ފަލަސްތީނުގެ ޣައްޒާގައި ހަނގުރާމަ ހުއްޓާލުމާއި ރަހީނުކޮށްފައިވާ މީހުން މިނިވަންކުރުމުގެ އެއްބަސްވުމަށް ޢަމަލުކުރަން މިއަދު ފެށުމާ ދިމާކޮށް، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަރުގަދަ އިންޒާރެއް ދީފިއެވެ.

އެއްބަސްވުމަށް ޢަމަލުކުރަން ތައްޔާރުވެފައިވަނިކޮށް، ޓީވީތައް މެދުވެރިކޮށް ނަތަންޔާހޫ ބުނީ، ޙަމަލާތައް ހުއްޓައިލަނީ ވަގުތީ ގޮތުން ކަމަށާއި، ހަނގުރާމަ އަލުން ފެށުމުގެ އިޚްތިޔާރު އަދިވެސް ނުގެއްލޭ ކަމަށެވެ.

އަދި ފާއިތުވި 15 މަސް ދުވަހު، ޙަމާސް ޖަމާޢަތް ބަލިކަށިކޮށްލައި، އެ ޖަމާޢަތުގެ ލީޑަރު ޔަޙްޔާ ސިންވާރު އަވާހަރަކޮށްލުން، ބޮޑު ކާމިޔާބީއެއްގެ ގޮތުގައި ޔަހޫދީންގެ ލީޑަރު ސިފަކުރިއެވެ.

"މުޅި މެދުއިރުމަތީގެ މޫނުމަތި ބަދަލުކޮށްލެވިއްޖެ،" ޙަމާސް މުޅިން ބާކިވެއްޖެ ކަމަށް ސިފަކޮށް، އޭނާ ބުންޏެވެ.

ޙަމަލާތައް ހުއްޓައިލުމުގެ އިތުރުން ޙަމާސްއިން ރަހީނުކޮށްފައިވާ އިޒްރޭލުގެ ގިނަ އަދަދެއްގެ މީހުން، މި އެއްބަސްވުމުގެ ފުރަތަމަ ފިޔަވަހީގެ ދަށުން މިނިވަންކުރާނެއެވެ.

އޭގެ ބަދަލުގައި އިޒްރޭލުގެ ޖަލުތަކުގައި ތިބި ފަލަސްތީނުގެ ޤައިދީންގެ ތެރެއިން، މިނިވަންކުރާ މީހުންގެ ލިސްޓެއް އިޒްރޭލުގެ ޖަސްޓިސް މިނިސްޓްރީން ވަނީ އާންމުކޮށްފައެވެ.

މިގޮތުން، މިނިވަންކުރާ 95 ޤައިދީންގެ ތެރޭގައި، 69 އަންހެނުންނާއި 10 ކުޑަކުދިން ހިމެނެއެވެ.

މަޝްވަރާތަކުގެ ތަފްޞީލު އެނގޭ އެކި މަސްދަރުތަކުން ލިބޭ މަޢުލޫމާތުތަކަށް ބަލާއިރު، މި އެއްބަސްވުން ވަނީ ތިން ފިޔަވައްސަކަށް ބަހާލައިފައެވެ.

ރަހީނުންނާއި ޤައިދީން މިނިވަންކުރުމުގެ އިތުރުން، ޣައްޒާގައި މީހުން އެންމެ ގިނައިން ދިރިއުޅޭ ސަރަޙައްދުތަކުން އިޒްރޭލު ސިފައިން ފައިބާނެއެވެ. އަދި ޣައްޒާއަށް އެހީ ވައްދަން މިހާރު އަޅާފައިހުރި ހުރަސްތައް ވެސް އިޒްރޭލުން ނިމުމަކަށް ގެންނާނެއެވެ.

ދެވަނަ އަދި ތިންވަނަ ފިޔަވަހީގެ މަޝްވަރާތައް ފަށާނީ، ފުރަތަމަ ފިޔަވަހީގެ 16 ވަނަ ދުވަހުން ފެށިގެންނެވެ.

ދެވަނަ ފިޔަވަހީގައި، ޣައްޒާގައި ދާއިމީކޮށް ޙަމަލާތައް ހުއްޓާލައި، ބާކީ ތިބި ރަހީނުންނާއި ޤައިދީން ވެސް މިނިވަންކުރާނެއެވެ.

މީގެއިތުރުން، ޣައްޒާގެ ހުރިހާ ސަރަޙައްދުތަކުން އިޒްރޭލު ސިފައިން ފޭބުން ވެސް މި ފިޔަވަހީގައި ހިމެނޭނެއެވެ.

މި އެއްބަސްވުމުގެ ތިންވަނަ ނޫނީ ފަހު ފިޔަވަހީގެ ދަށުން، ޣައްޒާގައި ސުންނާފަތިވެފައިވާ ޢިމާރާތްތަކާއި ވަޞީލަތްތައް އަލުން އިމާރާތްކޮށް އިޔާދަކުރުމުގެ މަސައްކަތް ފެށޭނެއެވެ.

ޣައްޒާއަށް ޔަހޫދީ ފައުޖުން ޙަމަލާތައް ދެމުން އަންނަތާ 15 މަސް ދުވަސް ވެފައިވާއިރު، އެ ޙަމަލާތަކުގައި ޝަހީދުވި ފަލަސްތީނުގެ މަޢުސޫމް މީހުންގެ ޢަދަދު މިހާރު 46،000 އާ ވަނީ ގާތްވެފައެވެ.