ENGLISH

04 އޭޕްރީލު 2025

Advertisement

ފަލަސްތީނުގެ ޣައްޒާގައި ޙަމަލާތައް ހުއްޓައިލަން އެއްބަސްވެއްޖެ

16 ޖެނުއަރީ 2025

|

ހަސަން އާމިރު

ފަލަސްތީނުގެ ޣައްޒާގައި ހަނގުރާމަ ހުއްޓާލުމާއި ރަހީނުކޮށްފައިވާ މީހުން މިނިވަންކުރުމަށް އިޒްރޭލާއި ޙަމާސް ޖަމާޢަތުން އެއްބަސްވެފައިވާ ކަމަށް، އެ މަޝްވަރާތަކުގައި މެދުވެރިއެއްގެ ރޯލު އަދާކުރި ޤަތަރާއި އެމެރިކާއިން އިޢުލާނުކޮށްފިއެވެ.

އެކަން އިޢުލާނުކުރި ފަހުން، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނީ، އެއްބަސްވުމުގެ އެންމެ ފަހުގެ ތަފްޞީލުތައް ފައިނަލް ކުރުމުގެ މަސައްކަތް ކުރެވެމުންދާ ކަމަށެވެ.

ނަމަވެސް، ނަތަންޔާހޫ ވަނީ އެމެރިކާގެ ރައީސް ޖޯ ބައިޑެން އާއި އިންތިޚާބީ ރައީސް ޑޮނަލްޑް ޓްރަމްޕަށް ފޯނުން ގުޅައި، އެއްބަސްވުމަކާ ހަމައަށް ގެންދިޔުމުގައި ކުރެއްވި މަސައްކަތްތައް ފާހަގަކުރައްވައި، ޝުކުރުއަދާކޮށްފައި ކަމަށް އޭނާގެ އޮފީހުން ބުންޏެވެ.

މި މަޝްވަރާތަކުގައި އެންމެ އިސް ދައުރެއް އަދާކުރި ޤަތަރުގެ ބޮޑުވަޒީރު ޝެއިޚް މުޙައްމަދު ބިން ޢަބްދުއްރަޙްމާން ބިން ޖާސިމް އަލް ތަހާނީ، ނޫސްވެރިންގެ ބައްދަލުވުމެއްގައި ވިދާޅުވީ، ޙަމަލާތައް ހުއްޓައިލުމުގެ މި އެއްބަސްވުމަށް އަންނަ އާދީއްތަ ދުވަހުން ފެށިގެން ޢަމަލު ކުރަން ފަށާނެ ކަމަށެވެ.

"އަޅުގަނޑުމެން އުއްމީދު މި ކުރަނީ، މިއީ މި ހަނގުރާމައިގެ އެންމެ ފަހު ސަފްޙާ ކަމަށް، އަދި ހުރިހާ ފަރާތްތަކުން ވެސް މި އެއްބަސްވުން ތަންފީޒު ކުރުމަށްޓަކައި، ކަނޑައަޅާފައިވާ ހުރިހާ ޝަރުތުތަކަށް ފުރިހަމައަށް އިޙްތިރާމް ކުރާނެ ކަމަށް،" އެ މަނިކުފާނު ވިދާޅުވިއެވެ.

ޤަތަރުގެ ބޮޑުވަޒީރު ވިދާޅުވީ، މި އެއްބަސްވުމަށް ޢަމަލުކުރޭތޯ މިޞްރުގެ ވެރިރަށް ޤާހިރާގައި ޤާއިމުކުރެވޭ ޚާއްސަ އޮފީހަކުން ގާތުން ބަލަމުންދާނެ ކަމަށެވެ.

ބައިޑެން ވިދާޅުވީ، މިހާރު އެއްބަސްވެފައިވަނީ ޙަމަލާތައް ހުއްޓައިލުމުގެ ފުރަތަމަ މަރުޙަލާ ކަމަށާއި، ކައިރި މުސްތަޤުބަލެއްގައި ދެވަނަ ފިޔަވަހީގެ ދަށުން، މި ހަނގުރާމައަށް ދާއިމީ ނިމުމެއް ގެނެވޭނެ ކަމަށެވެ.

ޙަމާސް ޖަމާޢަތާއި އިޒްރޭލު ސަރުކާރުގެ އެކި މަސްދަރުތަކާ ޙަވާލާދީ ބައެއް ނޫސްތަކުން ރިޕޯޓުކޮށްފައިވާ ގޮތުގައި، މި އެއްބަސްވުމުގެ ފުރަތަމަ ފިޔަވަހީގެ ދަށުން ޙަމާސް އިން ރަހީނުކޮށްފައިތިބި މީހުންގެ ތެރެއިން 33 މީހަކު މިނިވަން ކުރާނެއެވެ.

އޭގެ ބަދަލުގައި އިޒްރޭލުން ހައްޔަރުކޮށްފައިވާ ފަލަސްތީނުގެ 1،000 މީހުން އިޒްރޭލުން މިނިވަންކުރާނެއެވެ.

މީގެއިތުރުން، ޣައްޒާގެ ތެރޭގައި، ޙަމަލާތައް ނުދެވޭ ބަފަރ ޒޯނެއް ޤާއިމުކުރުން ވެސް ފުރަތަމަ ފިޔަވަހީގައި ހިމެނެއެވެ.

ޣައްޒާއަށް ޔަހޫދީ ފައުޖުން ޙަމަލާތައް ދެމުން އަންނަތާ 15 މަސް ދުވަސް ވެފައިވާއިރު، އެ ޙަމަލާތަކުގައި ޝަހީދުވި ފަލަސްތީނުގެ މައުސޫމް މީހުންގެ އަދަދު މިހާރު 46،000 އާ ވަނީ ގާތްވެފައެވެ.

ކިޔުންތެރިންގެ ހިޔާލު