގާ ޑިޔުޓީ 25 އިންސައްތަ ބޮޑުކުރައްވާނެ ކަމުގެ އިޝާރާތެއް ދެއްވައިފައެވެ.
ކެނެޑާ އާއި މެކްސިކޯ އާ މެދު ކެމްޕޭނު ތެރޭގައި ވެސް ޓްރަމްޕްގެ ނުރުހުން އަމާޒުކުރެއްވީ، އެމެރިކާއަށް ޤަވާޢިދާ ޚިލާފަށް މީހުން އެތެރެވުމާއި މަސްތުވާތަކެތި އެތެރެކުރުން ހުއްޓުވަން އެ ދެ ޤައުމުން އެކަށީގެންވާ މަސައްކަތެއް ނުކުރާ ކަމަށް ތުހުމަތުކުރައްވައެވެ.
މިގޮތުން، އަންނަ މަހުގެ އެއްވަނަ ދުވަހުން ފެށިގެން، އެ ދެ ޤައުމަށް ޑިޔުޓީ ބޮޑުކުރާނެ ކަމުގެ އިޝާރާތެއް ޓްރަމްޕް ދެއްވިއެވެ.
އެމެރިކާގެ ވިޔަފާރީގެ ސިޔާސަތަށް ގެންނަވާ ބަދަލުތަކުގެ ތެރެއިން، އެހެން ޤައުމުތަކާ ދެކޮޅަށް ވެސް މިފަދަ ބައެއް ފިޔަވަޅުތައް އަޅުއްވާނެ ކަމުގެ އިންޒާރު ޓްރަމްޕް ވަނީ ދެއްވައިފައެވެ.
"އަޅުގަނޑުމެންގެ ރައްޔިތުން އަތުން ޓެކްސް ނަގައިގެން އެހެން ޤައުމުތައް މުއްސަނދިކުރުމުގެ ބަދަލުގައި، ބޭރު ޤައުމުތަކުން ނަގާ ޑިޔުޓީ ބޮޑުކޮށްގެން، އަޅުގަނޑުމެންގެ އަމިއްލަ ރައްޔިތުން މުއްސަނދިކުރާނީ،" މަޤާމުގެ ހުވައި ކުރެއްވުމަށްފަހު، ފުރަތަމަ ފަހަރަށް ޤައުމާ މުޚާތަބު ކުރައްވައި ޓްރަމްޕް ވިދާޅުވިއެވެ.
އަދި ޕެނެމާ ކެނަލް، އަނބުރާ ހޯއްދަވާނެ ކަމުގެ އިންޒާރު ވެސް ޓްރަމްޕް ރޭ ވަނީ ތަކުރާރުކުރައްވައިފައެވެ.
ޓްރަމްޕް ވިދާޅުވި ގޮތުގައި ޕެނަމާ ކެނަލްގައި މިހާރު އޮތީ ޗައިނާގެ ބާރެވެ. އެހެންވެ، ޕެނަމާ ނޫން ބަޔަކު އެތަނަށް ގަދަވާ ނަމަ ތަން އަތުލުން ނޫން ގޮތެއް ނޯންނާނެ ކަމަށް ޓްރަމްޕް ވިދާޅުވެފައިވެއެވެ.
"އެމެރިކާއިން އެތަން ދިނީ ޗައިނާއަކަށް ނޫން، ޕެނަމާއަށް. އެހެންވެ، އެތަން އަނބުރާ އަތުލާނަން،" ޓްރަމްޕް ވިދާޅުވިއެވެ.
ޑަބްލިޔުއެޗްއޯއިން ވަކިވުން
ކޮވިޑް-19 ގެ ބަލިމަޑުކަމުގެ ތެރޭގައި ވެސް ދުނިޔޭގެ ސިއްޙަތު ޖަމްޢިއްޔާއަށް ވަރަށް ބޮޑަށް ފާޑުވިދާޅުވި ޓްރަމްޕް، ރޭ ވަނީ އެ ޖަމްޢިއްޔާއިން އެމެރިކާއިން ވަކިވުމުގެ ޤަރާރުގައި ވެސް ސޮއިކުރައްވައިފައެވެ.
ޓްރަމްޕް ވިދާޅުވި ގޮތުގައި، ޑަބްލިޔުއެޗްއޯއަށް އެމެރިކާއިން ކުރާ ހޭދައާ ގާތްކުރާ މިންވަރަކަށް އެ ޖަމްޢިއްޔާއިން އެމެރިކާއަށް އެހީއެއް ނުވެއެވެ.
ޓްރަމްޕް ވިދާޅުވެފައިވަނީ ޑަބްލިޔުއެޗްއޯ އަށް ކުރާ ހޭދަ ބަދަލުކުރައްވާނީ އެމެރިކާގެ އެތެރޭގެ ސިއްހީ ނިޒާމް ހަރުދަނާކުރުމަށް ކަމަށެވެ.
ޑަބްލިޔުއެޗްއޯ އަށް އެންމެ ބޮޑު ހޭދައެއް ކުރާ އެމެރިކާ އެ ޖަމިއްޔާއިން ވަކިވުމަކީ ބަލިތައް ކޮންޓްރޯލްކުރުމާއި އިމަޖެންސީ ރެސްޕޮންސް ސިސްޓަމްތަކަށް ބުރޫ އަރާނެ ކަމެއްގެ ގޮތުގައި ސިއްޙީ މާހިރުން ވަނީ ސިފަކޮށްފައެވެ.
އަދި ޕެރިސް ކްލައިމެޓް އެގްރީމެންޓުން އެމެރިކާ ދެވަނަ ފަހަރަށް ވަކިވެ، ތެޔޮ އެންދުން އިތުރުކޮށް، އިޤްތިޞާދީ ހަރަކާތްތައް ފުޅާކުރަން ވެސް ޓްރަމްޕް ވަނީ ނިންމަވައިފައެވެ.
މީގެއިތުރުން ވެސް، ޓްރަމްޕް ރޭ ނިންމެވި ބޮޑެތި ނިންމުންތަކުގެ ތެރޭގައި، ފަލަސްތީނުގެ ހުޅަނގު އައްސޭރީގައި ފަލަސްތީނުގެ އާންމުންނާ ދެކޮޅަށް ބޮޑެތި ޖަރީމާތައް ހިންގަމުން ދިޔަ މީހުންނާ ދެކޮޅަށް އެމެރިކާގެ ކުރީގެ ސަރުކާރުން އެޅި ދަތިކުރުމުގެ ފިޔަވަޅުތައް އުވައިލުން ހިމެނެއެވެ.
އަދި ޓްރަމްޕަށް ރިޔާސީ އިންތިޚާބު ނާކާމިޔާބުވެ ވަޑައިގަތުމުން ހިންގި ހަމަނުޖެހުންތަކުގައި، ޤާނޫނު ހަދާ މަޖިލީހަށް ވަދެގަނެ ހަމަނުޖެހުން ހިންގައިގެން ހުކުމް އައި 1،500 މީހުންނަށް ޓްރަމްޕް ވަނީ މާފު ދެއްވައިފައެވެ.
އަންހެނުންނާއި ފިރިހެނުން ފިޔަވައި އިތުރު ޖިންސެއް އޮންނަ ކަމަށް ސަރުކާރުގެ ރަސްމީ ސިޔާސަތުން ބަލައިނުގަންނާނެ ކަމަށް ވެސް ޓްރަމްޕް ރޭ ވަނީ އިޢުލާނުކުރައްވައިފައެވެ.