ޞިއްޙީ ގޮތުން ދުޅަހެޔޮ އާދަތަކަށް ހޭލުންތެރިކުރުމާ ގުޅޭ މަޢުލޫމާތު ދިނުމަށް އަމާޒުކޮށްގެން ބާއްވާ "ހެލްތު އެކްސްޕޯ 2024" މާދަމާ ފެށުމަށް ތައްޔާރުވެއްޖެ އެވެ.

މި އެކްސްޕޯގައި 50 އަށްވުރެ ގިނަ ބައިވެރިން ބައިވެރިވާނެ ކަމަށް މަޢުލޫމާތު ދީފައިވެއެވެ.

ހުޅުމާލޭ ސެންޓްރަލް ޕާކުގައި ދެ ދުވަހުގެ މުއްދަތަށް ކުރިއަށްގެންދާ މި އެކްސްޕޯ ފެށޭނީ މާދަމާރޭ 8:00 ގައެވެ. އެކްސްޕޯ ނިމޭނީ ހުކުރު ދުވަހުގެ ރޭ 11:00 ގައެވެ. ބުރާސްފަތި ދުވަހު އެކްސްޕޯ ހުޅުވިފައި ހުންނާނީ ރޭގަނޑު 8:00 އިން 11:00 އަށެވެ. އަދި ހުކުރު ދުވަހު ހަވީރު 4:00 އިން ފެށިގެން ރޭގަނޑު 11:00 އާ ހަމައަށް އެކްސްޕޯ ކުރިއަށްދާނެއެވެ.

މި އެކްސްޕޯގެ މައިގަނޑު މަޤްޞަދަކީ ދުޅަހެޔޮ މުޖުތަމަޢެއް ބިނާކުރުމަށް ކުރަމުންދާ މަސައްކަތްތަކާއި، ޞިއްޙީ ގޮތުން ދުޅަހެޔޮ އާދަތަކަށް ހޭލުންތެރިކޮށް މަޢުލޫމާތު ދިނުމެވެ. މި އެކްސްޕޯގެ މައި ސްޕޮންސަރަކީ ދިރާގެވެ.

މިނިސްޓްރީ އޮފް ހެލްތުގެ އިތުރުން ހޮސްޕިޓަލްތަކާއި، ޞިއްޙީ ޚިދުމަތްދޭ ތަންތަނުގެ އިތުރުން މަދަނީ ޖަމްޢިއްޔާތަކާއި އަމިއްލަ ފަރާތްތަކުން މި އެކްސްޕޯގައި ބައިވެރިވެ މަޢުލޫމާތު ދޭނެއެވެ.

ކުޑަކުދިންނަށް ވެސް ބައިވެރިވެވޭ ގޮތަށް ރޭވިފައިވާ މި އެކްސްޕޯގައި ކުޑަކުދިންގެ ހެލްތު ޗެކަޕް، މިންހެޔޮ ކާނާއާ ގުޅޭ މަޢުލޫމާތު، ހެދިބޮޑުވުމާ ގުޅޭ މަޢުލޫމާތު، ވެކްސިނޭޝަން އަދި އެހެނިހެން ޞިއްޙީ މަޢުލޫމާތު ފޯރުކޮށްދެވޭނެއެވެ.

މީގެ އިތުރުން، ޞިއްޙީ ދާއިރާއިން މަތީ ތަޢުލީމު ޙާޞިލުކުރަން ބޭނުންވާ ފަރާތްތަކަށް ހުރި ފުރުޞަތުތަކުގެ މަޢުލޫމާތު ފޯރުކޮށްދިނުމާއި މުނިފޫހިފިލުވުމުގެ ގިނަ ހަރަކާތްތައް ވެސް މި އެކްސްޕޯގައި ކުރިއަށްދާނެ އެވެ.