ENGLISH

04 އޭޕްރީލު 2025

Advertisement

ކެނެޑާގެ ބޮޑުވަޒީރު ޓްރޫޑޯ އިސްތިޢުފާ ދެއްވަން ނިންމަވައިފި

07 ޖެނުއަރީ 2025

|

ހަސަން އާމިރު

ކެނެޑާގެ ވެރިކަންކުރާ ލިބަރަލް ޕާޓީގެ ތެރޭގައި ކެނެޑާގެ ބޮޑުވަޒީރު ޖަސްޓިން ޓްރޫޑޯ އާ މެދު އޮތް ހިތްހަމަނުޖެހުން ބޮޑުވެ، މަޤާމުން އިސްތިޢުފާ ދެއްވަން އެ މަނިކުފާނު ނިންމަވައިފިއެވެ.

އެ ނިންމެވުން ރަސްމީކޮށް އިޢުލާނުކުރައްވާނެ ކަމަށް ބެލެވެނީ، މިއަދު ތާވަލުކޮށްފައިވާ ނޫސްވެރިންގެ ބައްދަލުވުމެއްގައެވެ.

އެކަން ލިބަރަލް ޕާޓީގެ މަސްދަރުތަކުން ޔަޤީންކޮށްދިން ނަމަވެސް، އެ މަރުޙަލާ ސީދާ ކުރިއަށްދާނެ ގޮތެއް އަދި ސާފެއް ނޫނެވެ.

ބައެއް މަސްދަރުތަކުން ބުނާ ގޮތުގައި، ޕާޓީގެ އިސް ލީޑަރުކަމުން އިސްތިޢުފާ ދެއްވިޔަސް، އާ ލީޑަރަކު ޢައްޔަނުކުރެވެންދެން، ބޮޑުވަޒީރު ކަމުގައި ވަގުތީ ގޮތުން ޓްރޫޑޯ ހުންނެވުމުގެ ފުރުޞަތު ވެސް އެބައޮތެވެ.

ފާއިތުވި މަސްތަކުގައި ޓްރޫޑޯގެ މަޤުބޫލުކަން ވަނީ ވަރަށް ބޮޑަށް ވެއްޓިފައެވެ. އެ މަނިކުފާނު މަޤާމުން ވަކިކުރަން އިތުބާރު ނެތް ކަމުގެ މައްސަލަތަކެއް ވެސް ވައްދައި، ވޯޓުން ހަނި ފަރަގަކުން ސަލާމަތްވެވަޑައިގެންނެވިޔަސް، އިސްތިޢުފާ ދެއްވުމަށް އިދިކޮޅު ފަރާތްތަކުން ވެސް ދަނީ ގޮވާލަމުންނެވެ.

ނަމަވެސް، އަންނަ އޮކްޓޯބަރު މަހު ބާއްވާ އިންތިޚާބާ ހަމައަށް މަޤާމުގައި ހުންނަވާނެ ކަމަށް ޓްރޫޑޯ މީގެކުރިން ވަނީ ވިދާޅުވެފައެވެ.

ސިޔާސީ ގޮތުން ޓްރޫޑޯއަށް ފިއްތުންތައް ކުރިމަތިވުމުގެ މައިގަނޑު ސަބަބުތަކުގެ ތެރޭގައި، ކެނެޑާއިން އެތެރެކުރާ މުދަލުން 25 ޕަސެންޓުގެ ޑިޔުޓީއަށް ނަގާނެ ކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް އިންޒާރު ދެއްވުމާ ގުޅިގެން، އެކަމާ ދެކޮޅަށް އެކަށީގެންވާ ޕްލޭނެއް ހެދިފައި ނެތުން ހިމެނެއެވެ.

އެ ދެބަސްވުންތަކުގައި، ކެނެޑާގެ ބޮޑުވަޒީރުގެ ނައިބު ކްރިސްޓިއާ ފްރީލެންޑް ވަނީ މިދިޔަ މަހު އިސްތިޢުފާ ދެއްވައިފައެވެ. އަމިއްލަ ކެބިނެޓުގެ ތެރޭގައި އޮތް ހިތްހަމަނުޖެހުންތައް ހައްލު ކުރައްވަން، ޓްރޫޑޯ ވަނީ ކެބިނެޓުގެ ތިން ބައި ކުޅަ އެއް ބައި ބަދަލުކުރައްވައިފައެވެ.

ކެނެޑާގެ ވެރިކަމަށް 2015 ވަނަ އަހަރު އިންތިޚާބުވެވަޑައިގެންނެވި ޓްރޫޑޯ އޭގެފަހުން ވަނީ 2019 އަދި 2021 ގެ އިންތިޚާބު ލިބަރަލް ޕާޓީއަށް ކާމިޔާބުކޮށްދެއްވައިފައެވެ.

ކިޔުންތެރިންގެ ހިޔާލު