އިދިކޮޅު އެމްޑީޕީން އެ ސަރުކާރުތަކުގެ ބަޖެޓުތައް ތަންފީޒުކުރަމުން ދިޔައީ ދިގު މުއްދަތެއްގައި ގައުމަށް ލިބިދާނެ ގެއްލުމަކަށް ބަލާފަ ނޫންކަމަށް މާލީ ކަންކަމާއި ތަރައްގީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވެއްޖެ އެވެ. 

ކޮންގްރެސް ޕާޓީން ކުރިއަށްގެންދިޔަ މާފަންނު ހުޅަނގު ދާއިރާގެ ދޮރުން ދޮރަށް ހަރަކާތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އަރިހުގައި ބައިވެރިވެވަޑައިގެން ދެއްކެވި ވާހަކަފުޅުގައި ވަޒީރު ވިދާޅުވީ  މި ސަރުކާރަކީ ވައުދު ފުއްދާނެ ސަރުކާރެއްކަމަށެވެ. 

އިންތިހާބު ކާމިޔާބު ކުރުމަށް ފަހު 2024 ވަނަ އަހަރުގެ ބަޖެޓު އެކުލަވާލުމުގައި އައު ސަރުކާރުން ހިންގަން ބޭނުންވާ ތަރައްގީގެ މަޝްރޫއުތައް ހިމަނައިދެއްވުމަށް އެދުނު ނަމަވެސް އެމްޑީޕީން އެގޮތަށް އަމަލުކޮށްފައި ނުވުމުގެ ސަބަބުން 2024 ވަނަ އަހަރު ސަރުކާރުން ހިންގަން ބޭނުންވި ތަރައްގީއަށް ހުރަސްއެޅުނުކަން ވަޒީރު ފާހަގަކުރެއްވި އެވެ. 

ނަމަވެސް 2024 ވަނަ އަަހަރުގެ ފަހުކޮޅު ހުށަހަޅައި 2025 ވަނަ އަހަރު ތަންފީޒު ކުރެވުނު ސަރުކާރުގެ ފުރަތަމަ ބަޖެޓަކީ ކާމިޔާބު ގިނަ މަސައްކަތްތަކެއް ކުރެވިގެންދިޔަ ބަޖެޓެއްގެ ގޮތުގައި ވަޒީރު ސިފަކުރެއްވި އެވެ. 

ބަޖެޓު ތަންފީޒުކުރުމުގައި އެމްޑީޕީން ގެންގުޅެފައިވަނީ ވަރަށް ދޯހަޅި ސިޔާސަތުތަކެއްކަން ވަޒީރު ފާހަގަކުރެއްވި އެވެ. 

ސަރުކާރު އައިއިރު މާލީ ގޮތުން ހާލަތު ދަށް ނަމަވެސް ގެނެވުނު އިސްލާހީ ބަދަލުތަކުގެ ސަބަބުން މިހާރު އިގްތިސާދު ވަރުގަދަވެފައިވާކަމަށާއި މި ބަދަލާއެކު ރައްޔިތުންނަށް ބޭނުންވާ އަސާސީ ހިދުމަތްތައް ފޯރުކޮށްދިނުމާއި ތަރައްގީގެ މަޝްރޫއުތައް ޕްރައިވެޓް ސެކްޓަރއާ ގުޅިގެން ކުރެވެމުންދާކަން ވަޒީރު ފާހަގަކުރެއްވި އެވެ. 

ވަޒީރު ވިދާޅުވީ މިއަހަރަށް ލަފާކޮށްފައިވާ ބަޖެޓަކީ ވެސް ރައްޔިތުންނަށް ގިނަ ފައިދާތަކެއް ލިބިގެންދާނެ ކާމިޔާބު ބަޖެޓަކަށް ވާނެ ކަމަށެވެ.