ދެހާސް ތޭވީސް ވަނަ އަހަރަށް ވުރެ އިތުރަށް މިދިޔަ އަހަރު 168،072 ފަތުރުވެރިން ރާއްޖެ އަށް ޒިޔާރަތްކޮށް، އަހަރު ނިމުނުއިރު 2،046،615 ފަތުރުވެރިން ރާއްޖެ އައިސްފައިވާ ކަމަށް ފަތުރުވެރިކަމާބެހޭ ވުޒާރާއިން ވިދާޅުވެއްޖެއެެވެ.

ފަތުރުވެރިކަމާ ބެހޭ ވުޒާރާގެ ތަފާސް ހިސާބުތަކުން ދައްކާގޮތުގައި 2023 ވަނަ އަހަރު ރާއްޖެއަަށް ޒިޔާރަތްކުރި 1.8 މިލިއަން ފަތުރުވެރިންނަށްވުރެ، މިދިޔަ އަހަރު ޒިޔާރަތްކުރި ފަތުރުވެރިންގެ އަދަދު ނުވަ އިންސައްތަ އިތުރުވެފައިވެއެވެ. މިދިޔަ އަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރީ ޗައިނާއިންނެވެ. އެ ޤައުމުން 260،000 އަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. ދެވަނަ އަށް އެންމެ ގިނަ ފަތުރުވެރިން ޒިޔާރަތްކުރި ރަޝިޔާއިން 224،000 އަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ.

ފަތުރުވެރިކަމާ ބެހޭ ވުޒާރާގެ ތަފާސް ހިސާބުތަކުން ދައްކާގޮތުގައި މިދިޔަ ޑިސެމްބަރު މަހަކީ 2024 ވަނަ އަހަަރު ދެވަނަ އަށް އެންމެ ގިނަ ފަތުރުވެރިން ޒިޔާރަތްކުރި މަހެވެ. އެމަހު 208،980 ފަތުރުވެރިން ޒިޔާރަތްކޮށްފައިވެއެވެ. އަދި ދެ މިލިއަން ވަނަ ފަތުރުވެރިޔާ ހަމަވީ ވެސް ޑިސެމްބަރު 26 ވަނަ ދުވަހުއެވެ. މިދިޔަ އަހަރުގެ ފެބްރުއަރީ މަހު 217،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، އެއީ ފަތުރުވެރިކަމުގެ ތާރީޚުގައި އެންމެ ގިނަ ފަތުރުވެރިން ޒިޔާރަތްކުރި މަހެވެ. އެއް ދުވަހާ 10،000 އަށްވުރެ ގިނަ ފަތުރުވެރިން ޒިޔާރަތްކޮށްގެން އެއް ދުވަސްތެރޭ އެންމެ ގިނަ ފަތުރުވެރިން ޒިޔާރާތްކުރީ ވެސް ފެބްރުއަރީ މަހެވެ.

ފަތުރުވެރިކަމާ ބެހޭ ވުޒާރާގެ އެންމެ ފަހުގެ ތަފާސް ހިސާބުތައް ދައްކާގޮތުން މި އަހަރުގެ ފުރަތަމަ 5 ދުވަހުގެ ތެރޭގައި 32،349 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. އެއީ މިދިޔަ އަހަރުގެ ފުރަތަމަ 5 ދުވަހާ އަޅާބަލާއިރު، 17 އިންސައްތައިގެ ކުރިއެރުމެކެވެ.

އެެންމެ ގިނަ ފަތުރުވެރިން އަންނަ މާކެޓްތަކަށް ބަލާއިރު، ޗައިނާ ނުވަ ވަނައަށް ވެއްޓިފައިވާއިރު، އަހަރު ނިމުނުއިރު 6 ވަނާގައި އޮތް އިންޑިޔާ ވަނީ 5 ވަނައަށް އަރާފައެވެ. އަހަރުގެ ފުރަތަމަ ފަސް ދުވަހުގެ ހިސާބުތަކަށް ބަލާއިރު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ޤައުމުތަކުގެ ލިސްޓުގެ އެންމެ ކުރީގައި އޮތީ ޔޫރަޕުގެ ހަތަރު ޤައުމެވެ. އެއީ ރަޝިޔާ، އިޓަލީވިލާތް، އިނގިރޭސިވިލާތް އަދި ޖަރުމަނުވިލާތެވެ. 

ތަފާސް ހިސާބުތަކުން ދައްކާ ގޮތުން މި އަހަރުގެ ފުރަތަމަ 5 ދުވަހުގެ ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ 70 އިންސައްތަ ރިސޯޓްތައް ހިއްސާކުރާއިރު، 23 އިންސައްތަ ހިއްސާކުރަނީ ގެސްޓުހައުސްތަކެވެ.