ENGLISH

04 އޭޕްރީލު 2025

Advertisement

ޓްރަމްޕަށް ހުކުމް ކުރުން ފަސްކުރެވެން ނެތް ކަމަށް ސުޕްރީމް ކޯޓުން ވެސް ނިންމައިފި

10 ޖެނުއަރީ 2025

|

ހަސަން އާމިރު

އެމެރިކާގެ ރައީސްކަމުގެ މަގާމާ ހަވާލުވެވަޑައިގަންނަވާ ޓްރަމްޕް.

އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕަށް ހުކުމް ކުރުން ފަސްކުރެވެން ނެތް ކަމަށް އެ ޤައުމުގެ ސުޕްރީމް ކޯޓުން ވެސް ނިންމައިފިއެވެ.

ޓްރަމްޕްގެ މައްޗަށް ރިޝްވަތު ދިނުމާއި، ޚިޔާނާތް ފޮރުވަން މަސައްކަތް ކުރެއްވުމުގެ ދަޢުވާ ސާބިތުވާ ކަމަށް ކަނޑައަޅާފައިވަނީ މިދިޔަ މެއި މަހުގެ ތެރޭގައެވެ.

އެ މަނިކުފާނުގެ މައްޗަށް ހުކުމް ކުރަން ކޯޓުން ތާވަލުކުރީ މިއަދަށެވެ. ޓްރަމްޕް ރައީސްކަމުގެ ހުވާކުރެއްވުމަށް ހަމަޖެހިފައިވަނީ އޭގެ 10 ދުވަސް ފަހުން، މި މަހުގެ 20 ވަނަ ދުވަހެވެ.

ހުވާކުރެއްވުމުގެ ފަހަށް ހުކުމް ކުރުން ތާވަލުކުރަން ޓްރަމްޕް ހުށަހެޅުއްވި ހުށަހެޅުއްވުމަށް ނިއު ޔޯކުގެ ކޯޓުން ނޫނެކޭ ބުނުމުން، އެ މަނިކުފާނު ވަނީ އެ ނިންމުން ސުޕްރީމް ކޯޓުގައި އިސްތިޢުނާފް ކުރައްވައިފައެވެ.

ސުޕްރީމް ކޯޓުން ބުނީ، އެ މައްސަލައިގައި ޓްރަމްޕްގެ މައްޗަށް އިއްވާ ހުކުމަކުން، ރައީސްކަމުގެ މަސްއޫލިއްޔަތު އަދާކުރުމަކަށް މާބޮޑު ހުރަހެއް އެ މަނިކުފާނަށް ކުރިމައްޗެއް ނުވާނެ ކަމަށެވެ. އެހެންކަމުން، ޓްރަމްޕް އެދިވަޑައިގެންފައިވާ ގޮތަށް، ހުކުމް ކުރުން ފަސްކުރެވެން ނެތް ކަމަށް ސުޕްރީމް ކޯޓުން ވެސް ވަނީ ނިންމައިފައެވެ.

ސުޕްރީމް ކޯޓުގެ އެ ނިންމުމާ އެކު، މިއަދުގެ ވަގުތެއްގައި ޓްރަމްޕްގެ މައްޗަށް ހުކުމް އިއްވާނެ އެވެ.

ނަމަވެސް، ޓްރަމްޕްގެ މައްޗަށް ޖަލު ހުކުމެއް އިއްވާނެ ކަމަކަށް ނުބެލެވެއެވެ. އެކަމުގެ އިޝާރާތެއް ފަނޑިޔާރު ވެސް ވަނީ ދެއްވައިފައެވެ.

ނަމަވެސް، ރައީސްކަމާ ޓްރަމްޕް ވެރިކަމާ ޙަވާލުވެވަޑައިގަންނަވާނީ، ޖިނާއީ ކުށެއް ސާބިތުވެފައިވާ ކުށްވެރިއެއްގެ ގޮތުގައެވެ.

ޓްރަމްޕްގެ މައްޗަށް ދަޢުވާ އުފުލީ، އޮރިޔާންކާޑު އުފައްދާ އަންހެނެއް ކަމުގައިވާ ސްޓޯމީ ޑެނިޔެލްސް އާ އެކު ބޭއްވި ނަހަމަ ގުޅުންތައް ފޮރުވަން ރިޝްވަތު ދިނުމާއި، އެ މުޢާމަލާތް ސިއްރު ކުރުމަށް ވިޔަފާރީގެ ލިިޔެކިޔުންތައް އޮޅުވައިލެއްވި ކަމަށް ތުހުމަތުކޮށެވެ.

އެ މުޢާމަލާތް ހިންގާފައި ވަނީ 2016 ވަނަ އަހަރު ބޭއްވި އެމެރިކާގެ ރިޔާސީ އިންތިޚާބުގެ ކުރިންނެވެ. ޑެނިޔެލްސަށް ޓްރަމްޕް ރިޝްވަތު ދެއްވާފައި ވަނީ ރިޔާސީ ރޭހުގައި ކުރިއެރުން ހޯދުމަށް، އޭނާއާ ގުޅޭ މަޢުލޫމާތުތަކެއް ސިއްރު ކުރުމުގެ ބޭނުމުގައެވެ.

ކިޔުންތެރިންގެ ހިޔާލު