ހުޅުމާލެ ފޭސް އެކެއްގައި ރޭ މެންދަމު ހިނގި އަލިފާނުގެ ހާދިސާއެއް، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ އެހީތެރިކަމާއެކު ކޮންޓްރޯލް ކޮށްފިއެވެ. 

އެމްއެންޑީއެފްއިން އާއްމުކުރި މައުލޫމާތުގައި ބުނީ، އަލިފާނުގެ ހާދިސާ ހިނގީ، ހުޅުމާލެ ފޭސް އެކެއްގެ "ކްލީން ޕްލޭޓް" ނަމަކަށް ކިޔާ ކެފޭގެ ބަދިގޭގައި ކަމަށެވެ. 

މި ހާދިސާ މެދުވެރި ސަބަބަކީ ކެފޭގެ ބަދިގޭގައި ބޭނުންކުރަމުން އައި ގޭސްފުޅީގައި އަލިފާން ރޯވުމުން ކަމަށް އެމްއެންޑީއެފް އިން ވަނީ ބުނެފައެވެ.

ކެފޭގައި ރޯވި އަލިފާން އެމްއެންޑީއެފް މާލެ އޭރިއާ ކޮމާންޑް، ހުޅުމާލެ ފަޔަރ ސްޓޭޝަންގެ ފަޔަރ ފައިޓަރުން ވަނީ ނިއްވާލާފައެވެ. 

މި ހާދިސާގެ މައުލޫމާތު އެމްއެންޑީއެފްއަށް ލިބުނީ ރޭ މެންދަމު 2:20 ހާއިރުއެވެ. މައުލޫމާތު ލިބުމާއެކު ހުޅުމާލެ ފަޔަރ ސްޓޭޝަނުގެ ފަޔަރ ފައިޓަރުން ވަނީ އެ ސަރަހައްދަށް ގޮސްފައިވެއެވެ. މިގޮތުން ފަޔަރ ފައިޓަރުން ކުރި މަސައްކަތުން ބަދިގޭގައި ރޯވި އަލިފާން ނިއްވާލެވުނީ 2:34 ހާއިރުކަމަށް އެމްއެންޑީއެފްއިން ވަނީ ބުނެފައެވެ. 

މި ހާދިސާގެ ސަބަބުން ކެފޭ ބަދިގެއަށް ގެއްލުންތަކެއް ވީނަމަވެސް، އެއްވެސް މީހަކަށް ގެއްލުމެއް ލިބިފައިނުވާކަމަށް އެމްއެންޑީއެފްއިން ވަނީ ބުނެފައެވެ.