މައްސަލަ ހުއްޓަސް ކުރިން ދޫކޮށްފައިވާ ޑޮމެއިންތައް ކެންސަލް ނުކުރާނެ ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވެއްޖެއެވެ.

ސެކިއުޓީ ފީޗަރތަށް އިތުރުކޮށް ރެޖިސްޓްރީ އަލުން ދޫކުރާގޮތަށް، ހުރިހާ ޑޮމައިން ހުއްދަތައް އައު ކުރަން މިމަހުގެ 17 ވަނަ ދުވަހު ހުޅުވާލާނެއެވެ.

ދަތުރުފަތުރާ ބެހޭ ވަޒީރު އަމީން ވިދާޅުވީ މިމަހުގެ 17 ވަނަ ދުވަހު ފަށާ މަސައްކަތަކީ، ރާއްޖޭގައި ބޭނުންކުރާ ޑޮމައިންގެ ސައްޙަކަށް ކަށަވަރުކޮށް އަދި ޑޮމައިން ބޭނުންކުރާ މީހުންނަށް ބޭނުންވާ ރައްކާތެރިކަން ކަށަވަރުކުރުމަށް ފަށާ މަސައްކަތެއްކަމަށެވެ.

ދަތުރުފަތުރާ ބެހޭ ވުޒާރާއިން ހުޅުވާލާ ފުރުޞަތުގައި ހުރިހާ ޑޮމައިންތަކުން ލިޔެކިޔުންތައް ހުށައަޅާ، އައު އުސޫލާ އެއްގޮތަށް ޑޮމައިން ރެޖިސްޓްރީ ބަދަލުކޮށް އަދި ސެކިއުރިޓީ ފީޗަރތަކާއެކު ލިބޭ ލައިސަންސެއް ލިބޭނެއެވެ.

ވަޒީރު ވިދާޅުވީ، އައު އުސޫލާ އެއްގޮތަށް ލިޔެކިޔުތުންތައް ތައްޔާރުކޮށް 60 ދުވަހުގެ މުއްދަތުގެ ތެރޭގައި އައު ރެޖިސްޓްރިތައް ހަވާލުކުރާނެކަމަށެވެ.

މީގެއިތުރުން ޑޮމައިންއާ ގުޅޭ ޤަވާއިދު އިސްލާހުކުރުމާއި، ހަރުދަނާ އިދާރީ އޫސޫލުތައް ހެދުމާއި، އައު ސިސްޓަމެއް ތަޢާރަފުކޮށް ޑޮމައިންގެ ޑޭޓާބޭސް، އެއް ވިއުގައަކުން ގުޅާލުމުގެ މަސައްކަތް ހިމެނެއެވެ. މީގެސަބަބުން ވުޒާރާއާއި ތަންފީޒީ އިދާރާތަކަށްވެސް މަޢުލޫމާތުގެ ސައްޙަކަން ދެނެގަތުމަށް ފަސޭހަވަގެންދާނެކަން ވަޒީރު ފާހަގަކުރެއްވިއެވެ.

"މި ހުޅުވާލަނީ 60 ދުވަހުގެ ތެރޭގައި އެ ހުރިހާ ލިޔެކިޔުންތައް ވެރިފައިކުރުމަށް. އާ ސެކިއުރިޓި ފީޗަރއާއެކު ޑޮމައިން ރެޖިސްޓްރީ އަދި ބޭނުންކުރުމުގެ ހުއްދަ ދޫކުރެވޭނެ. މިއީ ޑޮމައިންގެ ސައްޙަކަން ކަށަވަރުކުރެވޭނެ މުހިންމު މަސައްކަތެއް. ހުށައަޅާތާ 60 ދުވަހަށް ފަހު ދެން ޤަބޫލުކުރާނީ އާ ލިޔެކިޔުން." ދަތުރުފަތުރާ ބެހޭ ވަޒީރު މުޙައްމަދު އަމީން ވިދާޅުވިއެވެ.  

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވި ގޮތުގައި ޑޮމެއިންގެ މައްސަލަތައް ޙައްލުކުރުމުގެ މަސައްކަތް މިހާރު ދަނީ ކުރިއަށެވެ.

ކުރިން ދޫކޮށްފައިވާ ޑޮމެއިންގެ ތެރެއިން ސައްހަ ނޫން ޑޮމެއިންގެ މައްސަލަތައް ސީދާ އަދަދެއް ދަންނަވަން ދަތިފުޅުކަމަށް ވެސް މިނިސްޓަރު އަމީން ވިދާޅުވިއެވެ. އެއީ މިނިސްޓްރީން އެ ހުރިހާ ޑްމެއިންތަކަށް ވެސް ޚިދުމަތް ދެމުން ގެންގޮސްފައިވާތީއެވެ.

މިހާރު ދޫކޮށްފައިވާ ޑޮމެއިންތަކުގެ މައްސަލަތައް ހައްލުކޮށް، އަންނަ އަހަރު އަލުން ޑޮމެއިން ދޫކުރަން ފަށާނެކަމަށާއި، އެކަން ކުރާނީ ދެފުށް ފެންނަ ގޮތަށް ހުޅުވާލެވިފައިވާ ބީލަމެއްގެ ތެރެއިން ކަމަށް މިިނިސްޓަރު ވިދާޅުވިއެވެ. 

"އިރާދަކުރެއްވިއްޔާ މިފެށޭ އަހަރުގައި، 2025 ވަނަ އަހަރު އަލަށް ޑޮމެއިން ވިއްކަން ފަށާނަން،" އަމީން ވިދާޅުވިއެވެ.

އަދި  އެކަން ކުރަމުންގެންދާނީ އިލެކްޓްރޯނިކް  ބިޑިންގް ސިސްޓަމެއްގެ ތެރެއިން ކަމަށް ވެސް ވިދާޅުވިއެވެ.

 މިނިސްޓަރު ވިދާޅުވީ ޑޮމެއިން ދޫކުރާއިރު އިނގުރޭސި އަކުރު ނުވަތަ މީހެއްގެ ނަމެއް އަދި ހިސާބު އަދެއްވެސް ބޭނުން ކުރެވިދާނެ ކަމަށެވެ.

އަދި އަލަށް ޑޮމެއިން ވިއްކަން ފަށާނީ އާންމުންނަށް ބަލައިގަނެވޭ ފަދަ ހަރުދަނާ ނިޒާމެއްގެ ތެރެއިން ކަމުގެ ޔަގީން މިނިސްޓަރު ދެއްވިއެެވެ.