ފަލަސްތީނުގެ ޣައްޒާގައި ހުންނަ މައި ހޮޕިސްޓަލްތައް ހިނގުމަށް ބޭނުންވާ ތެލާއި އެހެނިހެން އާލަތްތައް ވެއްދުމަށް އިޒްރޭލުން ހުރަސްއަޅަމުންދާތީ، ޣާއްޒާގެ ތިން ހޮސްޕިޓަލެއް ބަންދުކުރަންޖެހިދާނެ ކަމުގެ ބިރު ބޮޑުވެއްޖެއެވެ.

ފާއިތުވި 24 ގަޑިއިރުގެ ތެރޭގައި އިޒްރޭލުން ޣައްޒާއަށް ހުއްޓުމެއްނެތި ދެމުންދާ ވައިގެ ޙަމަލާތަކުގައި މިހާތަނަށް 50 މީހަކު ޝަހީދުވެފައިވާއިރު، އދ.އިން ބުނީ ޣައްޒާއަށް އެހީވައްދަން އޮންނަ މަގުތައް ބަންދުކޮށްގެން އިޒްރޭލުން ރާވައިގެން ދަނީ ހޮސްޕިޓަލުތަކަށް ސީދާ އަމާޒުކޮށްގެން، ޣައްޒާގައި ސިއްޙީ ފަރުވާގެ ނިޒާމު ފުނޑައިލުމަށް މަސައްކަތް ކުރަމުން ކަމަށެވެ.

ޣައްޒާގެ ހެލްތު އޮފިޝަލުން ބުނީ، އަލްއަޤްޞާ، ނާޞިރު އަދި ޔޫރަޕިއަން ހޮސްޕިޓަލްތައް ހިންގަން ބޭނުންވާ އެހީ ވެއްދުމަށް ހުރަސްއަޅަމުންދާތީ، އެ ތިން ހޮސްޕިޓަލް ވެސް ބަންދުކުރަންޖެހޭ ފަދަ ޙާލަތަކަށް ވެއްޓިފައިވާ ކަމަށެވެ.

އިޒްރޭލުގެ ލާއިންސާނީ ޙަމަލާތަކުގެ ސަބަބުން، ޣައްޒާގައި ދެން ހުންނަ ކަމާލް އަދުވާން، އިންޑޮނޭޝިއާ އަދި އަލްއައުދާ ހޮސްޕިޓަލް ވެސް މިހާރު ވަނީ ގާތްގަނޑަކަށް ހުއްޓުމަކަށް އައިސްފައެވެ.

އިޒްރޭލުގެ ޙަމަލާތަކުގައި ޒަޚަމްވެގެން ފަރުވާދޭންޖެހިފައިވާ މީހުންގެ އަދަދު ދުވަހެއް ދުވަހަކަށް އިތުރުވަމުން އަންނަ އިރު، އެ މީހުންނަށް ފަރުވާ ދޭން ބޭހާއި، ސާޖިކަލް ސާމާނު ވެސް ހުސްވެފައިވާ ކަމަށް ގިނަ ހޮސްޕިޓަލުތަކުން ވަނީ ބުނެފައެވެ.

އަދި އެ ހޮސްޕިޓަލުތަކުގެ ޖަނަރޭޓަރުތައް ހިންގަން ބޭނުންވާ ތެޔޮ ލިބުން ދަތިވެ، އަލަށްވިހާ ކުދިންގެ ވެންޓިލޭޓަރުތައް ހިންގަން ދަތިވެ، އެ ކުދިންގެ ފުރާނައަށް ނުރައްކާވެފައިވާ ކަމަށް ވެސް ހޮސްޕިޓަލުތަކުން ބުންޏެވެ.

ޣައްޒާއަށް ޔަހޫދީ ފައުޖުން ޙަމަލާތައް ދެމުން އަންނަތާ 15 މަސް ދުވަސް ވެފައިވާއިރު، އެ ޙަމަލާތަކުގައި ޝަހީދުވި ފަލަސްތީނުގެ މައުސޫމް މީހުންގެ އަދަދު މިހާރު 46،000 އާ ވަނީ ގާތްވެފައެވެ.