އިނގިރޭސި ޕްރިމިއަރ ލީގުގައި އިންގްލެންޑުގެ ކުޅުންތެރިންގެ ފަރާތުން ފެންނަ ފަދަ ވަރުގަދަ ކުޅުން މި ފަހަރުގެ ވޯލްޑް ކަޕުގައި އަދި ފެނިފައިނުވި ނަމަވެސް، މިރޭ ކުޅޭ ސެމީ ފައިނަލް މެޗުގައި އެ ޓީމުގެ ފަރާތުން ފެންނާނެ ވަރުގަދަކަމާ މެދު ސަމާލުވާން ޖެހޭނެ ކަމަށް އާޖެންޓީނާގެ މިޑްފީލްޑަރު އެލެކްސިސް މެކް އެލިސްޓާ ބުނެފިއެވެ.

ޕްރިމިއަރ ލީގުގައި ހަ ސީޒަން ކުޅެ، މިދިޔަ އަހަރު ލިވަޕޫލާއެކު ތަށި ހޯދާފައިވާ އުމުރުން 27 އަހަރުގެ މެކް އެލިސްޓާ ބުނީ، "އިންގްލެންޑް ޓީމުގެ ގިނަ ކުޅުންތެރިންނަކީ ކޮންމެ ހަފުތާ ބަންދެއްގައި އަހަރެން އެ މީހުންނާ ދެކޮޅަށް ކުޅޭ ކުޅުންތެރިން. އެއީ ޖިސްމާނީ ގޮތުން ވަރަށް ވަރުގަދަ ބައެއްކަން ސާފުކޮށް އެނގޭ،" ކަމަށެވެ.

"ވަރުބަލިކަމުގެ ސަބަބުން ކަމެއް ނުވަތަ ނޫން ކަމެއް ނޭނގެ، އެކަމަކު ޕްރިމިއަރ ލީގުން ފެންނަ ފަދަ ހަލުވި އަދި ވަރުގަދަ ކުޅުމެއް އެމީހުންގެ ފަރާތުން އަދި ނުފެނޭ. އެއީ ހޫނުގަދަވުމުގެ ސަބަބުން ނުވަތަ މޫސުމީ އެހެން ކަމަކާ ހުރެ ކަމަށް ވެދާނެ. އެކަމަކު އެއީ ވަރަށް މޮޅު ޓީމެއްކަން ޔަގީން. ކުރިމަތިލި ކޮންމެ ޓީމަކަށް ކުރާ ފަދައިން، އިންގްލެންޑަށް ވެސް އަހަރެމެން ވަރަށް ބޮޑަށް އިހުތިރާމް ކުރަން."

މެކް އެލިސްޓާ އިތުރަށް ބުނި ގޮތުގައި އިންގްލެންޑާ ދެކޮޅަށް ކުރާ ހަނގުރާމަ ކާމިޔާބު ކުރެވޭނީ ހަމައެކަނި ޖިސްމާނީ ބާރުގެ ބޭނުންކޮށްގެން ނޫން ކަމަށެވެ. އޭގެ ބަދަލުގައި ނަފުސާނީ ވަރުގަދަކަންވެސް އެހާމެ މުހިންމު ވާނެ ކަމަށެވެ. "ނަފުސާނީ ގޮތުން ތައްޔާރުވެފައި އޮތުމަކީ ނުހަނު ބޭނުންތެރި ކަމެއް. އަހަރެމެންނަށާއި އާންމުކޮށް ފުޓްބޯޅަ ކުޅުންތެރިންނަށްވެސް އެންމެ މުހިންމު އެއްޗަކީ ވިސްނުންތެރިކަން،" އޭނާ ބުންޏެވެ.

އާޖެންޓީނާގެ ފަރިތަކުރުންތަކުގެ ތެރެއިން މެކް އެލިސްޓާ އާއި ގޮންޒާލޯ މޮންޓިއެލް --- ފޮޓޯ: ރޮއިޓަރސް

މީގެ އިތުރުން އޭނާ ބުނީ، "ކުޅިވަރުގައި ޓެކްޓިކަލް އަދި ފަންނީ ކަންތައްތަކެއް ހިމެނުނު ނަމަވެސް، އެންމެ މުހިންމު ކަމަކީ މި ހުރިހާ ކަމެއް އެކުލަވައިލުން. އަހަރެމެންގެ އަމިއްލަ ނަފުސަށް ބޮޑު އިތުބާރެއް އެބައޮތް. އަހަރެމެން ކުރަންވީ ކަންތައް ވަރަށް ރަނގަޅަށް އެނގޭ. އަދި އަހަރެމެން ކުޅޭ ގޮތަކަށް ބަދަލެއް ނުގެންނާނަން."

މުބާރާތުގެ ފަހު ހަތަރު ޓީމުގެ ތެރެއަށް ވަނުމަށް އާޖެންޓީނާއިން ވަނީ އުނދަގޫ މެޗުތަކެއް ކުޅެފައެވެ. އެގޮތުން ދެވަނަ ބުރުގައި އިތުރު ވަގުތުގެ ދެ ހާފު ކުޅެގެން ކާބޯ ވާޑޭ ބަލިކުރުމާއި، ގަދަ 16 ގައި މިސްރާ ދެކޮޅަށް ކުޅުނު މެޗުގައި ދެ ލަނޑުން ފަހަތުގައި އޮވެ މޮޅުވުމުގެ އިތުރުން، ކުއާޓާ ފައިނަލުގައި 10 ކުޅުންތެރިންނާއެކު ކުޅުނު ސްވިޒަލެންޑް ބަލިކުރީ އިތުރު ވަގުތު ކުޅެގެންނެވެ.

"އަހަރެމެން ބޭނުންވި ވަރަށް ވުރެ ބޮޑަށް ބައެއް މެޗުތަކުގައި ތަކުލީފު އުފުލަން ޖެހުނުކަމީ ތެދެއް. އެކަމަކު އެއީ ވޯލްޑް ކަޕުގެ ފެންވަރު. މޮޅެތި ޓީމުތަކާ ދެކޮޅަށް ކުޅޭއިރު އަބަދުވެސް މިކަހަލަ ކަންތައްތައް ދިމާވާނެ،" މެކް އެލިސްޓާ ބުންޏެވެ. "އަހަރެން އުންމީދު ކުރަނީ މި މެޗަކީ ވަރަށް ފޯރިގަދަ، އަދި ދެ ފަރާތުގެ ކުޅުންތެރިންގެ މެދުގައިވެސް ނުތަނަވަސްކަން ބޮޑުވާނެ މެޗަކަށް ވާނެ ކަމަށް."