ޓެކްސީ ޑްރއިވަރުންގެ ވިޔަފާރިއާއި ޙިދުމަތްތަކަށް ދެރަވާ ގޮތަށް މި ސަރުކާރުން އެއްވެސް ކަމެއް ނުކުރާނެ ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން މިއަދު ވިދާޅުވެއްޖެއެވެ.

މިިނިސްޓަރު މިފަދައިން ވާހަކަފުޅު ދެއްކެވީ ސަރުކާރުގެ ކުންފުންޏަކާ ހަވާލުކޮށްގެން މާލޭ ސަރަހައްދުގައި ޓެކްސީގެ ޚިދުމަތް ދިނުމާ ގުޅޭ ގޮތުން އުފެއްދި ސުވާލުތަކަށް ޖަވާބު ދެއްވުމުގެ ގޮތުންނެވެ.

މިއަދު ރައީސް އޮފީހުގައި ކުރިއަށް ގެންދިޔަ ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ ކަނޑައެޅިފައިވާ އަގުތަކަށް ބަދަލު ނުގެނެސް ޓެކްސީ ޑްރައިވަރުންގެ އާމްދަނީ އިތުރުކުރުމުގެ ނިޒާމެއް ޤާއިމް ކުރަން ޖެހޭނެ ކަމަށެވެ. އަދި ދުއްވާމީހާގެ ރައްކާތެރިކަމާއި ފަސިންޖަރުންގެ ރައްކާތެރިކަން ކަށަވަރު ކުރަންޖެހޭ ކަމަށް ވެސް މިނިސްޓަރ ވިދާޅުވިއެވެ.

ސަރުކާރުން އެސްއޯއީއަކާ ހަވާލުކޮށްގެން ޓެކްސީގެ ޚިދުމަތް ދޭން މަސައްކަތް ކުރައްވަނީ މާހައުލަށް ފެތޭ، ކޮމްފޮޓެބަލް އުޅަންދުތަކެއް ތައާރަފްކުރަން ޖެހޭތީއާއި މިހާރަށްވުރެ ޓެކްސީތަކުގެ އަދަދު އިތުރުކުރުމަކީ ޓެކްސީ ހިދުމަތުގެ ސްޓޭންޑާޑް ކުރިއަށް ވުރެ ރަނގަޅުވެގެންދާނެ ކަމެއްކަމަށް ވެސް ފާހަގަ ކުރެއްވިއެވެ.

މީގެ އިތުރުން ޑޮމެއިންގެ މައްސަލަތަކާއި ސީ ޓު އެއާ ކާރގޯގެ ވާހަކަވެސް މި ނޫސްވެރިންގެ ބައްދަލުވުމުގައި މިނިސްޓަރ ވަނީ ފާހަގަކުރައްވާފައެވެ.