ފީފާ ވޯލްޑް ކަޕް 2026 ގެ ތެރޭގައި ބުރަކައްޓަށް ލިބުނު އަނިޔާއަކާ ގުޅިގެން ފްރާންސްގެ ޑިފެންޑަރު ވިލިއަމް ސަލީބާ ގިނަ ދުވަސްތަކަކަށް ކުޅުމާ ދުރުގައި ހުންނަން ޖެހިދާނެ ކަމަށް އިނގިރޭސި ޕްރިމިއަރ ލީގުގެ ކުލަބު އާސެނަލުން ހާމަކޮށްފިއެވެ.

ކެނެޑާ، މެކްސިކޯ އަދި އެމެރިކާގައި ބޭއްވި މި މުބާރާތުގެ ތެރޭގައި ސަލީބާއަށް މި އަނިޔާގެ އުނދަގޫތައް ކުރިމަތިވެ، ފަރިތަކުރުންތަކަށްވެސް ހުރަސްތަކެއް ކުރިމަތިވިއެވެ. ސެމީ ފައިނަލުގައި ސްޕެއިން އަތުން ފްރާންސް ބަލިވި މެޗުގެ 30 މިނެޓަށް ފަހު އޭނާ ބަދަލުކުރިއިރު، ތިންވަނަ ހޮވި މެޗުގައި އިނގިރޭސިންނާ ދެކޮޅަށް ކުޅުނު މެޗުގައި އޭނާ ބައިވެރިއެއް ނުވެއެވެ.

އާސެނަލުން އިއްޔެ ނެރުނު ބަޔާނެއްގައި ބުނެފައިވަނީ، "މި ހަފުތާގައި ވިލިއަމް އެނބުރި ލަންޑަނަށް ދިޔުމުން ސްޕެޝަލިސްޓުން ބެލި ބެލުމުން، އޭނާގެ ބުރަކައްޓަށް ލިބިފައިވާ އަނިޔާއިން ސަލާމަތްވުމަށް ރިހެބިލިޓޭޝަންގެ މަރުހަލާއެއް ފުރިހަމަކުރަން ޖެހޭކަން ވަނީ ކަށަވަރުވެފައި،" ކަމަށެވެ

"ފުންކޮށް ކުރެވުނު ތަހުލީލުތަކަށް ފަހު އޮޕަރޭޝަނެއް ކުރަން ނުޖެހޭ ކަމަށް ނިންމާފައިވީ ނަމަވެސް، ވިލިއަމް މިހާރު ވަނީ ޚާއްސަ ރިކަވަރީ ޕްރޮގްރާމެއް ފަށަން ޖެހިފައި. ކުލަބުގެ އެންމެންގެ އަމާޒަކީ ވީހާވެސް އަވަހަކަށް އޭނާ ފިޓުވެގެން އެނބުރި ދަނޑަށް އައުމަށް ބޭނުންވާ ހުރިހާ އެހީތެރިކަމެއް ފޯރުކޮށްދިނުން،" އާސެނަލުން އިތުރަށް ބުނެފައިވެއެވެ.

އާސެނަލުން ޕްރިމިއަރ ލީގުގެ ތަށި ދިފާއުކުރުމުގެ ދަތުރު ފަށާނީ އަންނަ އޮގަސްޓް 21 ވަނަ ދުވަހު، އަލަށް ޕްރޮމޯޓުވި ކޮވެންޓްރީ ސިޓީއާ ދެކޮޅަށް އަމިއްލަ ދަނޑުގައި ކުޅޭ މެޗުންނެވެ.