ދެކުނު ކޮރެޔާގައި ކުއްލި ޙާލަތު އިޢުލާނުކުރެއްވި މައްސަލާގައި، ރައީސްކަމުގެ މަޤާމުން އަޒުލުކޮށްފައިވާ ޔޫން ސުކް ޔެއޯލް ހައްޔަރުކުރަން ތަހުޤީޤީ ޓީމުތަކުން ކުރަމުންދާ މަސައްކަތުގެ ތެރެއިން ލޭއޮހޮރުވުމަކަށް ނުދާން، އެ މަނިކުފާނުގެ ސެކިޔުރިޓީ ބަލަހައްޓާ ސިފައިންގެ ވެރިޔާ ގޮވާލައިފިއެވެ.

ދެ ފަހަރެއްގެ މަތިން ކޯޓުން ނެރެފައިވާ އަމުރު ތަންފީޒުކޮށް، ޔޫން ހައްޔަރުކުރުމަށް ތަހުޤީޤީ ޓީމުން ކުރަމުންދާ މަސައްކަތަށް، އެ މަނިކުފާނުގެ ސެކިޔުރިޓީ ބަލަހައްޓާ ސިފައިން ވަނީ ހުރަސްއަޅައިފައެވެ.

އެ އަމުރު ތަންފީޒުކުރަން ޕްރޮސެކިޔުޓަރުން ދިޔުމުން، އެ މަނިކުފާނު ދިރިއުޅުއްވާ ގެކޮޅު ވަށައިގެން ސިފައިން ވަނީ ބަންދުކޮށްފައެވެ.

ސެކިޔުރިޓީ ބަލަހައްޓާ ސިފައިންގެ ވެރިޔާ ޕާކް ޗޮންގް ޖަން ވިދާޅުވީ، ޕްރޮސެކިޔުޓަރުންނާއި ސެކިޔުރިޓީ ސިފައިންނާ ދެމެދު ހިނގަމުންދާ ކަންކަމާ ގުޅިގެން ރައްޔިތުންގެ ހިތްތަކުގައި ނުތަނަވަސްކަމާއި ބިރުވެރިކަން އޮންނާނެ ކަމަށް ޤަބޫލުކުރައްވާ ކަމަށެވެ.

"އެއްވެސް ޙާލަތެއްގައި ވަރުގަދަ ކުރިމަތިލުންތަކެއް ހިންގައި، ލޭއޮހޮރުވުމެއް ހިނގިޔަ ދީގެން ނުވާނެ ކަމަށް އަޅުގަނޑު ޤަބޫލުކުރަން،" ޖަން ވިދާޅުވިއެވެ.

ދެކުނު ކޮރެއާގައި ކުއްލި ޙާލަތު ޔޫން އިޢުލާނު ކުރެއްވި މައްސަލާގައި، ޤާނޫނު ހަދާ މަޖިލީހުގެ އަޣުލަބިއްޔަތުން އޭނާގެ މައްޗަށް އިތުބާރު ނެތް ކަމަށް ފާސްކުރީ މިދިޔަ މަހުގެ 13 ވަނަ ދުވަހުއެވެ.

އެ މައްސަލަ ބަލަން ފަށައި، ކުއްލި ޙާލަތު އިޢުލާނުކުރުމާ ގުޅޭގޮތުން ސުވާލުކުރުމަށް ޕްރޮސެކިޔުޓަރުން އެދުނު އެދުމަށް ޔޫން ގެންދަވަނީ ތަކުރާރުކޮށް ދެކޮޅު ހައްދަވަމުންނެވެ.

ނަމަވެސް، ކޯޓުން ދެ ފަހަރެއްގެ މަތިން އަމުރު ހޯދައިގެން ވެސް ޔޫން ހައްޔަކުރުމަށް އެއްވެސް ކުރިއެރުމެއް މިހާތަނަށް ލިބިފައެއް ނުވެއެވެ.