ލުބްނާނުގެ އެކި ކަންކޮޅުތަކުގައި ދައުލަތުގެ ފުރިހަމަ ބާރު ހިންގަވާނެ ކަމަށް ވިދާޅުވެ، އެ ޤައުމުގެ އާ ބޮޑުވަޒީރު ނަވާފް ސަލާމް، ހަނގުރާމަވެރި ޖަމާޢަތް، ޙިޒްބުالله އަށް ނުސީދާ އިންޒާރެއް ދެއްވައިފިއެވެ.

ލުބްނާނުގެ ޤާނޫނު ހަދާ މަޖިލީހުގެ އަޤުލަބިއްޔަތުން ބޮޑުވަޒީރުގެ މަޤާމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)ގެ ރައީސްކަމުގައި ހުންނެވި ސަލާމް އިންތިޚާބު ކުރުމަށް ވަނީ ފާސް ކޮށްފައެވެ. ޤާނޫނުހަދާ މަޖިލީހުގެ 128 މެންބަރުންގެ ތެރެއިން 84 މެންބަރުން ވަނީ ބޮޑުވަޒީރުގެ މަޤާމަށް ސަލާމް އިންތިޚާބު ކުރުމަށް ރުހުން ދެއްވައިފައެވެ.

ނަމަވެސް، ޙިޒްބުالله އާއި އެ ޖަމާޢަތަށް ވާގިވެރިވާ ޝީޢީންގެ ޢަމަލް މޫވްމަންޓުން ސަލާމަށް ވޯޓު ދީފައެއް ނުވެއެވެ.

ބޮޑުވަޒީރުގެ މަޤާމަށް ވަޑައިގެންނެވުމަށްފަހު ދެއްވި ފުރަތަމަ ބަސްދީގަތުމުގައި ސަލާމް ވިދާޅުވީ ލުބްނާނުގެ އެކި ކަންކޮޅުތަކުގައި ދައުލަތުގެ ފުރިހަމަ ބާރު ހިންގަވާނެ ކަމަށެވެ.

އަދި ލުބްނާނުގެ ދެކުނު ސަރަޙައްދުތަކުން ޙިޒްބުﷲގެ ހަނގުރާމަވެރިން ފައިބަން ގޮވާލައި އދ.އިން ފާސްކޮށްފައިވާ ޤަރާރު ފުރިހަމައަށް ތަންފީޒު ކުރައްވާނެ ކަމަށް ވެސް އެ މަނިކުފާނު ވިދާޅުވިއެވެ.

މީގެއިތުރުން، މުޅި ޤައުމު ގުޅިގެން، ލުބްނާނު އިސްލާޙުކޮށް، އާރާސްތުކޮށް، އަލުން ތަރައްޤީކުރަން ވެސް ސަލާމް ވަނީ ގޮވާލައްވައިފައެވެ.

ބޮޑުވަޒީރުގެ މަޤާމަށް ސަލާމް ޢައްޔަނު ކުރުމުން ޙިޒްބުالله އިތުރަށް ބަލިކަށިވާނެ ކަމަށް ކުރިން ވެސް އޮތީ ބެލެވިފައެވެ. މިދިޔަ އަހަރުގެ ތެރޭގައި އިޒްރޭލާއި ލުބްނާނާ ކުރި ހަނގުރާމައިގެ ސަބަބުންނާއި ޙިޒްބުالله އަށް ވާގިވެރިވި ސޫރިޔާގެ ކުރީގެ ރައީސް ބައްޝާރު އަލް އަސަދުގެ ވެރިކަން ކުއްލި ގޮތަކަށް ނިމުމަކަށް އައުމުގެ ސަބަބުން ޙިޒްބުاللهގެ ބާރު ވަނީ ވަރަށް ބޮޑަށް ފަނޑުވެފައެވެ.