ENGLISH

04 އޭޕްރީލު 2025

Advertisement

ހަނގުރާމައިގެ ތެރެއިން އުތުރު ކޮރެޔާގެ ދެ ސިފައިންގެ މީހަކު ޔޫކްރެއިނުން އަތުލައިގެންފި

12 ޖެނުއަރީ 2025

|

ހަސަން އާމިރު

ރަޝިޔާގެ ކޫރްސްކް ސަރަޙައްދުގައި ޔޫކްރެއިނާ ދެކޮޅަށް ރަޝިޔާއިން ކުރަމުންދާ ހަނގުރާމައިގައި ބައިވެރިވަމުންދާ އުތުރު ކޮރެޔާގެ ސިފައިންގެ ދެ މީހަކު ޔޫކްރެއިނުން އަތުލައިގެންފައިވާ ކަމަށް ދެކުނު ކޮރެޔާއިން ބުނެފިއެވެ.

ރަޝިޔާ ސިފައިންނާ އެކު ހަނގުރާމައިގެ އިސް ސަފުގައި ބައިވެރިވާން، އުތުރު ކޮރެޔާއިން 11،000 އަށް ވުރެ ގިނަ ސިފައިން ކޫރްސްކް ސަރަޙައްދަށް ފޮނުވާފައިވާ ކަމަށް ޔޫކްރެއިނުގެ އިތުރުން ދެކުނު ކޮރެޔާ އަދި އެމެރިކާ އިން ވެސް ދަނީ ބުނަމުންނެވެ.

ދެކުނު ކޮރެޔާގެ ޖާސޫސީ އިދާރާއިން ނެރުނު ބަޔާނެއްގައި ބުނީ، ރަޝިޔާގެ ކޫރްސްކް ސަރަޙައްދުގެ ހަނގުރާމައިގެ މައިދާނުން، އުތުރު ކޮރެޔާގެ ސިފައިންގެ ދެ މީހަކު, ޔޫކްރެއިނުން މިދިޔަ ބުރާސްފަތި ދުވަހު އަތުލައިގެންފައިވާ ކަމަށެވެ.

އަތުލައިގެންފައިވަނީ، ހަނގުރާމައިގެ މައިދާނުގައި ޒަޚަމްވެފައި ތިބި ދެ މީހަކު ކަމަށް ވެސް ބުނެފައިވެއެވެ.

އޭގެފަހުން، ޔޫކްރެއިނުގެ ޖާސޫސީ އިދާރާއިން ނެރުނު ވީޑިއޯއެއްގައި، އެ ދެ މީހުން ހޮސްޕިޓަލެއްގެ އެނދުގައި ފަރުވާ ދެމުންދާ މަންޒަރު ފެނެއެވެ.

އެ އިދާރާއިން ބުނި ގޮތުގައި، އެ ދެ މީހުންނަކީ އަސްކަރީ ތަމްރީން ލިބިފައިތިބި ސިފައިންގެ މީހުން ކަމަށް ވަނީ އެއްބަސްވެފައެވެ. ނަމަވެސް، ރަޝިޔާގައި އުޅެނީ ތަމްރީން ހަރަކާތެއްގައި ކަމަށާއި، ހަނގުރާމައިގައި ޢަމަލީ ގޮތުން ބައިވެރިނުވާ ކަމަށް، އޭގެ ތެރެއިން އެކަކު ބުނާ ކަމަށް ވެސް އެ އިދާރާ އިން ބުންޏެވެ.

މިކަމާ ގުޅޭގޮތުން ރަޝިޔާ އަދި އުތުރު ކޮރެޔާއިން ވެސް އަދި ރަސްމީކޮށް އެއްޗެއް ބުނެފައެއް ނުވެއެވެ.

ރަޝިޔާގެ ސިފައިންނަށް އެހީތެރިކަން ފޯރުކޮށްދިނުމަށް އުތުރު ކޮރެޔާއިން ސިފައިން ފޮނުވާފައިވާ ކަމަށް ޔޫކްރެއިނުން ފުރަތަމަ ތުހުމަތު ކުރީ މިދިޔަ އޮކްޓޯބަރު މަހުގެ ތެރޭގައެވެ.

ހަނގުރާމައިގެ ތެރެއިން މިހާތަނަށް އުތުރު ކޮރެޔާގެ ސިފައިންގެ 3،000 މީހަކު ޒަޚަމްވެފައިވާ ކަމަށް ޔޫކްރެއިނުން ދަނީ ބުނަމުންނެވެ.

ކިޔުންތެރިންގެ ހިޔާލު