ENGLISH
04 އޭޕްރީލު 2025
ހަނގުރާމަ ހުއްޓައިލުމުގެ އުފާފާޅުކުރަނިކޮށް، ޣައްޒާއަށް އިޒްރޭލުން ބޮން އަޅައި، 82 މީހަކު ޝަހީދުކޮށްލައިފި
17 ޖެނުއަރީ 2025
|
އެންމެ މަޤްބޫލު
ފަލަސްތީނުގެ ޣައްޒާގައި ހަނގުރާމަ ހުއްޓާލުމާއި ރަހީނުކޮށްފައިވާ މީހުން މިނިވަންކުރުމަށް އިޒްރޭލާއި ޙަމާސް ޖަމާޢަތުން އެއްބަސްވެފައިވާ ކަމަށް އިޢުލާނުކުރިފަހުން، އިޒްރޭލުން ޣައްޒާއަށް ބޮން އަޅައި، 82 މީހަކު ޝަހީދުކޮށްލައިފިއެވެ.
ސުލްޙައިގެ މި މަޝްވަރާތަކުގައި އެންމެ އިސް ދައުރެއް އަދާކުރި ޤަތަރުގެ ބޮޑުވަޒީރު ޝެއިޚް މުޙައްމަދު ބިން ޢަބްދުއްރަޙްމާން ބިން ޖާސިމް އަލް ތަހާނީ، ނޫސްވެރިންގެ ބައްދަލުވުމެއްގައި ވިދާޅުވީ، ޙަމަލާތައް ހުއްޓައިލުމުގެ މި އެއްބަސްވުމަށް އަންނަ އާދީއްތަ ދުވަހުން ފެށިގެން ޢަމަލު ކުރަން ފަށާނެ ކަމަށެވެ.
ޙަމަލާތައް ހުއްޓައިލުމުގެ އުފާފާޅުކުރަން ޣައްޒާގައި އެތައް ބަޔަކު ޖަމާވުމަށްފަހު ގެއަށް އެނބުރި އައި ވަގުތު، އިޒްރޭލުން ވަނީ ޑްރޯނާއި މިސައިލް ޙަމަލާތައް ޣައްޒާގެ މީހުން ދިރިއުޅޭ ސަރަޙައްދުތަކަށް އަމާޒުކޮށްފައެވެ.
މިއާއެކު، އާދިއްތަ ދުވަހު އެއްބަސްވުމަށް ޢަމަލުކުރަން ފެށުމުގެ ކުރިން، އިޒްރޭލުން ޣައްޒާއަށް ދެމުންދާ ޙަމަލާތައް އިތުރަށް ވަރުގަދަކުރާނެ ކަމުގެ ބިރު ވަނީ ހީވެފައެވެ.
މި އެއްބަސްވުމުގައި ހިމެނޭ ޝަރުތުތަކަށް އެއްބަސްވެފައިވާ ކަމަށް ޙަމާސް ޖަމާޢަތުގެ އިތުރުން އިޒްރޭލުން ވެސް މިހާރު ވަނީ ރަސްމީކޮށް ބުނެފައެވެ.
ހަނގުރާމައަށް 15 މަސް ދުވަހަށް ވުރެ ގިނަ ދުވަސްވެފައިވާއިރު، މުޅި ޣައްޒާ ސުންނާފަތިވި، ފަލަސްތީނުގެ ބައި ލައްކައެއްހާ މަޢުސޫމް ރައްޔިތުން ޝަހީދުވިފަހުން، އެއްބަސްވުމަކާ ހަމައަށް ދެވިއްޖެ ކަމަށް އިޢުލާނު ކުރުން ފިޔަވައި، އެއްބަސްވުމުގައި ހިމެނޭ އެއްވެސް ތަފްޞީލެއް އެ މަޝްވަރާތަކުގައި މެދުވެރިއެއްގެ ރޯލު އަދާކުރި ޤަތަރާއި އެމެރިކާއިން ވެސް ހާމަކޮށްފައެއް ނުވެއެވެ.
ނަމަވެސް، މަޝްވަރާތަކުގެ ތަފްޞީލު އެނގޭ އެކި މަސްދަރުތަކުން ލިބޭ މަޢުލޫމާތުތަކަށް ބަލާއިރު، މި އެއްބަސްވުން ވަނީ ތިން ފިޔަވައްސަކަށް ބަހާލައިފައެވެ.
މި އެއްބަސްވުމުގެ ފުރަތަމަ ފިޔަވަހީގެ ދަށުން އަންނަ އާދީއްތަ ދުވަހުން ފެށިގެން ހަ ހަފްތާއަށް ޙަމަލާތައް ހުއްޓައިލެވޭނެއެވެ.
އަދި ޙަމާސް ޖަމާޢަތުން ރަހީނުކޮށްފައިވާ މީހުންނާއި، އިޒްރޭލުގެ ޖަލުތަކުގައި ތިބި ފަލަސްތީނުގެ ޤައިދީންގެ "އެތައް ސަތޭކަ" ބަޔަކު މިނިވަންކުރެވޭނެއެވެ.
ރަހީނުންނާއި ޤައިދީން މިނިވަންކުރުމުގެ އިތުރުން، ޣައްޒާގައި މީހުން އެންމެ ގިނައިން ދިރިއުޅޭ ސަރަޙައްދުތަކުން އިޒްރޭލު ސިފައިން ފައިބާނެއެވެ. އަދި ޣައްޒާއަށް އެހީ ވައްދަން މިހާރު އަޅާފައިހުރި ހުރަސްތައް ވެސް އިޒްރޭލުން ނިމުމަކަށް ގެންނާނެއެވެ.
ދެވަނަ އަދި ތިންވަނަ ފިޔަވަހީގެ މަޝްވަރާތައް ފަށާނީ، ފުރަތަމަ ފިޔަވަހީގެ 16 ވަނަ ދުވަހުން ފެށިގެންނެވެ.
ދެވަނަ ފިޔަވަހީގައި، ޣައްޒާގައި ދާއިމީކޮށް ޙަމަލާތައް ހުއްޓާލައި، ބާކީ ތިބި ރަހީނުންނާއި ޤައިދީން ވެސް މިނިވަންކުރާނެއެވެ.
މީގެއިތުރުން، ޣައްޒާގެ ހުރިހާ ސަރަޙައްދުތަކުން އިޒްރޭލު ސިފައިން ފޭބުން ވެސް މި ފިޔަވަހީގައި ހިމެނޭނެއެވެ.
މި އެއްބަސްވުމުގެ ތިންވަނަ ނޫނީ ފަހު ފިޔަވަހީގެ ދަށުން، ޣައްޒާގައި ސުންނާފަތިވެފައިވާ ޢިމާރާތްތަކާއި ވަޞީލަތްތައް އަލުން އިމާރާތްކޮށް އިޔާދަކުރުމުގެ މަސައްކަތް ފެށޭނެއެވެ.
ޣައްޒާއަށް ޔަހޫދީ ފައުޖުން ޙަމަލާތައް ދެމުން އަންނަތާ 15 މަސް ދުވަސް ވެފައިވާއިރު، އެ ޙަމަލާތަކުގައި ޝަހީދުވި ފަލަސްތީނުގެ މަޢުސޫމް މީހުންގެ ޢަދަދު މިހާރު 46،000 އާ ވަނީ ގާތްވެފައެވެ.
އެ ޙަމަލާތަކުގައި މުޅި ޣައްޒާ ވަނީ ސުންނާފަތިވެފައެވެ.