ENGLISH

04 އޭޕްރީލު 2025

Advertisement

އެމެރިކާއަށް "ރަން ޒަމާން" ގެނައުމުގެ ވަޢުދާ އެކު، ޓްރަމްޕް އެނބުރި ވެރިކަމަށް

20 ޖެނުއަރީ 2025

|

ހަސަން އާމިރު

އެމެރިކާގެ 47 ވަނަ ރައީސްކަމުގެ ހުވައި، ޑޮނަލްޑް ޓްރަމްޕް މިރޭ ކުރައްވައިފިއެވެ.

މީގެ ހަތަރު އަހަރު ކުރިން، ދެވަނަ ދައުރަކަށް ކުރިމަތިލައްވައި ނާކާމިޔާބުވެވަޑައިގެންނެވި، ޓްރަމްޕް އަކީ އެފަދަ ނާކާމިޔާބީއަކަށްފަހު، 1890 ވަނަ އަހަރަށް ފަހު، ދެވަނަ ފަހަރަށް ރައީސްކަމުގެ ހުވައި ކުރެއްވި ފުރަތަމަ ރައީސެވެ.

ގަދަފިނީގެ ސަބަބުން އެމެރިކާގެ ޤާނޫނު ހަދާ މަޖިލިސް، ކެޕިޓަލް ބިލްޑިންގެ އެތެރޭގައި، ރައީސްކަމުގެ ހުވާ ކުރެއްވުމަށްފަހު، ފުރަތަމަ ފަހަރަށް ޤައުމާ މުޚާތަބު ކުރައްވައި، ޓްރަމްޕް ވަނީ އެ މަނިކުފާނު ކެމްޕޭނު ތެރޭގައި ވެވަޑައިގެންފައިވާ ވަރުގަދަ ވަޢުދުފުޅުތައް ތަކުރާރުކުރައްވައިފައެވެ.

އެމަނިކުފާނު ވިދާޅުވި ގޮތުގައި، މިއީ އެމެރިކާގެ "ރަން ޒަމާން" އެއް ގެނުވާނެ ދައުރެކެވެ.

ޓްރަމްޕް ވަނީ ނިމުނު ޖޯ ބައިޑެންގެ ވެރިކަމަށް ވަރަށް ބޮޑަށް ފާޑުވިދާޅުވެފައެވެ. މިގޮތުން، ރައްޔިތުންގެ ޖީބުތަކަށް އަތް ބާނައި، ފައިސާ ނަގައިގެން، "ކޮރަޕްޓް" ސަރުކާރުން، ޤައުމުގެ ކަންކަން އޮޔާދާން ދޫކޮށްލާފައިވާ ކަމަށް ޓްރަމްޕް ތުހުމަތުކުރެއްވިއެވެ.

"މި ވަގުތުން ފެށިގެން، އެމެރިކާ ފަހަތަށް ސޮއްސާލާފައިއޮތުން މި ނިމުނީ،" ޓްރަމްޕް ވިދާޅުވިއެވެ.

އުމުރުފުޅުން 78 އަހަރުގެ ޓްރަމްޕަކީ، އެމެރިކާގެ ރައީސްކަމުގެ ހުވާ ކުރެއްވި އެންމެ ދޮށި ބޭފުޅާއެވެ.

އެމެރިކާގެ ބޯޑަރުތައް ހިމާޔަތްކުރުމުގެ ވަރުގަދަ ވަޢުދުފުޅުތަކުގެ މަތީގައި ވެރިކަމަށް ވަޑައިގެންނެވި ޓްރަމްޕް ވަނީ، މެކްސިކޯ އާ ގުޅޭ ދެކުނު ބޯޑަރުގައި ކުއްލި ނުުރައްކަލުގެ ޙާލަތު އިޢުލާނުކުރައްވައި، ޤަވާޢިދާ ޚިލާފަށް އެމެރިކާގައި އުޅެމުންދާ އެތައް މިލިއަން ބޭރު ޤައުމުތަކުގެ މީހުން ޑިޕޯޓުކުރާނެ ކަމުގެ އިންޒާރު ދެއްވައިފައެވެ.

އަދި ޕެނެމާ ކެނަލް، އަނބުރާ ހޯއްދަވާނެ ކަމުގެ އިންޒާރު ވެސް ޓްރަމްޕް މިރޭ ވަނީ ތަކުރާރުކުރައްވައިފައެވެ.

މީގެއިތުރުން، ބޭރު ޤައުމުތަކުން ޓެކްސް ނެގުމަށް ޙާއްސަ އިދާރާއެއް އުފައްދަވާނެ ކަމުގެ ވަޢުދުފުޅު ތަކުރާރުކުރައްވައި، ޓްރަމްޕް ވަނީ، ބޭރު ޤައުމުތަކުން ދޭން ޖެހޭ ހައްޤު އާމްދަނީ ހޯދައި، އެމެރިކާ އަކީ މުއްސަނދި ޤައުމެއްގެ ގޮތުގައި އަލުން ހައްދަވާނެ ކަމަށް ވިދާޅުވެފައެވެ.

ޓްރަމްޕް ރައީސްކަމުގެ ހުވާކުރެއްވުމުގެ ރަސްމިއްޔާތުގައި، އެމެރިކާގެ ކުރީގެ ރައީސުންނާއި، ދުނިޔޭގެ އެންމެ ބޮޑެތި މަހުޖަނުންނާއި ބޭރުގެ ބައެއް ޤައުމުތަކުގެ އިސްވެރިން ބައިވެރިވެވަޑައިގެންނެވިއެވެ.

ކިޔުންތެރިންގެ ހިޔާލު