ENGLISH
04 އޭޕްރީލު 2025
ޓިބެޓު ބިންހެލުމުގައި 126 މަރު، ގަދަ ފިނީގައި މީހުން ސަލާމަތްކުރުމުގެ މަސައްކަތް ކުރިއަށް
08 ޖެނުއަރީ 2025
|
އެންމެ މަޤްބޫލު
ޗައިނާގެ ޓިބެޓް ސަރަޙައްދަށް އިއްޔެ އައި ބާރުގަދަ ބިންހެލުމުގައި މަރުވި މީހުންގެ އަދަދު މިހާރު 126 އަށް އަރާފައިވާއިރު، ވެއްޓުނު އިމާރާތްތަކުގެ ދަށުން މީހުން ސަލާމަތްކުރުމުގެ މަސައްކަތް ދަނީ ކުރެވެމުންނެވެ.
ނޭޕާލުގެ ބޯޑަރު ކައިރީގައި އޮންނަ ޓިންގްރީ ކައުންޓީއަށް 7.1 މެގްނިޓިޔުޑްގެ ބާރުމިނުގައި އައި ބިންހެލުމުގައި އެ ސަރަޙައްދުގެ ގިނަ ގެތަކާއި އިމާރާތްތަކެއް ވަނީ ވެއްޓިފައެވެ.
ޗައިނާގެ ޒިންހުއާ ނޫހުން ބުނެފައިވާ ގޮތުގައި، 3،600 ގެއަކަށް ބޮޑެތި ގެއްލުންތައް ލިބި، 30،000 އަށް ވުރެ ގިނަ މީހުން ވަނީ ވަގުތީ ހިޔާތަކަށް ބަދަލުކުރެވިފައެވެ.
މި ހިނގާ ފިނި މޫސުމުގައި، ފަރުބަމަތީ ސަރަޙައްދެއް ކަމަށްވާ ޓިންގްރީގެ ފިނިހޫނުމިން މި ވަގުތު ހުރީ މައިނަސް 11 ޑިގްރީސް ސެލްސިއަސްގައި ކަމަށް މޫސުމާބެހޭ އިދާރާއިން ވަނީ ބުނެފައެވެ.
ވެއްޓިފައިވާ އިމާރާތްތަކުގެ ދަށުން މީހުން ސަލާމަތް ކުރުމުގެ މަސައްކަތުގައި 12،000 އަށް ވުރެ ގިނަ، ފަޔަރފައިޓަރުންނާއި، ފުލުހުން އަދި ސިފައިން ހަރަކާތްތެރިވަމުންދާ ކަމަށް ވެސް ޒިންހުއާ އިން ބުންޏެވެ.
މި ބިންހެލުމުގެ އަސަރު، ނޭޕާލުގެ އިތުރުން އިންޑިއާގެ ބައެއް ސަރަޙައްދުތަކަށް ވެސް ވަނީ ކޮށްފައެވެ.
ފަރުބަދަމަތީގެ ސަރަޙައްދެއް ކަމަށްވާ ޓިބެޓުގެ ޓިންގްރީގައި 62،000 މީހުންގެ އާބާދީއެއް ދިރިއުޅެއެވެ. އެ ސަރަޙައްދަކީ ބިންހެލުންތައް އާންމު ސަރަޙައްދެއް ނަމަވެސް، އިއްޔެގެ ބިންހެލުމަކީ ފާއިތުވި ފަސް އަހަރުގެ ތެރޭގައި، އެ ސަރަޙައްދަށް އައި އެންމެ ބާރުގަދަ ބިންހެލުމެވެ.