ENGLISH

04 އޭޕްރީލު 2025

Advertisement

ބޭރު ޤައުމުތަކުން ޑިޔުޓީ ނެގުމާ ގުޅޭ ޚާއްސަ އިދާރާއެއް ޓްރަމްޕް އުފައްދަވަނީ

15 ޖެނުއަރީ 2025

|

ހަސަން އާމިރު

ބޭރު ޤައުމުތަކުން އެތެރެކުރާ މުދަލުން ޑިޔުޓީ ނެގުމާ ގުޅޭ ޚާއްސަ އިދާރާއެއް އުފައްދަން ނިންމަވާފައިވާ ކަމަށް، އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ރައީސްކަމަށް އިންތިޚާބުވެވަޑައިގެންނެވުމުގެ ކުރިން ވެސް، ޓްރަމްޕް ވަނީ ބޯޑަރު ހުރަސްކޮށް ނުޤަވާޢިދުން މީހުން އެތެރެވުމާއި މަސްތުވާތަކެތި އެތެރެކުރުން ހުއްޓުވަން ބާރު އެޅުމުގެ ގޮތުން، މެކްސިކޯ އަދި ކެނެޑާގެ މުދަލުން ޑިޔުޓީ ބޮޑުކުރާނެކަމުގެ އިންޒާރު ދެއްވައިފައެވެ.

މީގެއިތުރުން، ވާދަވެރި ޗައިނާއިން އެތެރެކުރާ މުދަލުން ވެސް ޑިޔުޓީ ބޮޑުކުރާނެ ކަމަށް ޓްރަމްޕް ގެންދަވަނީ ތަކުރާރުކޮށް ވިދާޅުވަމުންނެވެ.

އަންނަ ހޯމަ ދުވަހު ރައީސްކަމުގެ ހުވާކުރެއްވުމާ އެކު، ބޭރު ޤައުމުތަކަށް ޑިޔުޓީ ކަނޑައެޅުމާއި، ލިބެންޖެހޭ އާމްދަނީ ހޯދުމަށް ޙާއްސަކޮށްގެން، "އެކްސްޓަރނަލް ރެވެނިޔު ސަރވިސް" ގެ ނަމުގައި ވަކި އިދާރާއެއް އުފައްދަވާނެ ކަމަށް ޓްރަމްޕް އިއްޔެ އިޢުލާނުކުރެއްވިއެވެ.

އެމެރިކާގެ ޓްރެޜަރީ ޑިޕާޓްމަންޓުގެ ދަށުން މިހާރު އޮންނަނީ އިންޓަރނަލް ރެވެނިޔު ސަރވިސް އިދާރާއެވެ.

ނަމަވެސް، އަލަށް މި އުފައްދާ އިދާރާގެ މަސައްކަތްތައް ކުރިއަށްދާނެ ގޮތެއްގެ ތަފްޞީލެއް ޓްރަމްޕް ނުދެއްވައެވެ.

ޑިޔުޓީ ބޮޑުކުރުމުގެ ބޭނުމަކީ، އެމެރިކާއިން ބޭނުންވާ ގޮތަށް އެހެން ޤައުމުތަކުން ޢަމަލުކުރުމަށް އިޤްތިޞާދީ ގޮތުން މަޖުބޫރުކުރުވުން ކަމަށް ޓްރަމްޕް ވަނީ އެކި ފަހަރު މަތިން ވިދާޅުވެފައެވެ.

ނަމަވެސް، އެމެރިކާއަށް އެތެރެކުރާ މުދަލުން ޑިޔުޓީ ބޮޑުކޮށްފިނަމަ، އެކަމުގެ މާލީ ބުރަ، އެމެރިކާގެ ވިޔަފާރިތަކާއި އާންމުން ވެސް އުފުލަންޖެހުމުގެ ފުރުޞަތު ބޮޑުކަމަށް އިޤްތިޞާދީ ބައެއް މާހިރުން ދަނީ ބުނަމުންނެވެ.

ކިޔުންތެރިންގެ ހިޔާލު