ދެކުނު ކޮރެޔާގެ ރައީސްކަމުގެ މަޤާމުން އަޒުލުކޮށްފައިވާ ޔޫން ސުކް ޔެއޯލްގެ ބަންދުގެ މުއްދަތު އިތުރުކުރަން ކޯޓުން އަމުރުކުރުމާ އެކު، އެ މަނިކުފާނުގެ އެތައް ސަތޭކަ ސަޕޯޓަރުން ކޯޓު ތެރެއަށް ވަދެގެންފިއެވެ.

ދެ ފަހަރެއްގެ މަތިން ކޯޓުން ނެރެފައިވާ އަމުރު ތަންފީޒުކޮށް، ޔޫން ހައްޔަރުކުރުމަށް ތަހުޤީޤީ ޓީމުން ކުރި މަސައްކަތަށް، އެ މަނިކުފާނުގެ ސެކިޔުރިޓީ ބަލަހައްޓާ ސިފައިން ވަނީ ހުރަސްއަޅައިފައެވެ.

އެ އަމުރު ތަންފީޒުކުރަން ޕްރޮސެކިޔުޓަރުން ދިޔުމުން، އެ މަނިކުފާނު ދިރިއުޅުއްވާ ގެކޮޅު ވަށައިގެން ސިފައިން ވަނީ ބަންދުކޮށްފައެވެ.

ނަމަވެސް، އެތައް ސަތޭކަ ފުލުހުންނާއި ދެކުނު ކޮރެޔާގެ ތަހުޤީޤީ އިދާރާ، ކޮރަޕްޝަން އިންވެސްޓިގޭޝަން އޮފީސްގެ އޮފިޝަލުން ވަނީ މިދިޔަ ބުދަ ދުވަހު ޔޫންގެ ގެކޮޅަށް ވަދެ، އެ މަނިކުފާނު ހައްޔަރުކޮށްފައެވެ.

ޔޫންގެ ބަންދު މުއްދަތު އިތުރުކުރަން ބޭއްވި އަޑުއެހުމާ ދިމާކޮށް، އެ މަނިކުފާނަށް ތާއީދުކުރާ އެތައް ހާސް ބަޔަކު ކޯޓު ދޮށަށް އެއްވިއެވެ.

އަދި ބަންދުގެ މުއްދަތު އިތުރުކުރަން ހުކުމް ކުރުމާއެކު، އޭގެ ތެރެއިން ގިނަ ބަޔަކު ވަނީ، ކުޑަދޮރުތަކާއި ދޮރުތައް ފަޅާލައި، ކޯޓުގެ އެތެރެއަށް ވަދެގެންފައެވެ.

އެތަނުގައި ތިބި ފުލުހުންނާ ބޮޑެތި ކުރިމަތިލުންތައް ހިނގައި، އެތައް ބަޔަކު ހައްޔަރުކޮށްފައިވާ ކަމަށް މަންޒަރު ދުށް ބައެއް ނޫސްވެރިން ރިޕޯޓުކޮށްފައިވެއެވެ.

މި ހަމަނުޖެހުން ހިނގުމުގެ ކުރިން، ކޯޓުން ވަނީ ހެކި ނައްތާލަފާނެ ކަމުގެ ފުރުޞަތު އޮތް ކަމަށް ބުނެ، އިތުރު 20 ދުވަހަށް ޔޫން ބަންދުގައި ބަހައްޓަން އަމުރެއް ނެރެދީފައިވާ ކަމަށް، ކޯޓުގެ އޮފިޝަލަކު އޭއެފްޕީ ނޫހަށް ބުންޏެވެ.

ބަންދުގެ މުއްދަތު އިތުރުކުރުމަކީ އިންސާފެއް ނޫން ކަމަށްވިޔަސް، މަސްރަޙް އިތުރަށް ހޫނުކުރުމަކީ ޔޫން އެދިވަޑައިގެންނަވާނެ ކަމަށް ނޫން ކަމަށް އެ މަނިކުފާނުގެ ވަކީލު ވަނީ ސަޕޯޓަރުންނަށް އިލްތިމާސްކޮށްފައެވެ.

ދެކުނު ކޮރެއާގައި ކުއްލި ޙާލަތު ޔޫން އިޢުލާނު ކުރެއްވި މައްސަލާގައި، ޤާނޫނު ހަދާ މަޖިލީހުގެ އަޣުލަބިއްޔަތުން އެ މަނިކުފާނުގެ މައްޗަށް އިތުބާރު ނެތް ކަމަށް ފާސްކުރީ މިދިޔަ މަހުގެ 13 ވަނަ ދުވަހުއެވެ.

ދެކުނު ކޮރެޔާގެ ޤާނޫނުއަސާސީގެ ދަށުން ރައީސްކަމުން އަޒުލުކުރިޔަސް، އެކަމާ މެދު ފަހު ބަސް ބުނާނީ ދެކުނު ކޮރެޔާގެ ދުސްތޫރީ ކޯޓުންނެވެ.

އެ ކޯޓުން ވަނީ، ޖެނުއަރީ 14 އިން ފެށިގެން ފެބްރުއަރީ 4 އާ ދެމެދު ފަސް އަޑުއެހުމެއް ތާވަލުކޮށްފައެވެ.

މި މައްސަލައިގައި ގޮތެއް ނިންމަން ކޯޓަށް 180ގެ މުއްދަތެއް ލިބޭނެއެވެ.

ޔޫންގެ މައްޗަށް ހަމަނުޖެހުން ނަގާލުމާއި ފިތުނަ އުފެއްދުމުގެ ދަޢުވާ އުފުލާފައިވާއިރު، މިއީ ދެކުނު ކޮރެޔާގައި މަރުގެ އަދަބު ދެވޭނެ ފަދަ ކުށެކެވެ.