ރަޝިޔާގެ ކޫރްސްކް ސަރަޙައްދުގައި ޔޫކްރެއިނާ ދެކޮޅަށް ރަޝިޔާއިން ކުރަމުންދާ ހަނގުރާމައިގެ ތެރެއިން އަތުލައިގެންފައިވާ އުތުރު ކޮރެޔާގެ ސިފައިންގެ ދެ މީހަކު އަނބުރާ ޙަވާލުކުރަން "ތައްޔާރަށް" ހުންނެވި ކަމަށް ޔޫކްރެއިނުގެ ރައީސް ވޮލޮޑިމިއަރ ޒެލެންސްކީ ވިދާޅުވެއްޖެއެވެ.

ޒެލެންސްކީ މިހެން ވިދާޅުވީ، ރަޝިޔާގެ ކޫރްސްކް ސަރަޙައްދުގެ ހަނގުރާމައިގެ މައިދާނުން، އުތުރު ކޮރެޔާގެ ސިފައިންގެ ދެ މީހަކު، ޔޫކްރެއިނުން މިދިޔަ ބުރާސްފަތި ދުވަހު އަތުލައިގެންފައިވާ ކަމަށް ދެކުނު ކޮރެޔާގެ ޖާސޫސީ އިދާރާއިން ބުނެވައިވަނިކޮށެވެ.

އަތުލައިގެންފައިވަނީ، ހަނގުރާމައިގެ މައިދާނުގައި ޒަޚަމްވެފައި ތިބި ދެ މީހަކު ކަމަށް ވެސް ބުނެފައިވެއެވެ.

"ރަޝިޔާއިން ހިފަހައްޓާފައިތިބި އަޅުގަނޑުމެންގެ ބަތަލުން އަނބުރާ ގެނެވޭނެ އިންތިޒާމެއް ހަމަޖެއްސޭނަމަ، އޭގެ ބަދަލުގައި ކިމް ޖޮންގް އުންގެ ސިފައިން އަނބުރާ ދޭން ޔޫކްރެއިން އޮތީ ތައްޔާރަށް،" އުތުރު ކޮރެޔާގެ އިތުރު ސިފައިން ވެސް އަތުލައިގަނެވިފައިވާނެ ކަން ފާހަގަކުރައްވައި، ޒެލެންސްކީ އެކްސްގައި ކުރެއްވި ޕޯސްޓެއްގައި ވިދާޅުވިއެވެ.

އަތުލައިގެންފައިވާ އުތުރު ކޮރެޔާގެ ސިފައިން އަނބުރާ ދާން ބޭނުންނުވާނަމަ، "އިތުރު ގޮތެއް" ހޯދޭނެ ކަމަށް ވެސް  އޭނާ ވިދާޅުވެފައިވެއެވެ.

ރަޝިޔާ ސިފައިންނާ އެކު ހަނގުރާމައިގެ އިސް ސަފުގައި ބައިވެރިވާން، އުތުރު ކޮރެޔާއިން 11،000 އަށް ވުރެ ގިނަ ސިފައިން ކޫރްސްކް ސަރަޙައްދަށް ފޮނުވާފައިވާ ކަމަށް ޔޫކްރެއިނުގެ އިތުރުން ދެކުނު ކޮރެޔާ އަދި އެމެރިކާ އިން ވެސް ދަނީ ބުނަމުންނެވެ.

މިކަމާ ގުޅޭގޮތުން ރަޝިޔާ އަދި އުތުރު ކޮރެޔާއިން ވެސް އަދި ރަސްމީކޮށް އެއްޗެއް ބުނެފައެއް ނުވެއެވެ.

ރަޝިޔާގެ ސިފައިންނަށް އެހީތެރިކަން ފޯރުކޮށްދިނުމަށް އުތުރު ކޮރެޔާއިން ސިފައިން ފޮނުވާފައިވާ ކަމަށް ޔޫކްރެއިނުން ފުރަތަމަ ތުހުމަތު ކުރީ މިދިޔަ އޮކްޓޯބަރު މަހުގެ ތެރޭގައެވެ.

ހަނގުރާމައިގެ ތެރެއިން މިހާތަނަށް އުތުރު ކޮރެޔާގެ ސިފައިންގެ 3،000 މީހަކު ޒަޚަމްވެފައިވާ ކަމަށް ޔޫކްރެއިނުން ދަނީ ބުނަމުންނެވެ.