އީރާނުގެ ސުޕްރީމް ކޯޓުގެ ދެ ފަނޑިޔާރުންނަށް ބަޑިން ޙަމަލާދީ، އަވަހާރަކޮށްލައިފިއެވެ.

އެ ދެ ފަނޑިޔާރުންނަށް ޙަމަލާ ދިނުމަށްފަހު، ޙަމަލާދިން މީހާ އަމިއްލަ ގަޔަށް ބަޑައިޖަހައި، އަމިއްލައަށް މަރުވެފައިވާ ކަމަށް އީރާނުގެ ޖުޑީޝަރީން ނެރުނު ބަޔާނެއްގައި ބުންޏެވެ.

ނަމަވެސް، އެ ޙަމަލާ ދިން ސަބަބެއް އަދި ސާފު ނުވާ ކަމަށް ބުނެފައިވެއެވެ.

ޙަމަލާދިން މީހާ އަކީ ސުޕްރީމް ކޯޓުގައި މި ވަގުތު އޮތް އެއްވެސް މައްސަލައެއްގައި ޝާމިލުވާ މީހެއް ކަމެއް މިހާތަނަށް ބެލި ބެލުމުން އެނގެން ނެތް ކަމަށް ވެސް ބުންޏެވެ.

މި ޙަމަލާގައި އަވަހާރަކޮށްލާފައިވަނީ، ސުޕްރީމް ކޯޓުގެ ވަރަށް ސީނިއަރ ދެ ފަނޑިޔާރުން ކަމަށްވާ ޢަލީ ރަޒިނީ އާއި މުޙައްމަދު މޮގީސޭ އެވެ.

އެ ދެ ފަނޑިޔާރުންނަކީ ވެސް ޤައުމީ ސަލާމަތާއި، ޖާސޫސު ކުރުމާއި ޓެރަރިޒަމާ ދެކޮޅަށް ވަރަށް ފާޅުގައި މަސައްކަތް ކުރެއްވި ދެ ބޭފުޅުން ކަމަށް ޖުޑީޝަރީން ބުންޏެވެ.

އީރާނުގެ ރައީސް މަސްޢޫދު ޕީޒިޝްކިޔާން ވަނީ މި "ފިނޑި އަދި ޓެރަރިސްޓު ޙަމަލާ" އަވަހަށް ތަހުޤީޤުކުރަން ސަލާމަތީ ބާރުތަކަށް ގޮވާލައްވައިފިއެވެ.