ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއް ދުވަހެއްގައި ބޭއްވުމުން ރައްޔިތުންނަށް ގެއްލުންވާނެ ކަމަށް ވިދާޅުވަމުން އަންނައިރު، ރައްޔިތުންނަށް މިކަމުން ވާނެ ގެއްލުމުގެ ތަފްސީލުތައް ވިދާޅުވެދެއްވުމަށް ކާށިދޫ ދާއިރާގެ ކުރީގެ މެމްބަރު އަބްދުﷲ ޖާބިރު، އިދިކޮޅު އެމްޑީޕީގެ އިސްވެރިންނަށް ގޮވާލައްވައިފި އެވެ. 

ކުރިއަށް އޮތް ލޯކަލް ކައުންސިލް އިންތިހާބަށް ތައްޔާރުވުމުގެ ގޮތުން ކޮންގްރެސް ޕާޓީން މީޑިއާތަކުގެ ޒަރިއްޔާއިން ކުރިއަށްގެންދާ ކެމްޕެއިން ހަރަކާތް "ދިވެހިންގެ ރާއްޖެ" ޕްރޮގްރާމުގައި ރޭ ބައިވެރިވެވަޑައިގެން ޖާބިރު ވަނީ މައި ދެ އިންތިހާބު އެއް ދުވަހެއްގައި ބޭއްވުމަށް ތާއީދު ކުރައްވައި އެކަމުގެ ސަބަބުން ރައްޔިތުންނަށް ލިބިގެންދާ މަންފާތަކުގެ މައްޗަށް އަލިއަޅުވާލައްވައި ވާހަކަފުޅު ދައްކަވާފަ އެވެ. 

 ޖާބިރު ވިދާޅުވީ ދެ އިންތިހާބު އެއް ދުވަހެއްގައި ބޭއްވުމާމެދު ދެކޮޅުހަދައި މިހާރު އިދިކޮޅު ފަރާތްތަކުން ދައްކަމުން އަންނަ ވާހަކަތަކަކީ މާ ބޮޑު ހަގީގަތެއް އޮތް ވާހަކަތަކެއް ކަމުގައި ގަބޫލުނުކުރައްވާ ކަމަށެވެ. ޖާބިރުވަނީ ދެ އިންތިހާބު އެއް ދުވަހެއް ނުބާއްވަން ބުނާއިރު އެކަން ނުކުރަންޖެހޭ ސަބަބުތައް ނުވަތަ ހެކިތައް އެމްޑީޕީއަށް ދެއްކިފައި ނުވާތީ އެ ޕާޓީގެ ލީޑަރޝިޕަށް ވަރަށް ބޮޑަށް ފާޑު ވިދާޅުވެފަ އެވެ. 

ރާއްޖޭގައި މިހާރު ޒިންމާދާރު އިދިކޮޅު ސިޔާސީ ޕާޓީއެއް ނެތްކަމަށް ވިދާޅުވެ، ޖާބިރު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސަތުތަކުގެ ހަރުދަނާކަމުން އިދިކޮޅަށް ނިސްބަތްވާ ގިނަ ރައްޔިތުން ވެސް މިއަދު ތިބީ އެމަނިކުފާނުގެ ފަހަތްޕުޅުގައި ކަމަށެވެ. 

ގާނޫނު އަސާސީ އެކުލަވާލި ހާއްސަ މަޖިލީހުގައި ވެސް މަސައްކަތް ކުރެއްވި ޖާބިރު ވިދާޅުވީ ހާއްސަ މަޖިލީހުގައި ދެ އިންތިހާބު އެއް ދުވަހެއްގައި ބާއްވަން ފެންނަ ކަމުގެ ބަހުސްތައް ކުރެވިގެން ދިޔައީ ރައްޔިތުންނަށް ފައިދާވާނެތީ ގައުމާއި ރައްޔިތުންގެ ހައްގުގައި ކަމަށެވެ. 

ހިޔާލުތަފާތުވުމަކީ އޮތްކަމެއް ކަމަށާއި އެހެން ނަމަވެސް އޭގެ މާނައަކީ ދެ އިންތިހާބު އެއް ދުވަހެއްގައި ބޭއްވުމަކީ ގޯސްކަމެކޭ ކިޔައި އެގޮތަށް ރައްޔިތުންނަށް ވިސްނާދިނުން ނޫންކަމަށް ޖާބިރު ވިދާޅުވި އެވެ.