ENGLISH

04 އޭޕްރީލު 2025

Advertisement

މުޒާހަރާތަކުގެ ތެރެއިން ވެނެޒުއޭލާގެ ރައީސްކަމުގެ ހުވާ ކުރެއްވި މަޑޫރޯ ހައްޔަރުކުރަން އެމެރިކާއިން 25 މިލިއަން ޑޮލަރުގެ އިނާމެއް

11 ޖެނުއަރީ 2025

|

ހަސަން އާމިރު

ވެނެޒުއޭލާގެ ރިޔާސީ އިންތިޚާބުގެ ނަތީޖާ އޮޅުވާލާފައިވާ ކަމަށް ބުނެ، އެތައް ހާސް ބަޔަކު ނުކުމެ މުޒާހަރާ ކުރަމުންދަނިކޮށް، ރައީސްކަމުގެ ހުވާ ކުރައްވައި، އެ ޤައުމުގެ ރައީސްކަމާ ތިން ވަނަ ދައުރަކަށް ނިކޮލަސް މަޑޫރޯ ޙަވާލުވެވަޑައިގަންނަވައިފިއެވެ.

މިދިޔަ ޖުލައި މަހު ބޭއްވި ރިޔާސީ އިންތިޚާބުގައި މަޑޫރޯގެ މައްޗަށް ކާމިޔާބު ހޯއްދެވި ކަމަށް އިދިކޮޅު ކެންޑިޑޭޓު އެޑްމުންޑޯ ގޮންޒާލޭސް އުރޫޝިއާ ގެންދަވަނީ ވިދާޅުވަމުންނެވެ.

ވެނެޒުއޭލާގެ އިންތިޚާބު ކާމިޔާބު ކުރެއްވީ އުރޫޝިއާ ކަމަށް އެމެރިކާގެ އިތުރުން ލެޓިން އެމެރިކާގެ ގިނަ ޤައުމުތައް ވެސް ޤަބޫލުކުރެއެވެ.

މަޑޫރޯ ރައީސްކަމުގެ ހުވާކުރައްވައި، "ޑިކްޓަރެއް"ގެ ގޮތުގައި ބަޣާވާތެއް ހިންގާފައިވާ ކަމަށް އުރޫޝިއާ ވަނީ ވިދާޅުވެފައެވެ.

އިންތިޚާބުގެ ނަތީޖާ އޮޅުވައިލި ކަމަށް ބުނެ، އެމެރިކާ އާއި އިނގިރޭސިވިލާތުން ވަނީ ވެނެޒުއޭލާ އާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށިކޮށްފައެވެ.

އެމެރިކާގެ ޚާރިޖީ ވަޒީރު އެންތަނީ ބްލިންކެން ވަނީ މަޑޫރޯ ރައީސްކަމުގެ ހުވާ ކުރެއްވީ ޤާނޫނާ ޚިލާފަށް ކަމަށް ވިދާޅުވެފައެވެ.

އެމެރިކާ އިން ވަނީ މަޑޫރޯ ހައްޔަރުކުރުމުގައި މަޢުލޫމާތު ދޭ ފަރާތަކަށް ހުށަހަޅާފައިވާ އިނާމު 25 މިލިއަން އެމެރިކާ ޑޮލަރަށް މަތިކޮށްފައެވެ.

މަޑޫރޯ އާ އެކު ވެނެޒުއޭލާގެ އިންޓީރިއާ މިނިސްޓަރާއި ޑިފެންސް މިނިސްޓަރު ހައްޔަރުކުރަން އެމެރިކާއިން މަސައްކަތް ކުރަމުންދަނީ 2020 ވަނަ އަހަރުގެ ތެރޭގައި އެމެރިކާއަށް ޑްރަގް އެތެރެކުރުމުގެ މައްސަލައެއްގައެވެ.

އިންތިޚާބަށް ފަހު އުރޫޝިއާ ޤައުމު ދޫކުރައްވައި ފުރަތަމަ ވަޑައިގެންނެވީ ސްޕެއިންއަށެވެ. ނަމަވެސް، އޭނާ މިހާރު އާޖެންޓީނާ އަށް ވަޑައިގެންފައިވާ ކަމަށް ރިޕޯޓުތައް ވަނީ ބުނެފައެވެ.

އުރޫޝިއާ ވަނީ، އެނބުރި ވެނެޒުއޭލާއަށް ވަޑައިގެން ސަރުކާރާ ޙަވާލުވެވަޑައިގަންނަވާނެ ކަމަށް އިޢުލާނު ކުރައްވައިފައެވެ.

ކިޔުންތެރިންގެ ހިޔާލު