ފަލަސްތީނުގެ ޣައްޒާގައި ހަނގުރާމަ ހުއްޓައިލުމުގެ އެއްބަސްވުމަށް ޢަމަލުކުރަން ފަށައި، ޙަމާސް ޖަމާޢަތުން ރަހީނުކޮށްފައިވާ އިޒްރޭލުގެ މީހުންނާއި، އިޒްރޭލުގެ ޖަލުތަކުގައި ބަންދުކޮށްފައިތިބި ފަލަސްތީނުގެ ޤައިދީން މިނިވަންކުރަން ފަށައިފިއެވެ.

ރެއިން ފެށިގެން އެއްބަސްވުމަށް ޢަމަލުކުރަން ފަށާފައިވާއިރު، މި އެއްބަސްވުމުގެ ފުރަތަމަ ފިޔަވަހީގެ ދަށުން، ޙަމާސް އިން ވަނީ ރަހީނުކޮށްފައި ތިބި މީހުންގެ ތެރެއިން ތިން އަންހެނަކު މިނިވަންކޮށްފައެވެ. އޭގެ ބަދަލުގައި އިޒްރޭލުގެ ޖަލުތަކުގައި ތިބި ޤައިދީންގެ ތެރެއިން 90 މީހަކު ރޭގެ ވަގުތެއްގައި ވަނީ މިނިވަންކޮށް، އަނބުރާ ފަލަސްތީނާ ޙަވާލުކޮށްފައެވެ.

ފަނަރަ މަސް ދުވަހު ރަހީނުކޮށްފައި ތިބި ތިން އަންހެނުން މިނިވަން ކުރުމާ އެކު، އެ މީހުން ވަނީ ހޮސްޕިޓަލަށް ގެންގޮސްފައެވެ. އެ ތިން މީހުން ޙާލު ރަނގަޅު ކަމަށް ހޮސްޕިޓަލާ ޙަވާލާދީ އޮފިޝަލުން ބުނެފައިވެއެވެ. އެއްބަސްވުމުގެ ފުރަތަމަ ފިޔަވަހީގެ ދަށުން 33 ރަހީނުން މިނިވަންކުރަން ހަމަޖެހިފައިވާއިރު، އިޒްރޭލުގެ ޖަލުތަކުން 1،900 އެއްހާ ފަލަސްތީނުގެ ޤައިދީން މިނިވަންކުރާނެ ކަމަށް މަޢުލޫމާތު ލިބިފައިވެއެވެ.

އެއްބަސްވުމަށް ޢަމަލު ކުރަން ފެށުމާ އެކު، އިޒްރޭލުގެ ޙަމަލާތަކުގެ ސަބަބުން ގެދޮރު ދޫކޮށް ދާން މަޖުބޫރުވި އެތައް ހާސް ބަޔަކު، އެ މީހުންގެ ގެތަކަށް އެނބުރި ދާން ފަށާފައިވާ ކަމަށް ރިޕޯޓުތައް ބުންޏެވެ.

ރަހީނުން މިނިވަންކުރިތާ ކުޑަ ވަގުތުކޮޅެއްގެ ތެރޭގައި، އިޒްރޭލުން ވަނީ ޣައްޒާއަށް އެހީ ވައްދަން އޮންނަ މަގުތައް ހުޅުވާލައިފައެވެ. އެއާ އެކު، ކާބޯތަކެއްޗާއި، ބޭސް އަދި ތެޔޮ ހިފައިގެން، ގިނަ އަދަދެއްގެ ޓްރަކުތައް، ރަފާޙް ބޯޑަރު ހުރަސްކޮށް، ޣައްޒާއަށް ދަނީ ވަންނަމުންނެވެ.

މަޝްވަރާތަކުގެ ތަފްޞީލު އެނގޭ އެކި މަސްދަރުތަކުން ލިބޭ މަޢުލޫމާތުތަކަށް ބަލާއިރު، މި އެއްބަސްވުން ވަނީ ތިން ފިޔަވައްސަކަށް ބަހާލައިފައެވެ.

ރަހީނުންނާއި ޤައިދީން މިނިވަންކުރުމުގެ އިތުރުން، ޣައްޒާގައި މީހުން އެންމެ ގިނައިން ދިރިއުޅޭ ސަރަޙައްދުތަކުން އިޒްރޭލު ސިފައިން ފައިބާނެއެވެ.

ދެވަނަ އަދި ތިންވަނަ ފިޔަވަހީގެ މަޝްވަރާތައް ފަށާނީ، ފުރަތަމަ ފިޔަވަހީގެ 16 ވަނަ ދުވަހުން ފެށިގެންނެވެ.

ދެވަނަ ފިޔަވަހީގައި، ޣައްޒާގައި ދާއިމީކޮށް ޙަމަލާތައް ހުއްޓާލައި، ބާކީ ތިބި ރަހީނުންނާއި ޤައިދީން ވެސް މިނިވަންކުރާނެއެވެ.

މީގެއިތުރުން، ޣައްޒާގެ ހުރިހާ ސަރަޙައްދުތަކުން އިޒްރޭލު ސިފައިން ފޭބުން ވެސް މި ފިޔަވަހީގައި ހިމެނޭނެއެވެ.

މި އެއްބަސްވުމުގެ ތިންވަނަ ނޫނީ ފަހު ފިޔަވަހީގެ ދަށުން، ޣައްޒާގައި ސުންނާފަތިވެފައިވާ ޢިމާރާތްތަކާއި ވަޞީލަތްތައް އަލުން އިމާރާތްކޮށް އިޔާދަކުރުމުގެ މަސައްކަތް ފެށޭނެއެވެ.