ENGLISH
04 އޭޕްރީލު 2025
ޣައްޒާގެ ސިއްޙީ ނިޒާމު އަލުން ކޮޅަށް ޖަހަން، އެއްވެސް ހުރަހެއް ނެތި އެހީ ވެއްދުމުގެ ފުރުޞަތު ދޭން ޑަބްލިޔުއެޗްއޯއިން ގޮވާލައިފި
20 ޖެނުއަރީ 2025
|
އެންމެ މަޤްބޫލު
ފަލަސްތީނުގެ ޣައްޒާގައި ހަނގުރާމަ ހުއްޓާލުމާއި ރަހީނުކޮށްފައިވާ މީހުން މިނިވަންކުރުމުގެ އެއްބަސްވުމަށް ޢަމަލުކުރަން ފަށާފައިވާއިރު، ޣައްޒާއަށް ކޮންމެހެން ބޭނުންވެފައިވާ ސިއްޙީ އެހީ ވެއްދުމުގެ ފުރިހަމަ ފުރުޞަތު ދިނުމަށް، ދުނިޔޭގެ ސިއްޙަތު ޖަމްޢިއްޔާ، ޑަބްލިޔުއެޗްއޯއިން އިޒްރޭލަށް ގޮވާލައިފިއެވެ.
ފާއިތުވި 15 މަސް ދުވަހުގެ ތެރޭގައި ޣައްޒާގެ ސިއްޙީ މަރުކަޒުތަކަށް ސީދާ އަމާޒުކޮށް އިޒްރޭލުން ވަނީ ތަކުރާރުކޮށް ޙަމަލާދީފައެވެ. އޭގެސަބަބުން، ޣައްޒާގެ ގިނަ ހޮސްޕިޓަލުތަކަށް ބޮޑެތި ގެއްލުންތައް ލިބި، ވަނީ ނުހިންގޭ ހިސާބަށް ވެއްޓިފައެވެ.
ޑަބްލިޔުއެޗްއޯގެ ވެރިޔާ، ޓެޑްރޯސް އަދަނޮމް ގެބްރެޔެސަސް ވަނީ ޣައްޒާގެ ސުލްޙައިގެ އެއްބަސްވުމަށް ރެއިން ފެށިގެން ޢަމަލުކުރަން ފަށާފައިވާތީ، އެކަމަށް މަރުޙަބާ ވިދާޅުވެފައެވެ.
ނަމަވެސް، އިޒްރޭލުގެ ޙަމަލާތަކުން ފުނޑާލާފައި އޮތް ޣައްޒާގެ ސިއްޙީ ނިޒާމު އަލުން ކޮޅަށް ޖަހަން، ސިއްޙީ އާލަތްތަކާއި ބޭސް ފަދަ ތަކެތި ވެއްދުމުގެ ބޮޑު މަސައްކަތެއް ކުރަންޖެހޭ ކަން އޭނާ ފާހަގަކުރެއްވިއެވެ.
އެ މަސައްކަތް ކުރުމަށް ޑަބްލިޔުއެޗްއޯއިން ތައްޔާރަށް އޮތް ނަމަވެސް، އެކަން ކުރެވޭނީ، ޣައްޒާގައި މީހުން ދިރިއުޅޭ ހުރިހާ ސަރަޙައްދުތަކަށް، އެއްވެސް ހުރަހެއް ނެތި އެހީ ވެއްދުމުގެ ފުރުޞަތު ދީގެން ކަމަށް ގެބްރެޔެސަސް ވިދާޅުވިއެވެ.
ފަލަސްތީނުގެ ޣައްޒާގައި ހަނގުރާމަ ހުއްޓައިލުމުގެ އެއްބަސްވުމަށް ޢަމަލުކުރަން ފަށައި، ޙަމާސް ޖަމާޢަތުން ރަހީނުކޮށްފައިވާ އިޒްރޭލުގެ މީހުންނާއި، އިޒްރޭލުގެ ޖަލުތަކުގައި ބަންދުކޮށްފައިތިބި ފަލަސްތީނުގެ ޤައިދީން މިނިވަންކުރަން ވަނީ ފަށައިފައެވެ.
ރަހީނުން މިނިވަންކުރިތާ ކުޑަވަގުތުކޮޅެއްގެ ތެރޭގައި، އިޒްރޭލުން ވަނީ ޣައްޒާއަށް އެހީ ވައްދަން އޮންނަ މަގުތައް ހުޅުވާލައިފައެވެ. އެއާ އެކު، ކާބޯތަކެއްޗާއި، ބޭސް އަދި ތެޔޮ ހިފައިގެން، ގިނަ އަދަދެއްގެ ޓްރަކުތައް، ރަފާޙް ބޯޑަރު ހުރަސްކޮށް، ޣައްޒާއަށް ދަނީ ވަންނަމުންނެވެ.
ޣައްޒާއަށް ޔަހޫދީ ފައުޖުން ޙަމަލާތައް ދެމުން އަންނަތާ 15 މަސް ދުވަސް ވެފައިވާއިރު، އެ ޙަމަލާތަކުގައި ޝަހީދުވި ފަލަސްތީނުގެ މަޢުސޫމް މީހުންގެ ޢަދަދު މިހާރު 46،000 އާ ވަނީ ގާތްވެފައެވެ.