އެމްޑީޕީ ސަރުކާރުން ވެެރިކަމުގެ ފަސް އަހަރު ނިންމާލީ މުޅި ގައުމުގެ މާލިއްޔަތު އެއްކޮށް ކައި ހުސްކޮށްލާފައި ކަމަށާއި، މި ގައުމު ލޫޓުވާލި މީހުންގެ ވާހަކަ ރައްޔިތުންނަށް ހަނދާން ކޮށްދޭން ޖެހޭ ކަމަށް ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެންބަރު އަޙްމަދު އައިފާން ވިދާޅުވެއްޖެ އެވެ.

އައިފާން މިހެން ވިދާޅުވެފައި ވަނީ، ކޮންގްރެސް ޕާޓީއިން ރޭ ބޭއްވި ޖަގަހަ ޖަލްސާގައި ވާހަކަ ދައްކަވަމުންނެވެ.

އައިފާން ވިދާޅުވީ، ރައްޔިތުން އެބޭފުޅުން ވެރިކަމުން ބޭލުމަށް ފަހު ގެއަށް ފޮނުވައިލީ އިހަކަށް ދުވަހު ކަމަށާއި، މިއަދު ނުކުމެ ވައްކަމުގެ ވާހަކަ ދެއްކީމާ އަންނަނީ ހިނި ކަމަށެވެ.

އެމްޑީޕީ އިން ވެރިކަމާ ހަވާލުވިއިރު ގައުމުގެ ރައުސުލްމާލުގައި ފައިސާ ހުރި ކަމަށާއި، ނަމަވެސް ފަސް އަހަރު ދިޔައީ ރައްޔިތުންގެ ހައްގުގައި އެއްވެސް މަސައްކަތެއް ނުކުރެވި ކަަމަށް ވެސް އައިފާން ވިދާޅުވި އެވެ. އޭގެ ބަދަލުގައި ފެނުނީ މުޅި ގައުމުގެ މާލިއްޔަތު އެއްކޮށް ކާލައި ހުސްކޮށްލާފަ ދިޔަ މަންޒަރު ކަމަށެވެ.

އައިފާން ވިދާޅުވެފައި ވަނީ، އެ ގޮންޖެހުންތަކާއެކު ވެސް ރައީސް ޑރ.މުޢިއްޒު ކުރައްވަމުން އެ ގެންދަވަނީ މި ގައުމު ވެއްޓިފައިވާ އަނދަވަޅުން ސަލާމަތްކުރުމުގެ މަސައްކަތް ކަމަށެވެ.