މި އަހަރު ބާއްވާ ފުރަތަމަ "ވިޒިޓް މޯލްޑިވްސް ވީކް" ގައި ބައިވެރިވުމުގެ ފުރުސަތު މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ހުޅުވާލައްވައިފިއެވެ.

ފަތުރުވެރިކަން އިސްތިހާރު ކުރުމަށް "ވިޒިޓް މޯލްޑިވްސް ވީކް" ކެމްޕެއިން މުޅި އަހަރު ތެރެއަށް ބަހާލައިގެން ގިނަ ސިޓީތަކެއްްގައި ކުރިއަަށް ގެންދިއުމަށް އެމްއެމްޕީއާރުސީ ވަނީ ހަމަޖައްސަވައިފައެެވެ. މިގޮތުން ކުރިއަށްގެންދާ ފުރަތަމަ ވިޒިޓް މޯލްޑިވްސް ވީކް ބާއްވަން ހަމައްސާފައިވަނީ މެދު އިރުމަތީގައެވެ. ސައުދީ އަރަބިޔާގެ ވެރިރަށް ރިޔާދު އާއި ބަހްރޭނުގެ ވެރިރަށް މަނާމާ އަދި ކުވެއިތުގެ ވެރިރަށް ކުވެއިތު ސިޓީގައި ފެބްރުއަރީ މަހު ބާއްވާ މި ހަރަކާތުގައި ބައިވެރިވުމުގެ ފުރުސަތު، ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް މިއަދު ވަނީ ހުޅުވާލައްވައިފައެވެ. 

އެމްއެމްޕީއާރުސީން ވިދާޅުވީ ކޮންމެ ސިޓީއެއްގައި ބާއްވާ ހަރަކާތުގައި ވެސް މަދުވެގެން 20 ކުންފުންޏަށް ބައިވެެރިވުމުގެ ފުރުސަތު އޮންނާނެ ކަމަށެވެ. ކޮންމެ ކުންފުންޏަކަށް ބައިވެރިވެވެނީ ގިނަވެގެން ދެމީހަކަށެވެ. 

އެމްއެމްޕީއާރުސީން މިއަހަރު ވަނީ ރާއްޖެ އިސްތިހާރުކުރުމުގެ ބިޔަ ޕްރޮމޯޝަނެއް "ދަ ވޯލްޑްސް ބިގަސްޓް ގިވްއަވޭ" ގެ ނަމުގައި ފައްޓަވައިފައެވެ. ސޯޝަލް މީޑިއާ މެދުވެރިކޮށް ހިންގާ މި ޕްރޮމޯޝަންގައި ރާއްޖޭގައި ޗުއްޓީ ހޭދަކޮށްލުުމުގެ ފުރުސަތު ކޮންމެ ފަހުތާއަކު ވެސް ނަސީބުވެރި ފަރާތަކަށް ލިބޭނެއެވެ.