އެމެރިކާގެ ލޮސް އެންޖެލީސްގެ ޖަންގަލީގައި ރޯވި އަލިފާންގަނޑު މުޅި ސިޓީއަށް ފެތުރުމުގައި ކަމާބެހޭ އިދާރާތަކުގެ އިހުމާލު ބޮޑުކަމަށް ބުނެ އާންމުންގެ ޝަކުވާތައް ފުނިޖެހިއްޖެއެވެ.

އެމެރިކާގެ ދެވަނަ އަށް އެންމެ ބޮޑު ސިޓީގެ އެކި ހިސާބުތައް އަނދަމުންދާ އިރު، މިހާތަނަށް 11 މީހަކު މަރުވެ، 10،000 އަށް ވުރެ ގިނަ އިމާރާތް ވަނީ އަޅިއަށްވެފައެވެ.

މުޅި ސިޓީގައި ހުޅުހިފާފައިވާއިރު، މިފަދަ ހާދިސާއަކަށް އެކަށީގެންވާ ވަރަށް ތައްޔާރުނުވެ، ވަސީލަތްތައް ވެސް ނެތް ކަމަށް އާންމުން ދަނީ ބުނަމުންނެވެ.

އަލިފާނާ މާ ދުރު ހިސާބުތަކުގެ މީހުންނަށް ވެސް، އަލިފާނުގެ ނުރައްކާ އޮތް ކަމަށް ބުނެ، ގެދޮރު ދޫކޮށް ދިއުމަށް އިންޒާރުގެ މެސެޖުތައް އޮޅިގެން ފޮނުވުނު މައްސަލައިގައި އާންމުން ތިބީ ރުޅިގަދަވެފައެވެ. މީގެ އިތުރުން އަލިފާން ނިއްވުމަށް ފެން ޖަހަން ބޭނުންކުރާ ފަޔަރ ހައިޑްރަންޓްތަކުން ވެސް ފެން ހުސްވެފައިވާ ކަމުގެ ޝަކުވާތަކެއް ވެސް ވަނީ ފެންމަތިވެފައެވެ.

ގަވަރުނަރު ގެވިން ނިއުސަމް ވަނީ މި ހާދިސާއާ ގުޅިގެން ފުރިހަމަ ތަހުޤީޤެއް ހިންގަވާނެ ކަމަށް ވިދާޅުވެފައެވެ.

އެހާ ބާރުމިނުގައި އަލިފާންގަނޑު ފެތުރެމުންދަނީ، ވައި ބާރުވުމުގެ ސަބަބުން ކަމަށް ފަޔަރ ޑިޕާޓްމަންޓުން ބުންޏެވެ.

ވައިބާރުވުމުގެ ސަބަބުން، އަލިފާންގަނޑު ފެތުރިފައިވާ މައި ދެ ސަރަޙައްދެއްގައި ފަޔަރ ފައިޓަރުން ދަނީ އަލިފާންގަނޑު ކޮންޓްރޯލްކުރުމުގެ މަސައްކަތް ކުރަމުންނެވެ.

އެމެރިކާގެ ފިލްމު ސިޓީ، ހޮލީވުޑްގެ ގޮތުގައި މަޝްހޫރު ލޮސް އެންޖަލީސްގައި ހިނގަމުންމިދާ ހާދިސާގައި ލިބުނު ގެއްލުންތަކުގެ އަގު 57 ބިލިއަން ޑޮލަރަށް އަރާނެކަމަށް ބައެއް ފަރާތްތަކުން ވަނީ ލަފާކޮށްފައެވެ.

މި ހާދިސާ އާ ގުޅިގެން، 100،000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ގެންގޮސްފަ އެވެ.