ރ. އުނގޫފާރު ރީޖަނަލް ހޮސްޕިޓަލުގައި އެމްއާރުއައިގެ ޚިދުމަތްދޭން ފަށައިފިއެވެ. 

މި ޚިދުމަތް އެ ހޮސްޕިޓަލްގައި ރަސްމީކޮށް އިފްތިތާހް ކޮށްދެއްވީ އެ ރަށުގައި ރޭ ބޭއްވި ޚާއްސަ ރަސްމިއްޔާތެއްގައި ހެލްތު މިނިސްޓަރު ޢަބްދުﷲ ނާޒިމެވެ. 

އުނގޫފާރު ރީޖަނަލް ހޮސްޕިޓަލްގައި އެމްއާރުއައިގެ ޚިދުމަތް ފެށުމަށް ރޭ ބޭއްވި ހާއްސަ ރަސްމިއްޔާތުގައި ވާހަކަފުޅު ދައްކަވަމުން ހެލްތު މިނިސްޓަރ ނާޒިމް ވިދާޅުވި ރައީސް ޑރ. މުޙައްމަދު މުޢިއްޒުގެ ވައުދުފުޅާއި އެއްގޮތަށް އެ ހޮސްޕިޓަލް ޓާޝަރީ ފެންވަރަށް ގެނައުމަށް އެމަނިކުފާނު ވަރަށް ބޮޑު އިސްކަމެއް ދެއްވާ ކަމަށެވެ. 

އޭގެ އިތުރުން ނާޒިމް ވިދާޅުވީ، ހޮސްޕިޓަލްގެ ޚިދުމަތްތައް ކުރިއަރާ ދިޔުމުގައި ހޮސްޕިޓަލްގެ ޓީމާއި ރަށުގެ މުއައްސަސާތަކާއި ރަށުގެ ރައްޔިތުން އެކަމަށްދޭ އެއްބާރުލުން އުފާވެރިކަމާއެކު ފާހަގަ ކުރައްވާކަމަށެވެ. އަދި މި ނޫން ވެސް ގިނަ އެކި ޚިދުމަތްތައް ކުރިއަށް އޮތް ދުވަސްތަކުގައި ވެސް ހޮސްޕިޓަލްގައި ތަޢާރަފް ކުރެވިގެން ދާނެކަމަށް މިނިސްޓަރު ވިދާޅުވިއެވެ. 

ރައީސުލް ޖުމްހޫރިއްޔާ ވައުދުވެވަޑައިގެންނެވި ގޮތަށް އުނފާރު ހޮސްޕިޓަލް ޓާރޝަރީ ފެންވަރަށް ބަދަލުކުރެއްވުމަށް ހެލްތު މިނިސްޓްރީން ކުރަން ޖެހޭ މަސައްކަތްތަކަކީ ކޮބައިތޯ ބައްލަވައި އެކަން ބާރު ސުޕީޑުގައި ކުރައްވާނެ ކަމަށް ވެސް މިނިސްޓަރު ވިދާޅުވިއެވެ.