ދެކުނު ކޮރެޔާގައި ކުއްލި ޙާލަތު އިޢުލާނުކުރެއްވި މައްސަލާގައި، ރައީސްކަމުގެ މަޤާމުން އަޒުލުކޮށްފައިވާ ޔޫން ސުކް ޔެއޯލް ހައްޔަރުކުރަން، ކޯޓުން އާ އަމުރެއް ނެރެދީފިއެވެ.

ދެކުނު ކޮރެއާގައި ކުއްލި ޙާލަތު ޔޫން އިޢުލާނު ކުރެއްވި މައްސަލާގައި، ޤާނޫނު ހަދާ މަޖިލީހުގެ އަޣުލަބިއްޔަތުން އޭނާގެ މައްޗަށް އިތުބާރު ނެތް ކަމަށް ފާސްކުރީ މިދިޔަ މަހުގެ 13 ވަނަ ދުވަހުއެވެ.

އެ މައްސަލަ ބަލަން ފަށައި، ކުއްލި ޙާލަތު އިޢުލާނުކުރުމާ ގުޅޭގޮތުން ސުވާލުކުރުމަށް ޕްރޮސެކިޔުޓަރުން އެދުނު އެދުމަށް ޔޫން ގެންދަވަނީ ތަކުރާރުކޮށް ދެކޮޅު ހައްދަވަމުންނެވެ.

އެއާ އެކު، ޔޫން ހައްޔަރުކޮށްގެން ސުވާލުކުރުމަށް ކޯޓުން ވަނީ އަމުރެއް ނެރެފައެވެ.

ނަމަވެސް، އެ އަމުރު ތަންފީޒުކުރަން ޕްރޮސެކިޔުޓަރުން ދިޔުމުން، އެ މަނިކުފާނު ދިރިއުޅުއްވާ ގެކޮޅު ވަށައިގެން ބަންދުކޮށް، ސެކިޔުރިޓީ ސިފައިން ދަނީ ހުރަސްއަޅަމުންނެވެ. އެ އަމުރުގެ މުއްދަތު އިއްޔެ ހަމަވުމުން، ތަހުޤީޤީ ޓީމުން އެދުނު ގޮތަށް، ކޯޓުން ވަނީ އާ އަމުރެއް ނެރެދީފައެވެ.

"ޔޫން ހައްޔަރުކުރުމަށް އަލުން އެދުނު އެދުމަށް، ކޯޓުން މިއަދު މެންދުރު ވަނީ އާ އަމުރެއް ނެރެދީފައި،" ތަހުޤީޤީ ޓީމުގެ އޮފިޝަލަކު ވިދާޅުވިއެވެ.

ނަމަވެސް، އާ އަމުރު ނެރެފައިވަނީ ކިހާ މުއްދަތަކަށް ކަމެއް ތަހުޤީޤީ ޓީމަކުން ނުބުނެއެވެ.

ޔޫން އަދިވެސް ހުންނެވީ ގެކޮޅުގައި ކަމަށް ރިޕޯޓުތައް ބުނެއެވެ. ނަމަވެސް، އެ މަނިކުފާނު ސެކިޔުރިޓީ ބަލަހައްޓައި ސިފައިން ދަނީ އެ އިމާރާތް ވަށައިގެން ބެރިކޭޑް ޖަހައި ބަންދުކޮށް، ފޯރިމަރަމުންނެވެ. ޔޫން އަށް ތާޢީދުކުރާ ގިނަ އަދަދެއްގެ އާންމުން ވެސް ވަނީ އެ ސަރަޙައްދަށް ޖަމާވެފައެވެ.

މިއީ ދެކުނު ކޮރެޔާގެ ދުސްތޫރީ ތާރީޚުގައި، ރައީސްކަމުގެ މަޤާމުގައި ހުންނެވި ބޭފުޅަކު ހައްޔަރުކުރަން މަސައްކަތް ކުރާ ފުރަތަމަ ފަހަރެވެ.

ޔޫން މަޤާމުން ދުރުކުރުމުގެ މައްސަލަ ދުސްތޫރީ ކޯޓުން ބަލަން ލަސްކުރަމުންދާ ކަމަށް ބުނެ، ރައީސްގެ މަސްޢޫލިއްޔަތުތަކާ ވަގުތީ ގޮތުން ޙަވާލުވެ ހުންނެވި ބޮޑުވަޒީރު ހާން ޑުކް ސޫ ވެސް ވަނީ ރައީސްކަމުން އަޒުލުކޮށްފައެވެ.

ޑުކް ސޫ އާ މެދު އިދިކޮޅު ޕާޓީތަކުން ނުރުހުނީ، ޔެއޯލްގެ އަޒުލުކޮށްފައިވާ މައްސަލާގައި ގޮތެއް ނިންމަންޖެހޭ އެ ޤައުމުގެ ދުސްތޫރީ ކޯޓަށް ފަނޑިޔާރު ޢައްޔަނުކުރުން ލަސްކުރަމުންދާތީ ކަމަށް ބުނެއެވެ.