ފަލަސްތީނުގެ ޣައްޒާގައި ހަނގުރާމަ ހުއްޓާލުމާއި ރަހީނުކޮށްފައިވާ މީހުން މިނިވަންކުރުމުގެ އެއްބަސްވުމަކާ ވަރަށް ގާތަށް ދެވިފައިވާ ކަމަށް އެމެރިކާގެ ޚާރިޖީ ވަޒީރު އެތަނީ ބްލިންކެން އަނެއްކާވެސް ވިދާޅުވެއްޖެއެވެ.

އިޒްރޭލާއި ޙަމާސްއާ ދެމެދު، ސުލްޙަ ޤާއިމުކޮށް، ޣައްޒާގައި ހަނގުރާ ހުއްޓާލައި، ރަހީނުން މިނިވަންކުރުމަށް އެމެރިކާ އާއި މިޞްރާއި އެކު ޤަތަރުން މެދުވެރިއެއްގެ ރޯލު އަދާކުރަމުން އަންނަ މަޝްވަރާތައް ވަނީ އަލުން ފަށައިފައެވެ.

ނަމަވެސް، އެމެރިކާގެ މިހާރުގެ ރައީސް ޖޯ ބައިޑެންގެ ވެރިކަން ނިމި، މި މަހުގެ 20 ވަނަ ދުވަހު ރައީސްކަމާ ޑޮނަލްޑް ޓްރަމްޕް ޙަވާލުވެވަޑައިގެންނެވުމުގެ ކުރިން އެއްބަސްވުމުގައި ސޮއިކުރެވޭ ހިސާބަށް އެމެރިކާ އާއި މިޞްރާ އެކު ޤަތަރުން މެދުވެރިއެއްގެ ރޯލު އަދާކުރަމުން އަންނަ މަޝްވަރާތައް ނުދާނެ ކަމަށް ބްލިންކެން ވިދާޅުވިއެވެ.

"އަޅުގަނޑުމެން އުއްމީދު ކުރަނީ، އަޅުގަނޑުމެންނަށް މި އޮތް ވަގުތުކޮޅުގެ ތެރޭގައި މި ކަން ކޮޅެއްގައި ޖެއްސޭނެ ކަމަށް،" ބްލިންކެން ވިދާޅުވިއެވެ.

ނަމަވެސް، ބާކި މި އޮތް މުއްދަތުގައި އެއްބަސްވުން ނުނިމިއްޖެނަމަ، ޓްރަމްޕް ވެރިކަމަށް ވަޑައިގެންނެވިޔަސް، އެ ކަން ކުރިއަށްދާނީ ބައިޑެން އިޢުލާނުކުރައްވާފައިވާ ޕްލޭނާ އެއްގޮތަށް ކަމަށް ވެސް އޭނާ ވިދާޅުވިއެވެ.

ސުލްޙައިގެ އެއްބަސްވުމެއްގެ ވަރަށް ގާތަށް ދެވިފައިވާ ކަމަށް ބްލިންކެން ވިދާޅުވެފައި މިވަނީ، ޣައްޒާގައި ގެދޮރު ގެއްލިފައިވާ މީހުން ތިބޭ ވަގުތީ ހިޔާތަކަށް އަމާޒުކޮށް އިޒްރޭލުން ހުއްޓުމެއްނެތި ޙަމަލާތައް ދެމުންދާ ދަނޑިވަޅެއްގައެވެ.

މި ހަފްތާގެ ތެރޭގައި އިޒްރޭލުން ދޭ ޙަމަލާތައް ވަރުގަދަކޮށް، މިހާތަނަށް 50 އަށް ވުރެ ގިނަ މީހުން ވަނީ ޝަހީދުކޮށްލައިފައެވެ. އޭގެތެރޭގައި ކުޑަކުދިންނާއި އަންހެނުން ގިނަ ކަމަށް ޣައްޒާގެ ކަމާގުޅޭ އިދާރާތަކުން ވަނީ ބުނެފައެވެ.

ޣައްޒާއަށް ޔަހޫދީ ފައުޖުން ޙަމަލާތައް ދެމުން އަންނަތާ 15 މަސް ދުވަސް ވެފައިވާއިރު، އެ ޙަމަލާތަކުގައި ޝަހީދުވި ފަލަސްތީނުގެ މައުސޫމް މީހުންގެ އަދަދު މިހާރު 46،000 އާ ވަނީ ގާތްވެފައެވެ.