އިޒްރޭލާއި ޙަމާސް ޖަމާޢަތުގެ މެދުގައި އެއްބަސްވުމަކަށް އާދެވުމަކީ، ފަލަސްތީނުގެ ޣައްޒާގައި ދިރިއުޅޭ އެތައް މިލިއަން މަޢުސޫމް ރައްޔިތުންނަށް ކުރިމަތިވެފައިވާ ނިކަމެތިކަމާއި ހިތްދަތިކަމަށް، ފަނޑު ނަމަވެސް އުއްމީދެއް ލިބޭނެ ކަމެކެވެ.

ހަނގުރާމައަށް 15 މަސް ދުވަހަށް ވުރެ ގިނަ ދުވަސްވެފައިވާއިރު، މުޅި ޣައްޒާ ސުންނާފަތިވި، ފަލަސްތީނުގެ ބައި ލައްކައެއްހާ މަޢުސޫމް ރައްޔިތުން ޝަހީދުވިފަހުން، އެއްބަސްވުމަކާ ހަމައަށް ދެވިއްޖެ ކަމަށް އިޢުލާނު ކުރުން ފިޔަވައި، އެއްބަސްވުމުގައި ހިމެނޭ އެއްވެސް ތަފްޞީލެއް އެ މަޝްވަރާތަކުގައި މެދުވެރިއެއްގެ ރޯލު އަދާކުރި ޤަތަރާއި އެމެރިކާއިން ވެސް ހާމަކޮށްފައެއް ނުވެއެވެ.

އެއްބަސްވުމުގެ ބައެއް ތަފްޞީލުތައް އަދިވެސް ފައިނަލް ކުރަމުންދާ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ބުނެފައެވެ.

ނަމަވެސް، މަޝްވަރާތަކުގެ ތަފްޞީލު އެނގޭ އެކި މަސްދަރުތަކުން ލިބޭ މަޢުލޫމާތުތަކަށް ބަލާއިރު، މި އެއްބަސްވުން ވަނީ ތިން ފިޔަވައްސަކަށް ބަހާލައިފައެވެ.

ފުރަތަމަ ފިޔަވަހި

އެމެރިކާގެ ރައީސް ޖޯ ބައިޑެން ވިދާޅުވެފައިވާ ގޮތުގައި، މި އެއްބަސްވުމުގެ ފުރަތަމަ ފިޔަވަހީގެ ދަށުން އަންނަ އާދީއްތަ ދުވަހުން ފެށިގެން ހަ ހަފްތާއަށް ޙަމަލާތައް ހުއްޓައިލެވޭނެއެވެ.

ބައިޑެން ވިދާޅުވެފައިވާ ގޮތުގައި، މި އެއްބަސްވުމުގެ ފުރަތަމަ ފިޔަވަހީގެ ދަށުން، ޙަމާސް ޖަމާޢަތުން ރަހީނުކޮށްފައިވާ މީހުންނާއި، އިޒްރޭލުގެ ޖަލުތަކުގައި ތިބި ފަލަސްތީނުގެ ޤައިދީންގެ "އެތައް ސަތޭކަ" ބަޔަކު މިނިވަންކުރެވޭނެއެވެ.

ސީދާ އަދަދެއް ބައިޑެން ވިދާޅުނުވިޔަސް، މި މަޝްވަރާތަކުގައި އެންމެ އިސް ދައުރެއް އަދާކުރި ޤަތަރުގެ ބޮޑުވަޒީރު ޝެއިޚް މުޙައްމަދު ބިން ޢަބްދުއްރަޙްމާން ބިން ޖާސިމް އަލް ތަހާނީ ނޫސްވެރިންނަށް ހާމަކުރައްވާފައިވާ ގޮތުގައި، މި ފިޔަވަހީގައި ޙަމާސް ޖަމާޢަތުން ރަހީނުކޮށްފައިވާ 100 އެއްހާ މީހުންގެ ތެރެއިން، 33 މީހަކު މިނިވަންކުރާނެއެވެ.

ރަހީނުންނާއި ޤައިދީން މިނިވަންކުރުމުގެ އިތުރުން، ޣައްޒާގައި މީހުން އެންމެ ގިނައިން ދިރިއުޅޭ ސަރަޙައްދުތަކުން އިޒްރޭލު ސިފައިން ފައިބާނެއެވެ. އަދި ޣައްޒާއަށް އެހީ ވައްދަން މިހާރު އަޅާފައިހުރި ހުރަސްތައް ވެސް އިޒްރޭލުން ނިމުމަކަށް ގެންނާނެއެވެ.

ދެވަނަ އަދި ތިންވަނަ ފިޔަވަހީގެ މަޝްވަރާތައް ފަށާނީ، ފުރަތަމަ ފިޔަވަހީގެ 16 ވަނަ ދުވަހުން ފެށިގެންނެވެ.

އަދި އެ މަޝްވަރާތައް ކުރިއަށްދާއިރު، އެއްވެސް ފަރާތަކުން ޙަމަލާ ނުދޭނެ ކަމަށް ބައިޑެން ވަނީ ވިދާޅުވެފައެވެ.

ދެވަނަ ފިޔަވަހި

މި އެއްބަސްވުމުގެ ދެވަނަ ފިޔަވަހީގައި، ޣައްޒާގައި ދާއިމީކޮށް ޙަމަލާތައް ހުއްޓައިލެވޭނެ ކަމަށް ބައިޑެން މީގެކުރިން ވަނީ ވިދާޅުވެފައެވެ.

އަދި ބާކި ތިބި ރަހީނުންނާއި ޤައިދީން ވެސް މިނިވަންކުރާނެއެވެ.

މީގެއިތުރުން، ޣައްޒާގެ ހުރިހާ ސަރަޙައްދުތަކުން އިޒްރޭލު ސިފައިން ފޭބުން ވެސް މި ފިޔަވަހީގައި ހިމެނޭނެއެވެ.

ތިންވަނަ ފިޔަވަހި

މި އެއްބަސްވުމުގެ ތިންވަނަ ނޫނީ ފަހު ފިޔަވަހީގެ ދަށުން، ޣައްޒާގައި ސުންނާފަތިވެފައިވާ ޢިމާރާތްތަކާއި ވަޞީލަތްތައް އަލުން އިމާރާތްކޮށް އިޔާދަކުރުމުގެ މަސައްކަތް ފެށޭނެއެވެ.

ޣައްޒާއަށް ޔަހޫދީ ފައުޖުން ޙަމަލާތައް ދެމުން އަންނަތާ 15 މަސް ދުވަސް ވެފައިވާއިރު، އެ ޙަމަލާތަކުގައި ޝަހީދުވި ފަލަސްތީނުގެ މަޢުސޫމް މީހުންގެ ޢަދަދު މިހާރު 46،000 އާ ވަނީ ގާތްވެފައެވެ.

އެ ޙަމަލާތަކުގައި މުޅި ޣައްޒާ ވަނީ ސުންނާފަތިވެފައެވެ.