އެމްޑީޕީ ސަރުކާރުން ރާއްޖެ އަށާއި ރައްޔިތުންނަށް ޚިޔާނަތްތެރި ވެފައިވާ ކަމަށާއި ދެވަނަ ފަހަރަށް އެފަދަ ހިޔާނާތެއްވާން އެމްޑީޕީއަށް ފުރުސަތު ނުދޭނެ ކަމަށް ފުނަދޫ ދާއިރާގެ މެންބަރު މުހައްމަދު މަމްދޫހު (މަންޑޭ) ވިދާޅުވެއްޖެއެވެ. 

ޖޯޝުގައި ވާހަކަ ދައްކަވަމުން އޭނާ ވިދާޅުވީ ނިމިދިޔަ އެމްޑީޕީ ސަރުކާރުން ރައްޔިތުން އަޅުވެތިކޮށް ގައުމު ދަރުވާލައި، އަދަދު ނުކުރެވޭ ވަރަށް ޚިޔާނާތްވެފައިވާތީ، ގައުމާއި ރައްޔިތުންނަށް ޚިޔާނާތްތެރިވި ޚިޔާނާތްތެރިންނަށް (އެމްޑީޕީ) ދެވަނަ ފުރުސަތެއް ނުދޭނެ ކަމަށެވެ.

ޕީއެންސީގެ ބޮޑު ލަޝްކަރު ނުކުމެ ތިބީ ރައްޔިތުންގެ ޚިދުމަތުގައިކަން ފާހަގަ ކުރައްވަމުން އޭނާ ވިދާޅުވީ ކުރީ ސަރުކާރުން ކަންތައް ބައްޓަން ކުރީ ހަމައެކަނި ސަރުކާރުގެ އިސްވެރިންނަށް ނަފާ އާއި މަންފާ ލިބޭ ގޮތެވެ. އަދި އެމްޑީޕީގެ ވެރިން ރައްޔިތުން ބިކަކޮށް ހާލުގައި ޖައްސާލި ކަމަށް ވެސް އޭނާ ވަނީ ވިދާޅުވެފައެވެ.

އެގޮތުން ނިމިދިޔަ 19 ވަނަ މަޖިލީހުގެ މެޖޯރިޓީ ސަރުކާރަށް އޮތް ނަމަވެސް ޤާނޫނުތަކުގެ ބާރު ކަނޑުވާލާ ޤާނޫނާ ޚިލާފަށް އެތައް ކަމެއް އެމްޑީޕީން ކޮށްފައިވާކަން މަމްދޫހު ފާހަގަ ކުރެއްވިއެވެ. އަދި އޭރުގެ ވެރިން ބޭނުންވީ ސިޔާސީ ވެރިންގެ ފައިބުޑަށް ގޮސްގެން ރައްޔިތުން ކަންކަން ކުރުވާނެ މަގަށް ހުރިހާ ކަންކަން ބައްޓަން ކުރުން ކަމަށް ވެސް  އޭނާ ވިދާޅުވިއެވެ.

ޕީއެންސީން ރޭ ބޭއްވި ހަރުގެ ޖަލްސާގައި ވާހަކަ ދައްކަވަމުން މަމްދޫހު ވިދާޅުވީ ވައްކަމުގެ ބޮޑެތި ޢަމަލުތައް ސަރުކާރު ތެރެއިން ކުރަމުން ދިޔައިރު ވެސް ކުރީ ސަރުކާރުގެ ވެރިން އެކަމާ އަޅާލާފައި ނުވާ ކަމަށެވެ.

މަމްދޫހު ވިދާޅުވީ، ކުރީ ސަރުކާރުން 64 ބިލިއަން ރުފިޔާއިން ރާއްޖެ ދަރުވާލި ނަމަވެސް، އެންމެ އަސާސީ ހިދުމަތްތައްވެސް ރައްޔިތުންނަށް ފޯރުކޮށްދީފައި ނުވާ ކަމަށެވެ.

މަންޑޭ ވިދާޅުވީ ރައީސް ޑރ. މުޢިއްޒުގެ ފުރަތަަމަ އަހަރު ނިމިގެން ދިޔައީ ރައްޔިތުންނަށް އުފަލާއި ހިތްހަަމަ ޖެހުން ގެނެސް ދެމުންނެވެ. އަދި އެމްޑީޕީން ހަދާފައިވާ ގޯސްތައް ރަނގަޅު ކުރުމުގައި ގިނަ މަސައްކަތްތަކެއް މިހާތަނަށް ވެސް ރައީސް ކުރައްވާފައިވާކަން ފާހަގަކުރައްވަމުން މަންޑޭ ވިދާޅުވީ، ކުރިއަށް ވެސް ގިނަ ކަންތައްތަކެއް ކުރަން އެބަ ހުރި ކަމަށެވެ.