ފަލަސްތީނުގެ ޣައްޒާގައި ހަނގުރާމަ ހުއްޓާލުމާއި ރަހީނުކޮށްފައިވާ މީހުން މިނިވަންކުރުމުގެ އެއްބަސްވުން މިހާރު އޮތީ އެންމެ ފަހު މަރުޙަލާގައި ކަމަށާއި ވަރަށް އަވަހަށް އެއްބަސްވުމަކާ ހަމައަށް ދެވޭނެ ކަމަށް، އެ މަޝްވަރާތަކުގައި މެދުވެރިއެއްގެ ރޯލު އަދާކުރަމުން އަންނަ ޤަތަރުން ބުނެފިއެވެ.

އިޒްރޭލާއި ޙަމާސްއާ ދެމެދު، ސުލްޙަ ޤާއިމުކޮށް، ޣައްޒާގައި ހަނގުރާ ހުއްޓާލައި، ރަހީނުން މިނިވަންކުރުމަށް އެމެރިކާ އާއި މިޞްރާއި އެކު ޤަތަރުން މެދުވެރިއެއްގެ ރޯލު އަދާކުރަމުން އަންނަ މަޝްވަރާތައް ވަނީ އަލުން ފަށައިފައެވެ.

ޤަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ މިއަދު ވިދާޅުވީ، އެ އެއްބަސްވުން މިހާރު އޮތީ އެންމެ ފަހު މަރުޙަލާގައި ކަމަށެވެ.

"އަޅުގަނޑުމެން ޤަބޫލުކުރާ ގޮތުގައި އަޅުގަނޑުމެން މިހާރު މިތިބީ އެންމެ ފަހު މަރުހަލާގައި... ހަމަ ޔަގީނުންވެސް އަޅުގަނޑުމެން އުންމީދު ކުރަނީ ވަރަށް އަވަހަށް އެއްބަސްވުމަކާ ހަމައަށް ދެވޭނެ ކަމަށް،" އަންސާރީ ވިދާޅުވިއެވެ.

އޭނާ ވިދާޅުވި ގޮތުގައި، މީގެ ކުރިން މަޝްވަރާތައް ހުއްޓި، އެއްބަސްވުމަކާ ހަމައަށް ނުދެވި ހުރި, ހުރިހާ ހުރަސްތަކެއް މިހާރު ވަނީ ނައްތައިލެވިފައެވެ.

ނަމަވެސް، އެއީ ކޮން ހުރަސްތަކެއް އަންސާރީ ވިދާޅުވެފައެއް ނުވެއެވެ.

ނަމަވެސް، ޙަމާސް ޖަމާޢަތާއި އިޒްރޭލު ސަރުކާރުގެ އެކި މަސްދަރުތަކާ ޙަވާލާދީ ބައެއް ނޫސްތަކުން ރިޕޯޓުކޮށްފައިވާ ގޮތުގައި، މި އެއްބަސްވުމުގެ ފުރަތަމަ ފިޔަވަހީގެ ދަށުން ޙަމާސް އިން ރަހީނުކޮށްފައިތިބި މީހުންގެ ތެރެއިން 33 މީހަކު މިނިވަން ކުރާނެއެވެ.

އޭގެ ބަދަލުގައި އިޒްރޭލުން ހައްޔަރުކޮށްފައިވާ ފަލަސްތީނުގެ 1،000 މީހުން އިޒްރޭލުން މިނިވަންކުރާނެއެވެ.

މީގެއިތުރުން، ޣައްޒާގެ ތެރޭގައި، ޙަމަލާތައް ނުދެވޭ ބަފަރ ޒޯނެއް ޤާއިމުކުރުން ވެސް ފުރަތަމަ ފިޔަވަހީގައި ހިމެނެއެވެ.

ޣައްޒާއަށް ޔަހޫދީ ފައުޖުން ޙަމަލާތައް ދެމުން އަންނަތާ 15 މަސް ދުވަސް ވެފައިވާއިރު، އެ ޙަމަލާތަކުގައި ޝަހީދުވި ފަލަސްތީނުގެ މައުސޫމް މީހުންގެ އަދަދު މިހާރު 46،000 އާ ވަނީ ގާތްވެފައެވެ.