ކަނޑުމަގުން ރާއްޖެއަށް މަސްތުވާތަކެތި އެތެރެކުރި ދެ މީހަކު ހައްޔަރުކޮށްފައިވާކަމަށް ފުލުހުންގެ އިދާރާއިން ބުނެފިއެވެ.

ފުލުހުން މިއަދު އާއްމުކުރި މަޢުލޫމާތުގައި ބުނީ، މި ދެމީހުން ހައްޔަރުކޮށްފައިވަނީ ރާއްޖެއަށް މަސްތުވާތަކެތި އެތެރެކޮށް، ބޭނުންކޮށް، ގެންގުޅެ އަދި އެ ތަކެތި ވިއްކައި ވިޔަފާރިކުރުމުގެ ތުހުމަތުގައި ކަމަށެވެ. 

މި ދެ މީހުން ހައްޔަރުކޮށްފައިވަނީ މޯލްޑިވްސް ކަސްޓަމްސް ސަރވިސްއާއި ޑްރަގް އެންފޯސްމަންޓް ގުޅިގެން ހިންގި އޮޕަރޭޝަންގައި މި މަހު 5 ވަނަ ދުވަހުއެވެ.

މި މައްސަލާގައި ހައްޔަރުކޮށްފައި ވަނީ މއ. ތަރިޖެހިއާގެ / މާލެ، ޢިސްމާއީލް އަބާން ޢަބްދުﷲ (25އ) އާއި ސ. މަރަދޫ / ރަތްމާގެ، އަޙްމަދު ދާން ފަރްހޫދު (19އ) އެވެ.

ފުލުހުން ބުނިގޮތުގައި މި މައްސަލައާ ގުޅިގެން އެ ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ދެ މީހުން ވެސް ފަސް ދުވަހަށް ބަންދުކުރުމަށް ވަނީ އަމުރުކޮށްފައެވެ.

މި މައްސަލަ ފުލުހުން ގެންދަނީ ތަހުގީގުކުރަމުން ކަމަށްވެސް ފުލުހުން ވަނީ ބުނެފައެވެ.

ކަނޑުމަގުން ރާއްޖެއަށް މަސްތުވާތަކެތި ހައްޔަރުކުރި ދެ ދިވެހިން ހައްޔަރުކުރިއިރު، ރާއްޖެއަށް މަސްތުވާތަކެތި އެތެރެކުރި 6 މީހަކު ހައްޔަރުކޮށްފައިވާކަން ފުލުހުން މިއަދު ވަނީ ހާމަކޮށްފައެވެ. އޭގެތެރެއިން އެކަކު ހައްޔަރުކުރީ ކުޅުދުއްފުށި ސިޓީންނެވެ.