އަސްކަރީ ބާރުގެ ބޭނުންކޮށްގެން ވިޔަސް، ގްރީންލޭންޑް އެމެރިކާގެ ބާރުގެ ދަށަށް ގެންނަން ތައްޔާރަށް ހުންނެވި ކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ދެއްވި އިންޒާރާ ގުޅިގެން، ބައިނަލްއަޤުވާމީ ބޯޑަރުތަކަށް އިޙްތިރާމް ކުރުމަށް ޔޫރަޕުގެ ލީޑަރުން އެމެރިކާއަށް ގޮވާލައްވައިފިއެވެ.

ޔޫރަޕިއަން ޔޫނިއަން (އީޔޫ)ގެ މެމްބަރު ޤައުމެއް ކަމަށްވާ، ޑެންމާކުގެ ދަށުގައި އޮންނަ ގްރީންލޭންޑުގެ މައްޗަށް ބާރު ފޯރުވައި، އެ ރަށަކީ އެމެރިކާގެ ބައެއްގެ ގޮތުގައި ހެއްދެވުމަށް ބޭނުންވާ ކަމަށް ޓްރަމްޕް ވަނީ ވިދާޅުވެފައެވެ.

މީގެ ދުވަސްކޮޅެއް ކުރިން ޓްރަމްޕް ވަނީ ދުނިޔޭގެ ކަނޑުމަގުން މުދާ އުފުލުމުގެ މައި މަގެއް ކަމަށްވާ ޕެނަމާ ކެނޭލްގެ ޚިދުމަތް ހޯދުމަށް ޕެނަމާއިން ބޮޑެތި ފީތައް ނަގައި ކަމަށް ބުނެ ނުރުހުން ފާޅުކޮށް އެމެރިކާގެ ބާރުގެ ދަށަށް އެ ކެނޭލް އަނބުރާ ގެންނަވާނެ ކަމުގެ އިންޒާރު ދެއްވައިފައެވެ.

އިއްޔެ ބޭއްވި ނޫސްވެރިންގެ ބައްދަލުވުމުގެ ތެރެއިން ނޫސްވެރިން ތަކުރާރުކޮށް ސުވާލުކުރުމުން ވެސް، އެކަން ހާޞިލްކުރަން އިޤުތިޞާދީ އަދި އަސްކަރީ ބާރުގެ ބޭނުން ނުކުރާނެ ކަމުގެ ޔަޤީންކަން ދެއްވަން ޓްރަމްޕް ވަނީ ދެކޮޅު ހައްދަވައިފައެވެ.

އޭގެ އިތުރުން ޓްރަންޕް ވަނީ ގަލްފް އޮފް މެކްސިކޯގެ ނަން ގަލްފް އޮފް އެމެރިކާގެ ނަމަށް ބަދަލު ކުރެއްވުމަށް ބޭނުންވާ ކަމަށް ވެސް ވިދާޅުވެފައެވެ.

ޖަރުމަނުގެ ޗާންސެލަރު އޯލާފް ޝޯލްޓްސް ވިދާޅުވި ގޮތުގައި، ޓްރަމްޕްގެ މި އިންޒާރާ އެކު ޔޫރަޕުގެ ޤައުމުތަކުގެ މެދުގައި ވަނީ ނުތަނަވަސްކަން އުފެދިފައެވެ.

ކުއްލި ގޮތަކަށް ނޫސްވެރިންގެ ބައްދަލުވުމެއް ބާއްވައި، ޝޯލްޓްސް ވިދާޅުވީ، ޤައުމުތައް ވަކިވެފައިވާ އޮންނަ ބޯޑަރުތަކުގެ ރައްކާތެރިކަމަކީ ބައިނަލްއަޤުވާމީ ހަމަތަކާއި އުޞޫލުތަކުގެ މައިގަނޑު އަސާސް ކަމަށެވެ.

ފްރާންސްގެ ފޮރިން މިނިސްޓަރު ޖީން-ނޮއެލް ބެރެޓް ވިދާޅުވީ، ގްރީންލޭންޑަކީ ޔޫރަޕުގެ ޙިއްސާއެއް ކަމަށާއި، ސަރަޙައްދުން ބޭރުގެ އެއްވެސް ޤައުމަކުން ޔޫރަޕުގެ ސަރަޙައްދަށް އަރައިގަންނަން ފުރުޞަތު ނުދޭނެ ކަމަށެވެ.

ނަމަވެސް، ޑެންމާކުން މި ކަމުގައި ޚިޔާރުކޮށްފައިވަނީ، ޑިޕްލޮމެޓިކް އުޞޫލެވެ.

ޑެންމާކުގެ ފޮރިން މިނިސްޓަރު ލާސް ލޯކް ރާސްމަސަން ވިދާޅުވީ، އެމެރިކާގެ ބޭނުންވާ ކަންތައްތައް ފުރިހަމަކޮށްދިނުމުގައި މިހާރަށް ވުރެ ގާތުން މަސައްކަތްކޮށް އެއްބާރުލުން ދޭން ޑެންމާކުން ތައްޔާރު ކަމަށެވެ.

ޓްރަމްޕް ވަނީ މީގެކުރިން ވެސް، ދެ ފަހަރެއްގެ މަތިން ގްރީންލޭންޑު ގަތުމަށް ހުށަހަޅުއްވާފައެވެ. އެއީ 2019ވަނަ އަހަރާއި މިދިޔަ އަހަރުގެ ތެރޭގައެވެ. ދެ ފަހަރު ވެސް ގްރީންލޭންޑުން ވަނީ އެ ހުށަހެޅުންތަކަށް އިންކާރު ކޮށްފައެވެ.