ENGLISH
26 ނޮވެމްބަރު 2024
"ޤައުމީ ތަރައްޤީގެ ޕްލޭން"ޤައުމު ދަތުރުކުރާނޭ ފަހި މިސްރާބެއް ކަނޑައެޅުމަށް މުހިންމު މަގުޗާޓެއް: ޑރ. އަލީ ޙައިދަރު އަޙުމަދު
06 ނޮވެމްބަރު 2024
|
ޤައުމީ ތަރައްޤީގެ ޕްލޭން"އިފްތިތާޚްކުރުމުގެ ރަސްމިއްޔާތު
އެންމެ މަޤްބޫލު
ކުރިއަށް އޮތް 20 އަހަރަށް އަމާޒުކޮށް އެކުލަވާލާ "ޤައުމީ ތަރައްޤީގެ ޕްލޭން" ވެގެންދާނީ، ޤައުމު ދަތުރުކުރާނެ ފަހި މިސްރާބެއް ކަނޑައެޅުމަށް ނުހަނު މުހިންމު މަގުޗާޓެއް ކަމަށް ގެދޮރުވެރިކަމާ ބިމާއި ޢުމްރާނީ ތަރައްޤީ އާއި ބެހޭ ވަޒީރު ޑރ. އަލީ ޙައިދަރު އަޙުމަދު ވިދާޅުވެއްޖެ އެވެ.
ވަޒީރު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލަފާ ދެއްވާފައިވާ ގޮތުގެ މަތިން، "ޤައުމީ ތަރައްޤީގެ" ޕްލޭން އެކުލަވާލުމުގެ މަސައްކަތުގައި ކަމާބެހޭ ހުރިހާ ފަރާތްތަކާއި، ރައްޔިތުންގެ ބައިވެރިވުމާއި ޚިޔާލާއި މަޝްވަރާ ވީހާވެސް ފުޅާދާއިރާއެއްގައި ހޯދުމަށް ހަމަޖެހިފާވާ ކަމަށެވެ.
"މިއީ ތަރައްޤީ ބައްޓަންކުރުމަށާއި، ޤައުމު ދަތުރުކުރާނޭ ފަހި މިސްރާބެއް ކަނޑައެޅުމަށް ވަރަށް ވެސް މުހިންމު މަގުޗާޓެއް. ދިރިއުޅުމުގެ ހާލަތު ދެނެގަނެ، ދާއިރާތަކަށް ކުރިމަތިވެފައިވާ ގޮންޖެހުންތަކާއި ދަތިތައް ވަޒަންކޮށް، ހެއްކާއި މަޢުލޫމާތުގެ އަލީގައި ކަންކަން އިސްލާހުކޮށް ކުރިއަރުވަން ކުރަންޖެހޭ މަސައްކަތްތައް ޢިލްމީ ނަޒަރަކުން ދެނެގަނެވޭނެ. މިއީ އަންނަން އޮތް ޖީލުތަކަށް ތަނަވަސް، ފުދުންތެރި، އުފާވެރި ދިވެހި ރާއްޖެއެއް ފޯރުކޮށްދިނުމަށް އެޅޭ މުހިންމު ފިޔަވަޅަކަށް " - ގެދޮރުވެރިކަމާ ބެހޭ ވަޒީރު ޑރ. އަލީ ޙައިދަރު އަޙުމަދު
ރާއްޖޭގެ ތަރައްޤީ އާއި ކުރިއެރުން ދެމެހެއްޓުމަށްޓަކައި، ޕްލޭނުގައި ކަނޑައެޅޭ މުހިންމު ސިޔާސަތުތަކާއި، އަމާޒުތަކާއި، އިސްތިރާޖުތަކާއި، ލަނޑުދަނޑިތައް ހާސިލުކުރުމަށް މަގުފަހިކުރުމުގެ ގޮތުން، މި ޕްލޭނަށް ޤާނޫނީ ބާރުވެރިކަން ގެނެސްދޭނެ ޤައުމީ ތަރައްޤީގެ ޤާނޫނުގެ ބިލެއް މި މަސައްކަތުގެ ތެރޭގައި އެކުލަވާލާ ރައްޔިތުންގެ މަޖިލީހަށް ހުށަހަޅާނެކަމަށް ވަޒީރު ވިދާޅުވި އެވެ. އަދި، މި ޕްލޭން ދެމެހެއްޓެނިވި ގޮތެއްގައި ތަންފީޒު ކުރުމަށް ބޭނުންވާ އިތުރު ބާރުވެރިކަން ގެނައުމަށްޓަކައި، ޤާނޫނު އަސާސީއަށް މާއްދާއެއް އިތުރުކުރުމަށް ވެސް ވަނީ ނިންމަވައިފައެވެ.
"ރާއްޖޭގެ އެކިކަންކޮޅުތަކުން، މުޖުތަމަޢުގެ ހުރިހާ ފަރާތްތަކާ ފުޅާދާއިރާއެއްގައި މިކަމުގެ މަޝްވަރާ ނުލިބި އެކުލަވާލާ ތަޞައްވުރެއް ފުރިހަމައެއް ނުވާނެ. ދިވެހި ރާއްޖޭގެ ކުރިމަގު ބައްޓަންކުރުމަށް ސަރުކާރާއި ދައުލަތުގެ މުއައްސަސާތަކުގެ އިތުރުން ލޯކަލް ކައުންސިލްތަކާއި، އަމިއްލަ ފަރާތްތަކާއި، މަދަނީ ޖަމްއިއްޔާތަކާއި، ތައުލީމީ ދާއިރާގެ އެކިފަރާތްތަކާއި، ރާއްޖޭގެ މަސައްކަތްތެރިންނާއި، ސިޔާސީޕާޓީތަކާ އަދި މާދަމާގެ ލީޑަރުންނަށް ވާންތިބި ޒުވާނުންނާއި ކުޑަކުދިންގެ ޚިޔާލާއި މަޝްވަރާ މި މަސައްކަތަށް ވަރަށް މުހިންމު " - ގެދޮރުވެރިކަމާ ބެހޭ ވަޒީރު ޑރ. އަލީ ޙައިދަރު އަޙުމަދު
ވަޒީރު ވިދާޅުވީ މި މަސައްކަތަކީ އަދަށްވުރެ ހުރިހާގޮތަކުން ވެސް ފަހި ތަނަވަސް އުފާވެރި ދިވެހިރާއްޖެއަކަށް ވާސިލްވުމަށް ފައްޓަވަ މަސައްކަތެއްކަމަށެވެ.
