ޚިޔާނާތުގެ ކުށް ސާބިތުވާ ކަމަށް ކަނޑައަޅައި، ޕާކިސްތާނުގެ ކުރީގެ ބޮޑުވަޒީރު އިމްރާން ޚާން އިތުރު 14 އަހަރަށް ޖަލަށްލާން ޙުކުމްކޮށްފިއެވެ.

ކުރީގެ ބޮޑުވަޒީރު އިމްރާން ޚާން މަޤާމުން ދުރުކޮށް، މިދިޔަ އަހަރުގެ މެއި މަހު ހައްޔަރުކުރީ، ޕާކިސްތާނުގެ ބާރުގަދަ އަސްކަރީ ލީޑަރުންނާ ދެކޮޅަށް ފެއްޓެވި ވަރުގަދަ ކެމްޕޭނާ ގުޅިގެން ޚިޔާނާތުގެ ތުހުމަތުގައެވެ.

އޯގަސްޓު 2023 ވަނަ އަހަރުން ފެށިގެން ބަންދުކޮށްފައި ހުންނެވި އިމްރާން ޚާނަށް 14 އަހަރުގެ ޖަލު ޙުކުމެއް އިއްވާފައިވަނީ، އެ މަނިކުފާނު ހިންގަވައި އަލް ޤާދިރު ޔުނިވަރސިޓީ ޕްރޮޖެކްޓް ޓްރަސްޓުގެ ފައިސާތަކަކަށް ޚިޔާނަތްތެރިވި މައްސަލައެއްގައެވެ.

މި މައްސަލައިގައި، ޚާންގެ އަނބިކަނބަލުން ބުޝްރީ ބީބީ، ހަތް އަހަރަށް ޖަލަށް ލާން ވަނީ ހުކުމްކޮށްފައެވެ.

މި ދަޢުވާތަކަކީ ސިޔާސީ މަސައްކަތުން ފެޔަށް ޖެހިވަޑައިގަތުމަށް ޕްރެޝަރު ކުރުމުގެ ގޮތުން ކޮށްފައިވާ ދަޢުވާތަކެއް ކަމަށް ޚާންގެ ވަކީލު ދަނީ ތަކުރާރުކޮށް ބުނަމުންނެވެ.