ގޯތި ލިބި، އިމާރާތް ކުރެވޭނެ ގޮތެއް ނެތް މީހުންނަށާއި ގެ އަޅަން ފެށުމަށް ފަހު އެ މަސައްކަތް ނުނިންމި ތިބި ފަރާތްތަކަށް  މަސައްކަތް ނިންމަން ކުޑަ އިންޓަރެސްޓެއްގައި ލޯނު ދޫރުކުރުގެ ޕްރޮގްރާމެއް ސަރުކާރުން މިއަދު ފައްޓަވައިފި އެވެ.

ރައީސް ޑޮކްޓަރ މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރޭގައި ހިމެނޭ ބޯހިޔާވަހިކަމަށް ލުއި ގޮތެއްގައި ލޯނު ލިބޭނޭ ގޮތެއް ހަމަޖެއްސުމުގެ ވައުދުގެ ދަށުން، "ހިޔާވަހި" ލޯން ސްކީމް އިފްތިތާހުކޮށްފައި ވަނީ އިސްލާމީ މަރުކަޒު ޖަލްސާ ކުރާ މާލަމުގައި މިއަދު ބޭއްވި ހަފްލާއެއްގަ އެވެ. ހިޔާވަހި ލޯނު ސްކީމުގެ ދަށުން ތިން ބާވަތެއްގެ ލޯނު ދޫކުރާނެ އެވެ. އެއީ:

* އަތޮޅުތެރޭގެ ގެތައް ހެދުމަށް ހިޔާވަހި ރަށްވެހި ލޯނު - އެއް މިލިއަން ރުފިޔާއާ ހަމައަށް

* އާބަން ސެންޓަރުތަކުގައި ގެދޮރު އަޅަން ހިޔާވަހި ސަހަރު ލޯނު- ތިން މިލިއަން ރުފިޔާއާ ހަމައަށް

* މާލޭ ސަރަހައްދުގައި ގެދޮރު އަޅަން ހާއްސަ ހިޔާވަހި ފުރަމާލެ ލޯން - ހަ މިލިއަން ރުފިޔާއާ ހަމައަށް

ހުރިހާ ލޯނެއް ވެސް ދޫކުރާނީ ފަސް ޕަސެންޓް އިންޓަރެސްޓުގައި 25 އަހަރުން ދައްކާ ގޮތަށެވެ.

ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވަނީ ކޮންމެ އަހަރެއްގެ ދައުލަތުގެ ބަޖެޓުން އެއް ބިލިއަން ރުފިޔާ ހައުސިން ލޯނަށް ހާއްސަ ކުރާނެ ކަމަށް ވިދާޅުވެފަ އެވެ. އަންނަ އަހަރުގެ ބަޖެޓުގައި ހިޔާވަހި ލޯނު ސްކީމަށް ވަނީ އެއް ބިލިއަން ރުފިޔާ ހިމަނައިފަ އެވެ. ހައުސިންގެ އެހެން މަޝްރޫއުތަކަށް ޖުމްލަ 4.8 ބިލިއަން ރުފިޔާ ބަޖެޓުގައި ހިމަނާފައިވެ އެވެ.

ރައީސް ވިދާޅުވީ އެމަނިކުފާން ދެކެވަޑައިގަންނަވަން ބޭނުންފުޅު ވަނީ މި ދައުރު ނިމި، 2028 އާ ހަމައަށް ދާ އިރު ރާއްޖޭގައި ގެދޮރުވެރިކަމަށް، އެކްސެސް ނުލިބޭ އެއްވެސް ރައްޔިތަކު ނެތުން ކަމަށެވެ. 

މި ލޯނުތަކަށް މާދަމާ ހުޅުވާލާނެ އެވެ. މި ލޯނަށް ކުރިމަތިލާން ޖެހެނީ ހިޔާވަހި ޕޯޓަލް މެދުވެރިކޮށެވެ.