ރައީސުލްޖުމްހޫރިއްޔާގެ އެންމެ ބޮޑު އެއް އަމާޒަކީ ރާއްޖޭގެ އިގްތިޞާދު ވެއްޓެމުންދިޔަ ފުން އަނދަވަޅުން ސަލާމަތްކުރުންކަމަށް  ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަޠީފް ވިދާޅުވެއްޖެއެވެ.

ނައިބް ރައީސް މިހެން ވިދާޅުވީ، "ހަށިހެޔޮ ރާއްޖެ" ޕްރޮގްރާމް ފެށުމަށްޓަކައި ކުޅުދުއްފުށި ސިޓީގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.

ނައިބް ރައީސް ވިދާޅުވީ މިއަދު އިގްތިޞާދު ކުރިއެރުވުމަށް ކާމިޔާބުމަސައްކަތްތަކެއް ފެށ،ި ކަންކަން ހަމަމަގަށް އެޅެމުންދާ މަންޒަރު ފެންނަކަމަށް ކަމަށެވެ.

އެމަނިކުފާނުގެ ވާހަކަފުޅުގައި އިޤްތިޞާދަށް ދިރުން އަންނަ މިންވަރަކުން ރަށްރަށުގައި މިހާރު ނުނިމި ހުރި މަޝްރޫޢުތައް ނިންމުމާއި، އައު މަޝްރޫޢުތައް ފެށުންވެސް ކުރިއަށްދާނެ ކަމަށް ވިދާޅުވިއެވެ. އޭގެ ތެރޭގައި ކުޅިވަރުގެ ވަޞީލަތްތައް ޤާއިމްކުރުން ހިމެނޭކަން ނައިބު ރައީސް ފާހަގަކުރެއްވިއެވެ.

ނައިބް ރައީސް ވިދާޅުވީ ޤައުމު މި ދަނޑިވަޅު އޮންނަން ޖެހުނު ހާލަތަކީ ރައްޔިތުންގެ ފައިދާ ނަހަމަގޮތުގައި ބަޔަކު ހިފުމުގެ ސަބަބުންކަމަށެވެ. އެހެން ނަމަވެސް މިހާރު ޤައުމަށް އާމްދަނީ ލިބޭނެ އެތައް މަގެއް ފަހިވަމުންދާކަން ނައިބުރައީސް ވަނީ ފާހަގަކުރައްވާފައެވެ. އެހެންކަމުން ރައްޔިތުންނަށް އުފާވެރި އަދި ފާގަތި ދުވަސްތަކެއް ކުރިއަށްއޮތްތަކުގައި އަދުގެ ސަރުކާރުން ހޯދައިދޭނެކަމަށް އެމަނިކުފާނު ވިދާޅުވިއެވެ.

"ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ޤައުމަށް އިޚުލާސްތެރި ތެދުވެރި ބޭފުޅެއް. އެމަނިކުފާނުގެ ވަޢުދުފުޅާއެއްގޮތަށް ކުޅިވަރުގެ ވަޞީލަތްތައް ޤާއިމްކޮށްދޭނެ. އެ އެކަންކުރުމުގެ މަސައްކަތްތައް ދަނީ ކުރަމުން. އުއްމީދަކީ އަންނައަހަރުގެ ތެރޭގައި މިކަންކަން ރައްޔިތުންނާ ހަމައަށް ފޯރުކޮށްދިނުން. 5 އަހަރުގެ ދައުރަކަށް މެންޑޭޓް ދެއްވާފައި އެއޮތީ" ނައިބު ރައީސް ވިދާޅުވިއެވެ.