ސަތޭކައަށް ވުރެ ގިނަ ފުލުހުންނާއި ތަހުޤީޤީ ޓީމުގެ އޮފިޝަލުން، ދެކުނު ކޮރެޔާގެ ރައީސްކަމުގެ މަޤާމުން އަޒުލުކޮށްފައިވާ ޔޫން ސުކް ޔެއޯލް ދިރިއުޅުއްވާ ގެކޮޅަށް ވަދެ، އެ މަނިކުފާނު ހައްޔަރުކޮށްފިއެވެ.

މިއީ ދެކުނު ކޮރެޔާގެ ދުސްތޫރީ ތާރީޚުގައި، ރައީސްކަމުގައި ހުންނެވި ވެރިއަކު ހައްޔަރުކުރި ފުރަތަމަ ފަހަރެވެ.

ދެ ފަހަރެއްގެ މަތިން ކޯޓުން ނެރެފައިވާ އަމުރު ތަންފީޒުކޮށް، ޔޫން ހައްޔަރުކުރުމަށް ތަހުޤީޤީ ޓީމުން ކުރި މަސައްކަތަށް، އެ މަނިކުފާނުގެ ސެކިޔުރިޓީ ބަލަހައްޓާ ސިފައިން ވަނީ ހުރަސްއަޅައިފައެވެ.

އެ އަމުރު ތަންފީޒުކުރަން ޕްރޮސެކިޔުޓަރުން ދިޔުމުން، އެ މަނިކުފާނު ދިރިއުޅުއްވާ ގެކޮޅު ވަށައިގެން ސިފައިން ވަނީ ބަންދުކޮށްފައެވެ.

ނަމަވެސް، އެތައް ސަތޭކަ ފުލުހުންނާއި ދެކުނު ކޮރެޔާގެ ތަހުޤީޤީ އިދާރާ، ކޮރަޕްޝަން އިންވެސްޓިގޭޝަން އޮފީސްގެ އޮފިޝަލުން ވަނީ މިއަދުގެ ފަތިހުގެ ވަގުތެއްގައި، ޔޫންގެ ގެކޮޅަށް ވަދެ، އެ މަނިކުފާނު ހައްޔަރުކޮށްފައެވެ.

ގެކޮޅަށް ވަނުމަށްޓަކައި، އޮފިޝަލުން ފެންސުތަކާއި ފާރުމަތިން ވެސް އެރި ކަމަށް ބައެއް ރިޕޯޓުތައް ބުންޏެވެ.

ޔޫން ހައްޔަރުކުރިކަން އިޢުލާނު ކުރުމާ އެކު، އެ މަނިކުފާނު ވަނީ ކުރިން ރެކޯޑްކޮށްފައިވާ މެސެޖެއް އާންމުކުރައްވައިފައެވެ.

އެ މެސެޖުގައި ޔޫން ވިދާޅުވީ، މި ތަހުޤީޤުގެ ޤާނޫނީ ސައްޙާކަމާ މެދު އަދިވެސް ސުވާލު އުފެއްދެވިނަމަވެސް، ކޮރަޕްޝަން އޮފީހުގެ ތަހުޤީޤަށް އެއްބާރުލުން ދެއްވަން ނިންމެވީ ކަމަށެވެ.

ޔޫންގެ ގެކޮޅު ވަށައިގެން އެއްވެފައި ތިބި އެ މަނިކުފާނުގެ ގިނަ އަދަދެއްގެ ސަޕޯޓަރުންނާއި ފުލުހުންނާ ދެމެދު ކޮންމެވެސް ވަރެއްގެ ކުރިމަތިލުންތަކެއް ހިނގި ކަމަށް ބައެއް މީޑިޔާތަކުން ރިޕޯޓުކޮށްފައިވެއެވެ.

ޔޫން ހައްޔަރުކުރުމާ އެކު، އޮފިޝަލުން ވަނީ ކޮރަޕްޝަން އޮފީހުގެ މައި އިދާރާއަށް އެ މަނިކުފާނު ގެންގޮސްފައެވެ.

ދެކުނު ކޮރެއާގައި ކުއްލި ޙާލަތު ޔޫން އިޢުލާނު ކުރެއްވި މައްސަލާގައި، ޤާނޫނު ހަދާ މަޖިލީހުގެ އަޣުލަބިއްޔަތުން އެ މަނިކުފާނުގެ މައްޗަށް އިތުބާރު ނެތް ކަމަށް ފާސްކުރީ މިދިޔަ މަހުގެ 13 ވަނަ ދުވަހުއެވެ.

ދެކުނު ކޮރެޔާގެ ޤާނޫނުއަސާސީގެ ދަށުން ރައީސްކަމުން އަޒުލުކުރިޔަސް، އެކަމާ މެދު ފަހު ބަސް ބުނާނީ ދެކުނު ކޮރެޔާގެ ދުސްތޫރީ ކޯޓުންނެވެ.

އެ ޝަރީއަތް ފަށައި، އިއްޔެ ވަނީ އެ މައްސަލައިގެ ފުރަތަމަ އަޑުއެހުން ބާއްވައިފައެވެ.

ނަމަވެސް، ޔޫން ހާޒިރުނުވުމުން، އިއްޔެގެ އަޑުއެހުން ވަނީ ކުރުކޮށްލައިފައެވެ.

ދެކުނު ކޮރެޔާގެ ޤާނޫނުއަސާސީގެ ދަށުން، ދަޢުވާކޮށްފައިވާ މީހެއްގެ ޣައިރު ހާޒިރުގައި ޝަރީއަތް ކުރިއަށް ގެންދިޔުމަށް އާ އަޑުއެހުމެއް ބާއްވަންޖެހެއެވެ.

އެހެންކަމުން، މި މައްސަލައިގެ ދެވަނަ އަޑުއެހުން ކޯޓުން ވަނީ މާދަމާއަށް ތާވަލުކޮށްފައެވެ.

އެ ކޯޓުން ވަނީ، ޖެނުއަރީ 14 އިން ފެށިގެން ފެބްރުއަރީ 4 އާ ދެމެދު ފަސް އަޑުއެހުމެއް ތާވަލުކޮށްފައެވެ.

މި މައްސަލައިގައި ގޮތެއް ނިންމަން ކޯޓަށް 180ގެ މުއްދަތެއް ލިބޭނެއެވެ.

ޔޫންގެ މައްޗަށް ހަމަނުޖެހުން ނަގާލުމާއި ފިތުނަ އުފެއްދުމުގެ ދަޢުވާ އުފުލާފައިވާއިރު، މިއީ ދެކުނު ކޮރެޔާގައި މަރުގެ އަދަބު ދެވޭނެ ފަދަ ކުށެކެވެ.